باسقارما توراعاسى باعلان قۇلتاەۆتىڭ ايتۋىنشا, كورپوراتسيا ينۆەستيتسيالىق جوبالاردى قارجىلاندىرۋعا ەرەكشە كوڭىل بولەدى. بۇگىندە كومپانيا قورجىنىندا جالپى قۇنى 73 ملرد تەڭگەنى قۇرايتىن 154 ينۆەستيتسيالىق جوبا بار.
«قازاگرو» ۇبح, اگرارلىق نەسيە كورپوراتسياسىنىڭ ينۆەستيتسيالىق باعىتىنىڭ ءبىرى – ۇزدىكسىز ءونىم بەرەتىن جەمىس باقتارى. الماتى, جامبىل جانە تۇركىستان وبلىستارىنىڭ كليماتىنىڭ جۇمساقتىعى مەن اۋا رايىنىڭ قولايلىعى ايماق كاسىپكەرلەرىنىڭ بەلسەندىلىگىنە مۇمكىندىك بەرەدى. وسى وڭىرلەردە جەڭىلدەتىلگەن نەسيە ارقىلى الما, جاڭعاق, ءجۇزىم جانە دە باسقا دا شەكىلدەۋىكتى, سۇيەكتى جەمىس داقىلدارىن ءوسىرۋ جوبالارى قارجىلاندىرىلدى. باقتاردىڭ جىلدىق جەمىس بەرۋ قۋاتتىلىعى –72 توننا.
«جەمىس باقتارىن دامىتۋ باعىتىندا جۇزەگە اسقان جوبالاردىڭ جالپى قۇنى – 30 ملرد-تان استام تەڭگە. ۇزدىكسىز جەمىس بەرەتىن باقتاردى دامىتۋ ماقساتىندا ۇيىم 21 ملرد تەڭگەدەن استام نەسيە بەردى. بيىل ەلىمىزدە جەڭىلدەتىلگەن نەسيەنى وڭاي الۋ جولدارىنىڭ ناتيجەسىندە باۋ-باقشانىڭ جاڭا 8 جوباسى ىسكە قوسىلادى», دەدى ب.قۇلتاەۆ.
قارجىلاندىرىلعان جوبانىڭ ءبىرى – تۇركىستان وڭىرىندە. «قازىعۇرت باقتارى» اۋىل شارۋاشىلىعى كووپەراتيۆى 140 گەكتار شارشى اۋداندا بىرنەشە سۇرىپتى, اتاپ ايتقاندا, گرەني سميت, ايدارەد, گولدەن دەليشەس, گالا ت.ب. جالپى سانى 265 الما كوشەتىن ەكتى. باعبان ەرجان مادىبەكوۆ نەسيە قارجىسىنا كوشەتتەر ساتىپ الىپ, باقتى تولىقتاي يزرايلدىك تەحنولوگياعا سۇيەنگەن تامشىلاتىپ سۋارۋ جۇيەسىمەن جابدىقتادى. ودان بولەك, الما اعاشتارىن قولايسىز اۋا رايىنان قورعايتىن تورلار, ەكپە كوشەتتەردى قاتارلاپ وتىرعىزۋعا مۇمكىندىك بەرەتىن قۇرىلعى ساتىپ الدى. سونداي-اق ءتيىمدى پايىزدىق مولشەرلەمەمەن, باۋعا قاجەتتى اۋىلشارۋاشىلىق تەحنيكالارىنىڭ قىزمەتىنە جۇگىندى.
«الما كوشەتتەرىن وتىرعىزۋ بارىسى عىلىمعا سۇيەنگەن جۇمىس جوباسى نەگىزىندە جۇرگىزىلدى. بۇل ءوز كەزەگىندە, باۋدىڭ ونەركاسىپتىك ءتۇرى مەن جوعارى سۇرىپتى جەمىس ءوسىرۋدىڭ پروگرەسسيۆتى اگروتەحنولوگياسىنا سۇيەنە وتىرىپ قۇرىلعان», دەيدى كاسىپكەر.
سونداي-اق ەلىمىزدى ازىق-ت ۇلىكپەن قامتۋ باعىتىنداعى تاعى دا ءبىر ماڭىزدى سالا – ءسۇت ءوندىرىسى. تاۋارلى ءسۇت ءوندىرۋ فەرمالارىنا دا جەڭىلدەتىلگەن نەسيەنى بەرۋدە باسىمدىق بەرىلەدى. تەك سوڭعى 10 جىلدا اگرارلىق نەسيە كورپوراتسياسى ءونىمنىڭ جالپى قۋاتى 134 مىڭ توننا ءسۇت وندىرۋگە جەتەتىن 45 جوباعا قولداۋ ءبىلدىردى.
«بورتە ميلكا» جشس وتاندىق نارىققا, 4,3 توننادان استام ءسۇت شىعارادى. كاسىپورىن تۇركىستان وبلىسىنىڭ ورداباسى اۋدانىندا 80 ادامدى جۇمىسپەن قامتىپ وتىر. كاسىپكەر اگرارلىق نەسيە كورپوراتسياسى ارقىلى الىنعان قاراجاتقا مالدى بايلاپ باعۋ جابدىعىن, ەۋروپادا جاسالعان جەمدى تەگىستەۋ قۇرىلعىلارىن ساتىپ الدى. كاسىپتى كەڭەيتۋ دە ويدا بار.
ء«بىزدىڭ تاۋارلى ءسۇت فەرماسى 2018 جىلى ىسكە قوسىلعان. قازىر فەرمادا ساۋىن ءسۇت وندىرىلەدى. دايىن ءونىمدى قايتا وڭدەۋ جانە ونى نارىققا شىعارۋ جۇمىستارى جولعا قويىلعان», دەپ اتاپ ءوتتى كاسىپورىن ديرەكتورى نۇرالى ءابىشوۆ.
اگرارلىق نەسيە كورپوراتسياسى جاڭا تەحنولوگيانىڭ دامۋىنا, باسەكەگە قابىلەتتى ونىمدەرگە, اۋىلشارۋاشىلىق قىزمەت ءتۇرىنىڭ جاقسارۋىنا, وتاندىق ءونىمنىڭ قارقىن الۋىنا ءاردايىم قولداۋ كورسەتىپ كەلەدى. بۇگىنگى كورسەتكىشتەرگە سايكەس, اگروونەركاسىپ كەشەنىنە, اۋىل شارۋاشىلىعىنا ينۆەستيتسيا قۇيۋدان كوش باسىندا كەلەدى.
