تاريح • 28 قىركۇيەك، 2020

تۋىستارى 80 جىل بويى ىزدەگەن قازاق جاۋىنگەرىنىڭ سۇيەگى تابىلدى

115 رەت كورسەتىلدى

ەكىنشى دۇنيەجۇزىلىك سوعىس جىلدارى ءىز-ءتۇسسىز كەتكەن قازاقستاندىق جاۋىنگەر تىكشەكەەۆ قايىرجاننىڭ سۇيەگى تابىلدى. "Atamnyn Amanaty" قوعامدىق بىرلەستىگى مەن ۋكرايناداعى "ۆەرتيكال" مامانداندىرىلعان ىزدەۋ بىرلەستىگى جاۋىنگەردى تۋعان جەرىندە جەرلەۋ ءۇشىن 10 كۇن ىشىندە ەلگە الىپ كەلەدى، دەپ حابارلايدى Egemen.kz.

تىكشەكەەۆ قايىرجان 1916 جىلى سولتۇستىك قازاقستان وبلىسىندا دۇنيەگە كەلگەن. مايدانعا 1940 جىلى شاقىرىلدى. قازىرگى تاڭدا جاۋىنگەردىڭ سۇيەگى ۋكرايناداعى (كيەۆ) قازاقستان رەسپۋبليكاسىنىڭ اسكەري اتتاشەسىنە بەرىلدى. قازاقستانعا جەتكىزىلگەن سوڭ نەمەرەسى تىكشەكەەۆ ماراتقا رەسمي تۇردە تابىستالادى. سولداتتى جەرلەۋ ءراسىمى سولتۇستىك قازاقستان وبلىسى ايىرتاۋ اۋدانى داۋقارا اۋىلىندا وتەدى. شارانى ۇيىمداستىرۋعا سولتۇستىك قازاقستان وبلىسىنىڭ اكىمدىگى كومەكتەسەدى.

"وسىعان دەيىن ءتورت قازاقستاندىق سولداتتىڭ سۇيەگىن ەلگە اكەلدىك. تىكشەكەەۆ قايىرجان بەسىنشىسى. ءبىزدىڭ ىزدەۋشىلەر جانە ۋكرايناداعى ىزدەۋشىلەر بىرلەستىگى ۇلكەن جۇمىس اتقاردى. ولار قازاقستاندىق سولداتتىڭ سۇيەگىن تاپتى. ال ءبىزدىڭ ىزدەۋشىلەر جاۋىنگەردىڭ تۋىستارىن تاپتى. وسىلايشا بۇل وقيعانىڭ باسى مەن اياعى بىرىكتىرىلدى. ءبىز ءۇشىن تىكشەكەەۆ ماراتتىڭ قۋانىشىنا سەبەپكەر بولۋ ۇلكەن مارتەبە. اكەسى، اناسى، اجەسى ىزدەگەن. اراعا 80 جىل سالىپ قازاقستاندىق جاۋىنگەردى تاپتىق. وسى ۇزاق جولدى بىزبەن بىرگە وتكەن بارشا ازاماتتارعا شىن جۇرەكتەن العىس ايتامىز"، دەيدى "Atamnyn Amanaty" قوعامدىق بىرلەستىگى باسقارما توراعاسىنىڭ ورىنباسارى رايگۇل مۇشانوۆا.

تىكشەكەەۆ قايىرجاندى ىزدەۋ جۇمىستارى ۇزاق جىلدار بويى جۇرگىزىلدى. وسى جىلى قازاقستاندىق سولداتتىڭ سۇيەگى تابىلىپ، ونى قازاقستانعا اكەلۋ مۇمكىندىگى تۋدى. Sputnik  قازاقستان ءباسپاسوز ورتالىعىندا وتكەن ونلاين بريفينگ بارىسىندا جاۋىنگەردىڭ نەمەرەسى تىكشەكەەۆ مارات ايتىپ بەردى.

"اتامدى ىزدەۋ جۇمىستارى 80 جىلعا سوزىلدى. تىكشەكەەۆ قايىرجاندى ونىڭ اناسى ءجاميليا ءومىر بويى ىزدەدى. تىكشەكەەۆ قايىرجان جالعىز ۇلى بولاتىن. سوڭعى حاتىن 1941 جىلدىڭ شىلدە ايىندا الدى. ودان كەيىن بالاسىمەن بايلانىسى ءۇزىلىپ كەتتى. حابار-وشارسىز كەتتى دەگەن قاعاز الدىق. اتامىزدى اجەم ىزدەدى، اكەم ىزدەدى. 2004 جىلى اكەم دۇنيەدەن ءوتتى. اتامىز مايداننان جازعان 12 حاتىن ماعان امانات ەتىپ قالدىرىپ كەتتى. ارى قاراي ىزدەۋدى مەن جالعاستىراتىنىمدى ايتتى. 2009 جىلى اس بەردىك. وسى جىلى ۋكراينادا اتاڭىز تابىلدى دەگەن حاباردى ەستىگەن سوڭ، قاتتى قۋاندىق"، دەيدى ول. 

سوڭعى جاڭالىقتار

ۇقساس جاڭالىقتار