تاعايىنداۋ • 25 قىركۇيەك، 2020

ولجاس قۇدايبەرگەنوۆ جاڭا قىزمەتكە تاعايىندالدى

367 رەت كورسەتىلدى

ۇلتتىق ەكونوميكا مينيسترلىگى جانىنداعى باسقارۋشى كەڭەستىڭ وتىرىسىندا قازاقستان رەسپۋبليكاسىنداعى مەملەكەتتىك باسقارۋدىڭ جاعدايى مەن بولاشاعى تالقىلاندى، دەپ حابارلايدى Egemen.kz

كەڭەس توراعاسى بولىپ ەكونوميست، قازاقستان رەسپۋبليكاسى پرەزيدەنتىنىڭ جانىنداعى الەۋمەتتىك-ەكونوميكالىق رەفورمالاردىڭ مونيتورينگىن تالداۋ ورتالىعىنىڭ مۇشەسى ولجاس قۇدايبەرگەنوۆ سايلاندى.

ۇلتتىق ەكونوميكا ءمينيسترى رۋسلان دالەنوۆ كەڭەستىڭ نەگىزگى مىندەتتەرىن ءتۇسىندىردى.  بۇل مينيسترلىكتىڭ قىزمەتىن باعالاۋ جانە جەتىلدىرۋ بويىنشا ۇسىنىمدىق شەشىمدەر ازىرلەۋ.

كۇن ءتارتىبى بويىنشا ۇلتتىق ەكونوميكا ۆيتسە-ءمينيسترى ايگۇل شايىموۆا ءسوز سويلەدى. ونىڭ ايتۋىنشا، ساپا مەن تيىمدىلىكتى ارتتىرۋ ءۇشىن مەملەكەتتىك اپپاراتتى باسقارۋدىڭ قۇزىرەتتىلىك تاسىلىنە كوشىرۋ جوسپارلانۋدا. بۇل ۇيىمدىق قۇرىلىمعا يكەمدىلىك بەرەدى جانە مەملەكەتتىڭ ەكونوميكالىق كۇن ءتارتىبىنىڭ ترەندتەرىن ەسكەرە وتىرىپ، مەملەكەتتىك ورگاندار قۇرىلىمىندا "جۇمساق" دەپارتامەنتتەر قۇرۋعا مۇمكىندىك بەرەدى.

وتىرىسقا قاتىسۋشىلار قويىلعان مىندەتتەردى ناتيجەلى شەشۋ ءۇشىن مەملەكەتتىك ورگانداردىڭ كادرلىق الەۋەتىن ودان ءارى جەتىلدىرۋ بويىنشا ۇسىنىستار جاسادى.

ۇلتتىق ەكونوميكالىق ۆەدومستۆو باسشىسى رۋسلان دالەنوۆ ۇسىنىلعان شارالاردى ىسكە اسىرۋ تەتىگى جاڭا ەكونوميكالىق ساياساتتىڭ نەگىزگى باعىتتارى بويىنشا ناتيجەگە قول جەتكىزۋگە باعىتتالاتىنىن اتاپ ءوتتى.  قۇزىرەتتىلىك ءتاسىل قابىلدانعان شەشىمدەردىڭ تيىمدىلىگىن ارتتىرادى. ويتكەنى باسقارۋشىلىق شەشىمدەر قابىلداۋدىڭ تەك ءبىر عانا دەڭگەيى بولادى.

ەسكە سالساق، بۇعان دەيىن رۋسلان دالەنوۆ پرەزيدەنتتىڭ كادرلىق رەزەرۆى قۇرامىمەن كەزدەسۋىندە باسقارۋشى كەڭەستىڭ قۇرىلاتىنىن جاريالاپ، سونىمەن قاتار كادرلار رەزەرۆ وكىلىن وسى كەڭەستىڭ قۇرامىنا قوسۋ تۋرالى وي ايتقان ەدى.

سوڭعى جاڭالىقتار

ۇقساس جاڭالىقتار