قوعام • 25 قىركۇيەك، 2020

جىرىمەن جىگەر بەرىپ جەتەلىگە

10 رەت كورسەتىلدى

ادامدى العا سۇيرەيتىن ومىرگە دەگەن شەكسىز قۇشتارلىق ەكەن. جالاۋلى جاسىل دۇنيەنىڭ ءبىر بولشەگى بولىپ جۇرسەم دەگەن ىڭكارلىك قوس قاناتىنان دەمەپ، ارمانداي الىس كۇندەردىڭ كوكجيەگىنە جەتەلەپ كەلەدى.

 

اياۋدى بىلمەس قاتال تاعدىر قىرىنا العالى تۇپ-تۋرا 37 جىل. وسىنشاما ۋاقىت بويى قارعا ادىم جەر مۇڭ بولىپ، بويىنا كوزىن اشقالى جۇققان دەرتپەن تىنىمسىز الىسىپ كەلەدى. بار مۇشەسى ساۋ بولعانىمەن، ومىرتقاسىنا زاقىم كەلگەن. تۋا ءبىتتى مۇگەدەك بولۋى دا سودان. ءاليا تابيعاتىنان جىگەرلى، قايسار قىز. ەشكىمگە الاقان جا­يىپ، جايىن ايتىپ كورمەپتى. قايتا وزگەگە كومەكتەسسەم دەپ ۇمتىلىپ تۇرادى.

ءبىر ەمەس، بىرنەشە ماماندىعى بار. سونىڭ ىشىندە قاپىسىز مەڭگەرگەنى – پسيحولوگيا. ءوزىنىڭ ايتۋىنشا، الدىمەن ءوزى ءۇشىن تىلسىم سىرلى عىلىمدى تولا­يىم مەڭگەرۋگە تىرىسقان. قايدان دەرىڭىز بار ما، قاپەلىمدە، اسىرەسە جالعىزدىقتىڭ قارا شىمىلدىعى تۇماشالاپ، نەبىر ويلار قاۋمالاعاندا، جانىڭا جىگەر ءبىتىرۋ ءۇشىن مۇنى دا بىلگەن ءجون. ايتپەسە ءسال عانا نارسەنى قيامەت-قايىم ساناپ، ومىردەن ءتۇڭىلىپ جاتقاندار قانشاما جاستار تۋرالى جامان حابار ەستىگەندە جانى جۇدەپ قالاتىنى بار. قالاي عانا مىناۋ ادەمى الەمدى قيىپ كەتتى ەكەن، ون ەكى مۇشەسى ساۋ جاننىڭ قانداي قيىندىق بولسا دا جەڭىپ شىعۋىنا بولاتىن ەدى عوي.

اۋەل باستا اتا-اناسى ءاليا اپاسىنداي قايسار دا باتىر، ەرجۇرەك تە باتىل بولسىن دەگەن نيەتپەن ازان شاقىرىپ وسىنداي ات قويعان. بۇگىنگىنىڭ ءالياسى دا تىرشىلىكتىڭ اقباس تولقىندارىمەن الىسقان، دەرت مايدانىمەن جاعالاسقان ەرجۇرەك قىزدىڭ ءبىرى. ەرتەرەكتە دارىگەرلەر مەديتسيناسى مەيلىنشە دامىعان شەتەلدەردە وتا جاساسا، ەمدەلىپ شىعۋ مۇمكىندىگى بار ەكەنىن ايتقان بولاتىن. بىراق وعان قاراجات قايدا؟ «باسقا تۇسكەن باسپاقشىل» دەمەكشى، ءوز جانىن ءوزى ەمدەپ، ءوز دەرتىمەن ءوزى الىسىپ كەلەدى.

– بالا كەزىمدە قۇربىلارىممەن بىرگە قۇلدىراڭداي جۇگىرىپ، اسىر سالىپ ويناعىم كەلەتىن. سونداي ءبىر ساتتەردە قاز باسىپ جۇرە المايتىنىمدى ويلاعاندا كوزىمنىڭ الدى ەرىكسىز كىرەۋكەلەنىپ كەتەدى. ىلە بويىمدى جيناپ الا قويامىن، – دەيدى ءبىرىنشى توپتاعى مۇگەدەك ءاليا حاسەنوۆا، – بولاشاق جايلى بەرىلە ويلاعاندا ساناعا اششىلى-تۇششىلى نەبىر ويلار شۇپىلدەيدى. سوسىن جاتپاي-تۇرماي ەۋروپالىق مەكتەپتى پسيحولوگيالىق مامان­دىعى بويىنشا قاشىقتان وقىپ ءبىتىردىم. وسى ءبىر قادامىم ءوز ومىرىمە ۇلكەن وزگەرىس اكەلدى. بەلسەندىلىك، بولاشاققا دەگەن سەنىم پايدا بولدى. بوركەمىك ويلارعا بەرىلىپ، جانىم جۇدەي باستاسا، جاقسى ويدىڭ جالىنا جارماسۋعا ادەتتەندىم.

قۇربىلارى ءتارىزدى مەكتەپكە بارىپ ءبىلىم الۋعا مۇمكىندىگى بولماسا دا، وقۋىن ۇزدىك اتتەستاتپەن اياقتاعان. اياۋلى قىزىنىڭ جاعدايىنا الاڭداعان اناسى ءتيىستى مەكەمەلەردىڭ تابالدىرىعىن توزدىرىپ ءجۇرىپ ۇيدەن وقۋىنا جاعداي جاساعان ەكەن. ورتا مەكتەپتى بىتىرگەن سوڭ نۇر-سۇلتان قالاسىنداعى «تۇران» كوللەدجىنە ءتۇسىپ، ەكونوميست ماماندىعىن مەڭگەرگەن.

قايسار قىزدىڭ كوكىرەگىندەگى سان الۋان سەزىم اق قاعازدىڭ بەتىندە جىر بولىپ ورىلەدى. وقىعان جانعا وي سالار كوركەم اڭگىمە دە، جۇرەك قىلىن شەرتە­تىن نازىك نوۆەللا دا جازۋعا ما­شىق­تانعان. سوڭعى جىلدارى اۋدان­دىق، وبلىستىق «التىن قالام» بايقاۋلارىنا قاتىسىپ، جۇلدەلى ورىندارعا يە بولىپ ءجۇر. 2012 جىلى بار ەڭبەگىن جيناقتاپ، العاشقى كىتابىن شىعارعان. قازىر ەكىنشى جيناعىن توپتاۋ ۇستىندە. نەگىزگى تاقىرىپ – ومىرگە دەگەن سۇيىسپەنشىلىك، تاعدىردىڭ سالعان ىسىنە تاستاي بەرىك بولۋ. كەيىپكەرلەرى دە ءوزى ءتارىزدى جىگەرى جالىن اتقان جاندار. زەر سالىپ وقىساڭىز، كوكىرەگىڭدى قولامتانىڭ شوعىن­داي قىزدىراتىن كاۋسار سەزىم الپىس ەكى تامىرداعى قىزىل قاندى قىزدىرادى.

بۇگىندە ءاليانىڭ اقمول اۋىلىندا كوسمەتيكا جانە تۇرمىستىق حيميا بۇيىمدارىن ساتاتىن جەكە دۇكەنى بار. كۇنكورىستىڭ قامى دا. وعان قوسا اۋداندىق ارداگەرلەر كەڭەسى توراعاسىنىڭ ورىنباسارى بولسا، جاستار رەسۋرستىق ورتالىعىندا مامان بولىپ جۇمىس ىستەيدى. بارىنە ۋاقىت تابادى، كۇش-قۋاتى قاپتال جەتىپ جاتىر. جانىنداعى ادامعا جاقسىلىق جاساسا، تال بويىنا ايرىقشا قۋات بىتكەندەي اسەر الادى. مۇم­كىن­دىگى شەكتەۋلى ازامات امان­گەلدى قاپانوۆ جەتەكشىلىك ەتە­تىن «بولاشاق» قوعامدىق بىر­لەس­تىگىندە كەدەرگىسىز ورتا قۇرۋ، مۇ­گە­دەكتەردىڭ قۇقىعىن قور­عاۋ­مەن اينالىسادى.

وسىنشاما ءىس تىندىرىپ جۇر­گەن قارشاداي قىزدىڭ قاي­را­تىنا قالاي سۇيسىنبەسسىڭ. ءومىر­دىڭ ءوزى كۇرەس، سول كۇرەستە ءداتى مىقتىلار عانا سىناققا شىدايدى دەيدى كە­يىپ­­كەرىمىزدىڭ ءوزى. بالكىم، سولاي دا شى­عار.

 

اقمولا وبلىسى،

تسەلينوگراد اۋدانى

سوڭعى جاڭالىقتار

ۇقساس جاڭالىقتار