اقبۇلقاقتىڭ وڭ جاعىن جاعالاي جاتقان قىزىل قۇمىرسقانىڭ يلەۋلەرىندە ەسەپ جوق. وركەش-وركەش بولىپ كەتە بەرەدى. بىرىنەن-ءبىرى بيىك. ەڭ بيىگى مولشەرمەن 1 مەتردەن استام. مۇنداي الىپ يلەۋلەر كوپ جەرلەردە كەزدەسپەيتىن شىعار.
يلەۋدە قۇمىرسقالاردىڭ تىرشىلىگى قايناپ جاتىر. ءبىرى جاپىراقتىڭ قيقىمىن ۇياسىنا سۇيرەپ كىرسە, ەندى ءبىرى قاراۋىلدا تۇرعانداي كورىندى. نەتكەن ۇيىمشىل دەرسىز. مىڭ-ميلليون قۇمىرسقانىڭ ىشىنەن ءبىر-بىرىمەن تىستەسىپ جاتقانىن بايقامايسىز. كەرىسىنشە ارقالاعاندارىن دەمەسىپ جىبەرىپ وتىرادى. تابان استىنا ۇڭىلسەڭىز, يلەۋلەردىڭ اراسىن جالعاپ جاتقان سۇرلەۋلەرىن كورەسىز. سۇرلەۋدەن شىقپاي قاز-قاتار ءتىزىلىپ بارا جاتقان جاندىكتەردىڭ اراسىندا ەرەجە دە, ءتارتىپ تە بار. تيتىمدەي جاندىكتىڭ تاۋداي تىرلىگىنە, باۋداي بىرلىگىنە قاراپ تاڭعالاسىڭ. (كەيدە قۇمىرسقا قۇرلى جوقپىز با دەپ ويلايسىڭ).
الىپ يلەۋلەردىڭ باستالار تۇسىنا «مۋراۆينىي گورودوك» دەپ اعاشقا ادەمىلەپ ويىپ جازىپتى. ورىسشالاپ ەمەس, قازاقشالاپ «قۇمىرىسقالار قالاشىعى» دەسە ادەمى ەستىلەر مە ەدى؟!
ءىش جاعىنداعى تاقتايشالارعا وسى جەردى مەكەندەيتىن قىزىل قۇمىرسقالار تۋرالى قىزىقتى دەرەكتەردى ءتىزىپتى: قۇمىرسقالار توبىندا اتالىق, انالىق «جۇمىسشى» جانە «جاۋىنگەر» بولادى ەكەن. يلەۋلەرىن وسىمدىك ساباقتارى مەن قۋراعان جاپىراقتاردان كوتەرەدى. قۇمىرسقا دەنەسىندە 70-تەن استام ميكروەلەمەنت, 20-دان استام امين قىشقىلى, ۆيتاميندەر بار. قىتايدا قۇمىرسقالاردان دارىلىك پرەپاراتتار دايىندالادى. دارىلەرى بۋىن اۋرۋلارىنا, جاراقاتقا وتە پايدالى. ءتىپتى كەيبىر ەلدەر قۇمىرسقانى تاعام رەتىندە دە پايدالاناتىن كورىنەدى.
مىنە, بەرەلدىڭ بۇككەن سىرى كوپ. ەگەر جولىڭىز التايعا تۇسسە, قۇمىرسقالار قالاشىعىنا دا سوعا سالىڭىز.
شىعىس قازاقستان وبلىسى
