ايماقتار • 24 قىركۇيەك، 2020

جامبىل وبلىسىندا تۋريزم سالاسى قايتسە داميدى؟

30 رەت كورسەتىلدى

اۋليەاتا ءوڭىرىنىڭ تاريحي جەر ەكەنى ءجيى ايتىلادى. بۇدان بولەك، وڭىردە تابيعاتتىڭ ءتۇرلى كەرەمەتتەرى دە بار. الايدا، ايماقتا تۋريزم سالاسىن دامىتۋ، تۋريستەردى كوپتەپ تارتۋ ماسەلەسى ءجيى كوتەرىلگەنىمەن، ناتيجەسى شامالى بولىپ تۇر. ەندى جامبىل وبلىسىندا تۋريزم سالاسى قايتسە داميدى؟ بۇل تۋرالى ماماندار نە دەيدى؟

وسى ورايدا، وڭىردە تۋريزم يندۋسترياسىن دامىتۋ، سالانىڭ الەۋەتىن ارتتىرۋ ماقساتىندا جامبىل وبلىسى اكىمىنىڭ ورىنباسارى الماس ماديەۆ تۋريستىك كومپانيالاردىڭ جانە قوناقۇيلەردىڭ باسشىلارىمەن كەڭەس وتكىزدى. اكىمنىڭ ورىنباسارى باسقوسۋدىڭ باستى ماقساتى – جۇمىس ورىندارىن ساقتاپ، ءىستى ارى قاراي قارقىندى جالعاستىرۋ ەكەنىن اتاپ ءوتتى. «ارينە، كارانتين شەكتەۋلەرىمەن ەشكىم ۇيىنەن شىعا الماي، تۋريزم سالاسىنا ەداۋىر قيىندىقتار اكەلگەنى بەلگىلى. ەندى جۇمىستى جانداندىرىپ، بار مۇمكىندىكتى پايدالانۋىمىز كەرەك. جامبىل وبلىسىنىڭ تۋريزمدە پوتەنتسيالى مول. وڭىرىمىزدە 187 قوناقۇي، 7 شيپاجاي بار»، دەدى ول. كەڭەسكە قاتىسقان كاسىپكەرلەر اسىرەسە بالالار ءتۋريزمىن ىلگەرىلەتۋ كەرەكتىگىن ايتتى. سونداي-اق، كەزدەسۋدە «كوكساي» ەتنواۋىلىنىڭ جوباسى دا تانىستىرىلدى. الداعى ۋاقىتتاردا جۋالى اۋدانىنداعى «كوكساي» شاتقالىنان دەمالىس ورىنى اشىلۋى مۇمكىن. دەمالىس ورىنىن اشقالى وتىرعان قوجالىق وكىلى نۇرمۇحاممەد يساكوۆ بۇگىندە قوجالىقتىڭ جەكە ينۆەستورلىق ەسەبىنەن بۇل جەرگە كيىز ۇيلەر ورناتىلعانىن جەتكىزدى. ونىڭ ايتۋىنشا، بىرقاتار جۇمىستار جۇرگىزىلگەن. «كارانتين شەكتەۋلەرى الىنعان ۋاقىتتاردا دەمالۋعا ايىنا 2 500 ادام كەلدى. ەگەر جوبا تولىعىمەن جۇزەگە اسقان جاعدايدا 80-100 ادامدى جۇمىسپەن قامتۋعا بولادى. ول جەردە 2 قوناقۇي مەن سپورت كەشەنى جانە ساياجايلار بولادى»، دەيدى ول.

جالپى، «كوكساي» شاتقالىنان اشىلاتىن دەمالىس ورىنى جىلدىڭ ءتورت مەزگىلىندە دە جۇمىس ىستەۋگە دايىن. مۇندا جاز ايلارىندا باسسەيندەرمەن قاتار، قىس مەزگىلىندە شاڭعى تەبۋ جانە سىرعاناق الاڭى دا بولادى. كەلۋشىلەر ءۇشىن جاياۋ سەرۋەنمەن قوسا، اتپەن سەرۋەن جاساۋ دا ۇيىمداستىرىلادى. نۇرمۇحاممەد يساكوۆ ءوز سوزىندە ەندى بيلىك تاراپىنان 18 شاقىرىم جولعا اسفالت توسەلىپ، گاز تارتىلىپ بەرسە دەگەن ويىن جەتكىزدى. ونىڭ بۇل ماسەلەسى نازارعا الىناتىن بولدى.

سوڭعى جاڭالىقتار

ۇقساس جاڭالىقتار