تاعايىنداۋ • 23 قىركۇيەك، 2020

قاراعاندى قالاسىنىڭ جاڭا اكىمى تاعايىندالدى

41 رەت كورسەتىلدى

ەرماعانبەت بولەكپاەۆ قاراعاندى قالاسىنىڭ اكىمى قىزمەتىنە تاعايىندالدى. قاراعاندى قالالىق ءماسليحاتىنىڭ دەپۋتاتتارىمەن كەلىسىلگەننەن كەيىن وبلىس ورتالىعىنىڭ جاڭا باسشىسىن جەڭىس قاسىمبەك جۇرتشىلىققا تانىستىردى، دەپ حابارلايدى Egemen.kz وبلىس اكىمدىگىنە سىلتەمە جاساپ.

"ەرماعانبەت قابدول ۇلىنىڭ جۇمىس تاجىريبەسى مول. ول ءوز جوبالارى مەن باستامالارىن لايىقتى جالعاستىراتىنىنا سەنىمدىمىن. مەن نۇرلان ەرىكباي ۇلىنا اتقارعان ۇلكەن جۇمىسى ءۇشىن العىسىمدى بىلدىرەمىن. ونىڭ قالادا جۇمىس ىستەگەن كەزەڭىندە كوپتەگەن جۇيەلى ماسەلەلەر شەشىلدى. ولاردىڭ كوپشىلىگىن ول ءوزى باستاپ، ءوزى شەشتى. اۋلالاردا، قالاداعى ۇيلەردىڭ قاسبەتتەرىندە كوپ نارسە جاسالدى، بىراق ءالى دە كوپ جۇمىس جاساۋ كەرەك"، - دەدى جەڭىس قاسىمبەك.

قاراعاندى وبلىسىنىڭ اكىمى جاڭا قالا باسشىسىنىڭ الدىنا كوممۋنالدىق سيپاتتاعى جانە قوعامدىق كولىك ماسەلەلەرىن شەشۋ سىندى بىرقاتار مىندەت قويدى.

ءوز كەزەگىندە ەرماعانبەت بولەكپاەۆ وعان سەنىم ارتقانى ءۇشىن العىسىن ءبىلدىردى.

"وسى كەزەڭدە كوپ جۇمىس اتقارىلدى. الدا ءالى دە اۋقىمدى جۇمىس كۇتىپ تۇر. سىزدەرمەن بىرگە العا قويىلعان مىندەتتەردى ورىندايتىنىمىزدى ايتىپ، سەندىرگىم كەلەدى"، - دەپ اتاپ ءوتتى ول.

ەرماعانبەت بولەكپاەۆ 1975 جىلى 2 قىركۇيەكتە قاراعاندى وبلىسى شەت اۋدانى وسپەن اۋىلىندا دۇنيەگە كەلگەن. 1996 جىلى ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ەكونوميكا فاكۋلتەتىن بىتىرگەن.

ەڭبەك جولىن 1996 جىلى «كازكوممەرتسبانك» ااق تەمىرتاۋ فيليالىندا ەكونوميست قىزمەتىنەن باستاعان. 1997 جىلدان 1998 جىلعا دەيىن استاناداعى «بيزنەس-ينفورم» يكو وكىلدىگىنىڭ ديرەكتورى قىزمەتىن اتقاردى. 1998 جىلدىڭ قاراشا ايىندا يندۋستريا، ەنەرگەتيكا جانە ساۋدا مينيسترلىگىندە ەكسپورتتىق باقىلاۋ جانە ليتسەنزيالاۋ دەپارتامەنتىنىڭ باس مامانى لاۋازىمىندا جۇمىس ىستەي باستادى. 2002 جىلى وسى ۆەدومستۆو باستىعىنىڭ ورىنباسارى بولدى.

2006 جىلى پاۆلودار وبلىسى اكىمى اپپاراتى باسشىسىنىڭ ورىنباسارى، 2006 جىلدان 2008 جىلعا دەيىن پاۆلودار وبلىسى پاۆلودار اۋدانىنىڭ اكىمى بولدى.

2008 جىلدان 2009 جىلعا دەيىن پاۆلودار وبلىسىنىڭ كاسىپكەرلىك جانە ونەركاسىپ باسقارماسىن باسقاردى.

قر مەملەكەتتىك قىزمەت ىستەرى اگەنتتىگىنىڭ قاراعاندى، وڭتۇستىك قازاقستان وبلىستارى جانە نۇر - سۇلتان قالاسى بويىنشا اۋماقتىق باسقارماسىنىڭ باستىعى – تارتىپتىك كەڭەسىنىڭ توراعاسى لاۋازىمىن اتقارعان.

2013 جىلدان 2018 جىلعا دەيىن نۇر-سۇلتانداعى «سارىارقا»، «الماتى» جانە «ەسىل» اۋداندارىنىڭ اكىمى بولدى.

2018 جىلى قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك ينسپەكتورى بولىپ تاعايىندالدى.

2018 جىلعى قاراشادان باستاپ قازىرگى تاڭعا دەيىن قاراعاندى وبلىسى اكىمىنىڭ ورىنباسارى قىزمەتىن اتقاردى.

«قۇرمەت» وردەنىمەن جانە «ەرەڭ ەڭبەگى ءۇشىن» مەدالىمەن ماراپاتتالعان.

ايتا كەتەيىك، قاراعاندى اكىمى نۇرلان اۋباكىروۆ باسقا جۇمىسقا اۋىسۋىنا بايلانىستى قىزمەتىنەن بوساتىلدى.

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار