قوعام • 22 قىركۇيەك، 2020

قورعانىس مينيسترلىگى اسكەرگە يننوۆاتسيالاردى بەلسەندى ەنگىزۋ قاجەتتىلىگىن اتاپ ءوتتى

14 رەت كورسەتىلدى

قورعانىس مينيسترلىگىندە قارۋلى كۇشتەردەگى وزەكتى ماسەلەلەردى كوتەرگەن اپپاراتتىق كەڭەس ءوتتى، دەپ حابارلايدى Egemen.kz.

الداعى اپتانىڭ باستى ءىس-شاراسى "الداسپان-2020" ءىرى اۋقىمدى جەدەل-تاكتيكالىق كوماندالىق-شتابتىق وقۋ-جاتتىعۋدىڭ قورىتىندى كەزەڭى بولۋعا ءتيىس. قورعانىس ءمينيسترى باس قولباسشىلاردىڭ نازارىن قاۋىپسىزدىك شارالارىن ساقتاۋعا جانە وقۋ-جاتتىعۋ بارىسىندا بارلىق وقۋ-جاۋىنگەرلىك مىندەتتەردى ساپالى ورىنداۋعا اۋداردى.

اپپارات كەڭەستەگى نەگىزگى ماسەلەنىڭ ءبىرى اسكەرلەردىڭ تىرشىلىك ارەكەتىنىڭ نەگىزدەرىنە كەدەرگى كەلتىرۋى مۇمكىن تۇيىتكىلدەر بولدى.

باس قولباسشىلاردىڭ بايانداماسى بويىنشا كازارمالار مەن قازاندىقتاردىڭ جىلىتۋ ماۋسىمىنا دايىندىق ماسەلەسى شۇعىل شەشۋدى تالاپ ەتەدى. بۇل اۋا رايىنىڭ سالقىنداۋىنا بايلانىستى قاجەت بولىپ وتىر. جەرگىلىكتى جەرلەردەگى اقپارات بويىنشا، مەرزىمدەردى سوزۋدىڭ نەگىزگى سەبەبى مەردىگەرلىك ۇيىمداردىڭ باياۋ جۇمىس ىستەۋىندە ەكەندىگىن ايتا كەتكەن ءجون. بىراق قورعانىس ۆەدومستۆوسى باسشىسىنىڭ بۇرىن بەرگەن نۇسقاۋلارىن ەسكەرە وتىرىپ، بارلىق كۇش-جىگەر قارۋلى كۇشتەردىڭ ينفراقۇرىلىمىن قىسقى كەزەڭگە ساپالى جانە دەر كەزىندە دايىنداۋعا باعىتتالۋى ءتيىس.

قورعانىس ءمينيسترى باس قولباسشىلارعا جەرگىلىكتى جەرلەردەگى اكىمدىكتەرمەن قىسقا دايىندىق بويىنشا ءوزارا ءىس-قيمىل جاساۋ، سونداي-اق جوندەۋ-قالپىنا كەلتىرۋ بولىمشەلەرىنىڭ وسى قىزمەتكە قاتىسۋ مۇمكىندىگىن پىسىقتاۋعا تاپسىرما بەردى. قاجەت بولعان جاعدايدا تالاپ-ارىز جۇمىسىن ۇيىمداستىرۋ ماسەلەسى دە ءسوز بولدى. ۆەدومستۆو باسشىسى بۇل جۇمىستاردى بارلىق مۇددەلى ۇيىمدار مەن مەكەمەلەردى تارتا وتىرىپ، بىرلەسىپ جۇرگىزۋ كەرەكتىگىن اتاپ ءوتتى.

قورعانىس ءمينيسترى قارۋ-جاراق پەن اسكەري تەحنيكانىڭ جاڭا تۇرلەرىن يگەرۋدى ۇيىمداستىرۋ، ماتەريالدىق ءبولىم جەكە قۇرامىنىڭ ءبىلىمى مەن ىسكەرلىگىن جەتىلدىرۋ قاجەتتىگىنە باسا نازار اۋداردى.

بۇل ءۇشىن قارۋ-جاراق پەن اسكەري تەحنيكا ۇلگىلەرىن، اسىرەسە قارۋلانۋعا جاڭادان كەلىپ تۇسەتىن ۇلگىلەردى پايدالانۋدىڭ ەسەبىن جۇرگىزۋ، ولاردىڭ وڭ جانە تەرىس جاقتارىن انىقتاۋ، زاۋىتتىق كەمشىلىكتەردى جويۋ جونىندە ۇسىنىستار دايىنداۋ قاجەت.

اۋە كەمەلەرى مەن تەڭىز كەمەلەرىنىڭ وتاندىق ءوندىرىسىن دامىتۋ پەرسپەكتيۆالارى بويىنشا اۋە قورعانىسى كۇشتەرى مەن اسكەري-تەڭىز كۇشتەرىنىڭ باس قولباسشىلارى يندۋستريا جانە ينفراقۇرىلىمدىق دامۋ مينيسترلىگىن قارۋلى كۇشتەردىڭ وسى تەحنيكاعا قاجەتتىلىكتەرى جانە ونىڭ قاجەتتى سيپاتتامالارى تۋرالى حاباردار ەتۋگە نۇسقاۋ الدى.

كەڭەستە قورعانىس ۆەدومستۆوسىنىڭ باسشىسى سونداي-اق اسكەرلەردىڭ تىنىس-تىرشىلىگىن ۇيىمداستىرۋدا يننوۆاتسيالىق تاسىلدەردىڭ جەتكىلىكسىز ەنگىزىلگەنىن اتاپ ءوتتى. ماسەلەن، ماۋسىم ايىندا اسكەرلەرگە جاڭا وقۋ مودۋلدەرى مەن سيتۋاتسيالىق كەيستەر ازىرلەنىپ، ەنگىزىلدى. ولاردىڭ مىندەتى جالپى ءبىلىم بەرۋ دەڭگەيىن ارتتىرۋ، سونداي-اق جەكە قۇرامدى ساۋاتتى ارەكەت ەتۋگە، كۇردەلى جاعدايلاردا نەعۇرلىم ورىندى شەشىم قابىلداۋعا ۇيرەتۋ بولىپ تابىلادى. الايدا، وسى ۋاقىتقا دەيىن بىرقاتار اسكەري بولىمدەر بۇل ازىرلەمەلەردى ءوز دەڭگەيىندە قولدانا الماي وتىر. گەنەرال-لەيتەنانت نۇرلان ەرمەكباەۆ اسكەري قىزمەتشىلەردى وقىتۋدىڭ جاڭا نىساندارىن ەنگىزۋ جونىندەگى تاپسىرمالاردى ورىنداۋ ءۇشىن ەكى اپتا مەرزىم بەردى.

بۇدان بولەك، قورعانىس مينيسترلىگىنىڭ قۇرىلىمدىق بولىمشەلەرىنىڭ مەملەكەتتىك قىزمەتتەر كورسەتۋىنىڭ جەكەلەگەن ماسەلەلەرى تولىق شەشىلگەن جوق. اتاپ ايتقاندا، وسى ۋاقىتقا دەيىن اسكەري قىزمەتشىلەرگە تۇرعىن ۇيگە مۇقتاجدار ەسەبىنە قويۋ ءۇشىن انىقتامالار ەلەكتروندىق ۇكىمەت پورتالىندا وسىنداي قىزمەتتىڭ بولۋىنا قاراماستان قاعاز نىسانىندا بەرىلەدى. بۇل قوسىمشا قاعازباستىلىققا اكەلىپ قانا قويماي، سىبايلاس جەمقورلىق قۇقىق بۇزۋشىلىقتارعا العىشارتتار جاسايدى. مۇنىڭ سەبەپتەرى-مالىمەتتەر بازاسى مەن باعدارلامالىق جاساقتامانى قالىپتاستىرۋداعى كەمشىلىكتەر بولىپ تابىلادى. اسكەري ۆەدومستۆو باسشىسى اتالعان قىزمەتتى تسيفرلىق فورماتقا اۋىستىرۋ مۇمكىندىگىن قامتاماسىز ەتۋدى تاپسىردى.

قورعانىس ءمينيسترى بارلىق تالاپتاردىڭ بەلگىلەنگەن مەرزىمدە ورىندالۋىنا قاتاڭ نۇسقاۋ بەردى. "تاپسىرمالار جەدەل جانە ءدال ورىندالۋى كەرەك. ەگەر بىرەۋ ونى جۇزەگە اسىرا الماسا، وندا بۇل لاۋازىمدا وعان ورىن جوق"،-دەپ ءوز ءسوزىن تۇيىندەدى قورعانىس ۆەدومستۆوسىنىڭ باسشىسى.

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار