ايماقتار • 22 قىركۇيەك، 2020

قوستانايدا ۋچاسكەلىك پوليتسيا پۋنكتى اشىلدى

14 رەت كورسەتىلدى

№15 ۋچاسكەلىك پوليتسيا پۋنكتى قوستاناي قالاسىندا جاڭا بوي كوتەرگەن "يۋبيلەينىي" جانە "التىن ارمان" شاعىن اۋداندارىنا قىزمەت كورسەتەتىن بولادى. جاڭا بەكەتكە ورناتىلعان ساپالى بەينەباقىلاۋ جۇيەسى قالالىق پب-نىڭ جەدەل باسقارۋ ورتالىعى ارقىلى باسقارىلادى، دەپ حابارلايدى Egemen.kz

تاياۋدا عانا قازاقستان حالقىنا ارناعان جولداۋىندا مەملەكەت باسشىسى: "بەينەباقىلاۋ جۇيەسىن دامىتۋ جونىندە كوپ ايتىلادى. بىراق سوعان قاراماستان قۇقىق قورعاۋ ورگاندارى كوبىنەسە وزدەرىنىڭ عيماراتتارىندا قۇرىلعىسىز وتىرادى. تۇزەۋ مەكەمەلەرىنە جانە پوليتسيانىڭ قىزمەتتىك عيماراتتارىنا جاپپاي بەينەباقىلاۋ ورناتۋدى تاپسىرامىن"، دەگەن ەدى.

قوستانايلىق پوليتسەيلەر كوپ ۇزاماي-اق وسى تالاپ ۇدەسىنەن شىعىپ، "قاۋىپسىز اۋلا" جوباسىن جۇزەگە اسىرۋدى قولعا الدى. ماسەلەن، جاڭا اشىلعان پوليتسيا پۋنكتى قىزمەت ەتەتىن ەكى شاعىن اۋدانداعى تۇرعىن ءۇي اۋلالارىنا 20 بەينەباقىلاۋ كامەراسى ورناتىلدى. وسىلايشا، ۋچاسكەلىك ينسپەكتورلار وزدەرىنە مىندەتتەلگەن اۋماقتىڭ قاۋىپسىزدىگىن ءوز قىزمەت ورىندارىندا وتىرىپ-اق باقىلايتىن مۇمكىندىككە يە بولىپ وتىر.

پوليتسيا پۋنكتى بيزنەس وكىلدەرىنىڭ قولداۋىمەن اشىلىپ وتىرعانىن ايتا كەتۋ كەرەك. قوستانايداعى "بك-ستروي"  قۇرىلىس كومپانياسىنىڭ باسشىسى يگور كيم ءوزى سالعان تۇرعىن ءۇيدىڭ ءبىرىنشى قاباتىنان ۋچاسكەلىك پوليتسەيلەرگە اۋدانى 60 شارشى مەترلىك ەكى بولمەلى پاتەر بەرىپ وتىر. ال وسى عيماراتتا ورنالاسقان ۋچاسكەلىك پوليتسيا پۋنكتىنە كىرەتىن جەكە ءدالىز سالىنىپ، ءۇش جۇمىس كابينەتىنە ينسپەكتورلارعا قاجەتتى كومپيۋتەرلىك تەحنيكا قويىلىپتى.

پۋنكتتىڭ اشىلۋ راسىمىنە قر ءىىم اكىمشىلىك پوليتسيا كوميتەتىنىڭ توراعاسى مۇرات بايمۇقاشەۆ قاتىسىپ، الەۋمەتتىك جاۋاپكەرشىلىكتىڭ جارقىن ۇلگىسىن كورسەتە بىلگەن دەمەۋشى كومپانيانىڭ باسشىسىنا ءمينيستردىڭ  العىس حات تابىس ەتتى.

- پرەزيدەنت جولداۋىندا ىشكى ىستەر ورگاندارى جۇيەسىن رەفورمالاۋداعى باستى ءرول ۋچاسكەلىك پوليتسيا قىزمەتكەرلەرىنە جۇكتەلگەنى اتاپ ءوتىلدى. ەڭ باستىسى، پوليتسيا قول جەتىمدى بولۋى كەرەك جانە حالىقتىڭ قاۋىپسىزدىگىن ءتيىمدى قامتاماسىز ەتۋى كەرەك. قوستانايدا ىشكى ىستەر ورگاندارىن رەفورمالاۋ اياسىندا ەلىمىزدە العاش رەت وسىنداي زاماناۋي ۋچاسكەلىك پوليتسيا پۋنكتى اشىلدى، دەدى قر ءىىم اپك توراعاسى م.بايمۇقاشەۆ.

جاڭا اشىلاعان پوليتسيا پۋنكتىندە ەكى ۋچاسكە ينسپەكتورى مەن ءبىر  يۋۆەنالدى پوليتسيا وكىلى قىزمەت اتقارادى.

- بۇل جاڭا بوي كوتەرگەن 2 شاعىن اۋداندى مەكەندەگەن 14 مىڭنان استام تۇرعىننىڭ قاۋىپسىزدىگىن قورعاۋعا مۇمكىندىك بەرەدى، - دەدى جەرگىلىكتى پوليتسيا قىزمەتىنىڭ باستىعى قۇرمەت ماجىكەنوۆ.

قوستاناي وبلىسى پد باستىعى بەكەت ايماعامبەتوۆتىڭ ايتۋىنشا،  بيىل   وبلىستا ۋچاسكەلىك پوليتسيا ينسپەكتورىنىڭ كومەكشىسى مىندەتىن اتقاراتىن 22 قوسىمشا شتات اشىلعان. سونداي-اق، ۋچاسكەلىك پوليتسيا ينسپەكتورلارى "JAC S3" ماركالى 12 اۆتوكولىكپەن قامتاماسىز ەتىلىپە وتىر.

- 222 ۋچاسكەلىك ينسپەكتور "التەل" ءموبيلدى بايلانىسى بار تەلەفون الدى. بۇل تۇرعىنداردىڭ ۋچاسكەلىك پوليتسيا ينسپەكتورىنا تىكەلەي تەگىن قوڭىراۋ شالۋىنا مۇمكىندىك بەرەدى، دەدى پد باسشىسى.

جالپى، جىل باسىنان بەرى وبلىستىڭ ۋچاسكەلىك پوليتسيا ينسپەكتورلارى 1164 قىلمىستىڭ بەتىن اشىپ، 40 مىڭنان استام اكىمشىلىك قۇقىق بۇزۋشىلىقتى انىقتاعان.

قوستاناي وبلىسى

 

 

سوڭعى جاڭالىقتار

ۇقساس جاڭالىقتار