ايماقتار • 22 قىركۇيەك، 2020

قوستاناي وبلىسىندا 342 مىڭ گەكتار جايىلىم مەملەكەت مەنشىگىنە قايتارىلدى

21 رەت كورسەتىلدى

قوستاناي وبلىسىندا اۋىل شارۋاشىلىعى ماقساتىندا پايدالانۋعا ارنالعان القاپتار عارىشتىق مونيتورينگتەن ءوتتى. پيلوتتىق رەجىمدە جۇرگىزىلگەن مونيتورينگ قورىتىندىسى وبلىس اكىمدىگىندە وتكەن جيىندا تالقىلاندى، دەپ حابارلايدى Egemen.kz.

اۋىل شارۋاشىلىعى جانە جەر قاتىناستارى باسقارماسىنىڭ باسشىسى جانسۇلتان تاۋكەنوۆتىڭ سوزىنشە، وبلىستاعى 4،1 ملن گەكتار جايىلىمنىڭ ۇشتەن بىرىنەن استام بولىگى، ياعني 1،8 ملن گەكتارى پايدالانۋسىز جاتىر. بيىل 342،1 مىڭ گەكتار جايىلىم مەملەكەت مەنشىگىنە قايتارىلعان. بوس جاتقان جەرلەردى قايتارىپ الۋعا باعىتتالعان شارالار ءالى دە جالعاسادى.

- بيىل 900 مىڭ گەكتاردان استام جايىلىمدىق جەر «جايىلىمدار تۋرالى» زاڭ تالاپتارىنا سايكەستەندىرىلىپ، رەتتەلدى. جەر پايدالانۋشىلار بار مالىن اشس-نىڭ (اۋىلشارۋاشىلىق مالدارىن سايكەستەندىرۋ) مالىمەت بازاسىنا ەنگىزىپ، تىركەپ قويدى. بۇل باعىتتا امانگەلدى، جانگەلدى، ناۋىرزىم، قاراسۋ، اۋليەكول اۋداندارى مەن ارقالىق قالاسىندا كوپ شارۋا تىندىرىلدى، دەدى ج.تاۋكەنوۆ.    

مونيتورينگ بارىسىندا 47 جەر پايدالانۋشىنىڭ جالپى كولەمى 27،5 مىڭ گەكتار ەگىستىك جەردى يگەرۋسىز قالدىرعانى انىقتالىپ وتىر.  سونداي-اق، 1603 جەر پايدالانۋشىعا ءتيىستى جالپى اۋماعى 1،649 گەكتار جەرگە قاتىستى "القاپ تاريحى كىتاپشاسى" تولتىرىلماعان.  

- قازىر كوسمومونيتورينگ مالىمەتتەرىنىڭ دۇرىستىعىنا كوز جەتكىزۋ ءۇشىن جەرگىلىكتى جەرلەردەگى القاپتاردى تەكسەرۋ جۇمىستارىن جۇرگىزۋ قاجەت. كەيبىر اۋدانداردا بۇل جۇمىس باستالىپ تا كەتتى. ەگىستىك القاپتارى تۋرالى تۇبەگەيلى مالىمەت 1 قازانعا دەيىن بەلگىلى بولادى. رەسمي مالىمەت تولىق جينالىپ بولعان سوڭ، مونيتورينگ قورىتىندىسى بويىنشا ءتيىستى شارالار قابىلداۋعا تۋرا كەلەدى. سوندىقتان اكىمدەر ءوزى باسقارىپ وتىرعان اۋداندارعا تيەسىلى ەگىستىك القاپتارىنىڭ كولەمىن تاعى ءبىر قاراپ شىقانى ءجون.  سايكەسسىزدىك جويىلسا، مونيتورينگ قورىتىندىسى دا ساپالى بولادى، دەدى باسقارما باسشىسى. 

ج.تاۋكەنوۆ القاپتاردى قوسىمشا تەكسەرۋ جۇمىستارىنىڭ ماڭىزدىلىعىن ناقتى مىسالدار ارقىلى ءتۇسىندىرىپ ءوتتى. ماسەلەن، جىتىقارا اۋدانىندا جۇرگىزىلگەن عارىشتىق مونيتورينگ قورىتىندىسى بويىنشا   6،2 مىڭ ەگىستىكتىڭ پايدالانۋسىز جاتقانى انىقتالعان.  ال القاپتى جەردەن تەكسەرۋ بارىسىندا عارىشتىق مونيتورينگ بوس جاتىر دەپ تانىعان 3،5 مىڭ گەكتارعا كوپجىلدىق ءشوپ، 1،9 مىڭ گەكتارعا بيداي مەن قارا قىشا ەگىلىپ، 0،8 مىڭ گەكتار القاپتىڭ ارنايى وڭدەلىپ، سۇرلەمگە قالدىرىلعانى انىقتالعان. باسقارما باسشىسى كوسمومونيتورينگ مالىمەتتەرىنىڭ دالدىكتەن اۋىتقىپ جاتۋىنىڭ سەبەبى القاپ بەدەرلەرىنىڭ ساپاسىز تسيفرلاندىرۋىنان، جەر پايدالانۋشىلاردىڭ ءار داقىلعا ارنالعان ەگىستىكتى ءدال بەلگىلەپ، القاپ تاريحى كىتاپشاسىنا دۇرىس تىركەپ وتىرماعاندىعىنان بولىپ وتىر دەپ ءتۇسىندىردى.  

جيىن بارىسىندا جەردىڭ پايدالانۋىن باقىلاۋ جانە قورعاۋ باسقارماسى باسشىسىنىڭ مىندەتىن اتقارۋشى قايرات وسپانوۆ ءسوز الىپ، باسقارما ماماندارىنىڭ جىل باسىنان بەرى جالپى اۋماعى 1،1 مىڭ گەكتاردى قامتيتىن 75 تەكسەرىس وتكىزگەنىن جەتكىزدى. ايتۋىنشا، جەر پايدالانۋعا قاتىستى 43 زاڭبۇزۋشىلىق انىقتالىپ، جالپى سوماسى 3،8 ملن تەڭگە كولەمىندەگى ايىپ تۇرىندە 14 قاۋلى تولتىرىلعان.  

- اۋىلشارۋاشىلىق تاۋارىن وندىرۋشىلەردىڭ 90%-ى شاعىن كاسىپكەرلىك سۋبەكتىلەرى بولىپ تابىلادى. سوندىقتان مورتاتوري بويىنشا ولارعا تەكسەرىس جۇرگىزىلگەن جوق، دەدى ق.وسپانوۆ.

قوستاناي وبلىسى

 

 

سوڭعى جاڭالىقتار

ۇقساس جاڭالىقتار