اتالعان باعىتتا اتقارىلىپ جاتقان جۇمىستار تۋرالى ساۋدا جانە ينتەگراتسيا ءمينيسترى ب. سۇلتانوۆ, «اتامەكەن» ۇكپ توراعاسى ا. مىرزاحمەتوۆ باياندادى, جوعارعى سوتتىڭ سۋدياسى ا. تۇكيەۆ پەن تۇتىنۋشىلاردىڭ قۇقىقتارىن قورعاۋ كواليتسياسىنىڭ توراعاسى م. ابەنوۆ تۇسىنىكتەمە بەردى.
2020 جىلدىڭ 8 ايىندا ساۋدا جانە ينتەگراتسيا مينيسترلىگىنىڭ تۇتىنۋشىلاردىڭ قۇقىقتارىن قورعاۋ كوميتەتىنە قىزمەتتەر مەن تاۋارلاردىڭ ساپاسىنا قاتىستى شاعىمدارمەن 8 مىڭنان استام ءوتىنىش كەلىپ ءتۇستى, ولار بويىنشا تۇتىنۋشىلاردىڭ 80%-نىڭ قۇقىقتارى قورعالدى (6 400 ءوتىنىش).
وسى ماۋسىمدا ۇكىمەتتىك ەمەس ۇيىمدار مەن بيزنەستى تارتا وتىرىپ, تۇتىنۋشىلاردىڭ قۇقىقتارىن قورعاۋدىڭ ءبىرتۇتاس جۇيەسىن قۇرۋعا ىقپال ەتەتىن زاڭنامالىق تۇزەتۋلەر قابىلداندى. پرەمەر-مينيستر تۇتىنۋشىلاردىڭ قۇقىقتارىن قورعاۋدىڭ قازاقستاندىق جۇيەسى «تۇتىنۋشى – قوعامدىق بىرلەستىك – مەملەكەت» ءوزارا ءىس-قيمىل جاساۋ بايلانىسى ناقتى قۇرىلعان شەتەلدىك وزىق تاجىريبەنى ەسكەرۋى ءتيىس ەكەنىن اتاپ ءوتتى. بۇل رەتتە ازىق-ت ۇلىك سالاسىنا, مەديتسينالىق قىزمەتتەرگە, تكش, فارماتسەۆتيكالىق تاۋارلارعا, سونداي-اق تۋريزمگە ەرەكشە نازار اۋدارۋ قاجەت.
«ساپاسىنا كەپىلدىك بەرۋگە بولاتىن ونىمدەردى وندىرۋگە, باقىلاۋ ماقساتىنداعى ساتىپ الۋ مەحانيزىمىن پايدالانۋعا, ادال جارناما مەن ماركەتينگكە باعىتتالعان ساياسات جۇرگىزۋ قاجەت», — دەدى ا. مامين.
ۇكىمەت باسشىسى وسى جىلدىڭ سوڭىنا دەيىن تۇتىنۋشىلاردىڭ قۇقىقتارىن قورعاۋ سالاسىندا قوعامدىق ۇيىمدار بىرلەستىگىن قۇرۋدى, سونداي-اق ۇكىمەتتىك ەمەس ۇيىمدار بازاسىندا تۇتىنۋشىلاردىڭ قۇقىقتارىن قورعاۋ جونىندەگى ومبۋدسمەن ينستيتۋتىن ەنگىزۋ ماسەلەسىن پىسىقتاۋدى تاپسىردى.
ۇلتتىق ەكونوميكا, ساۋدا جانە ادىلەت مينيسترلىكتەرىنە نورماتيۆتىك-قۇقىقتىق اكتىلەر جوبالارىنىڭ تۇتىنۋشىلاردىڭ قۇقىقتارىن قورعاۋ تۇرعىسىنان رەتتەۋشىلىك اسەرىنە تالداۋ جۇرگىزۋ بويىنشا مىندەتتى تالاپتى قاراستىرۋ تاپسىرىلدى. بۇعان قوسا, وسى اكتىلەردى ازىرلەۋگە قوعامدىق كەڭەستەردىڭ قۇرامىندا ۇكىمەتتىك ەمەس ۇيىمداردىڭ قاتىسۋىن قامتاماسىز ەتۋ كەرەك.
ساۋدا مينيسترلىگىنە ۇلتتىق ەكونوميكا مينيسترلىگىمەن بىرلەسىپ, مەملەكەتتىك ورگانداردىڭ, جەرگىلىكتى اتقارۋشى ورگاندار مەن كۆازيمەملەكەتتىك ۇيىمداردىڭ تيىمدىلىك كورسەتكىشتەرىنە (KPI) تۇتىنۋشىلار تاراپىنان قاناعاتتانۋ جانە سەنىم دەڭگەيىن باعالاۋدى قوسۋ تاپسىرىلدى.
«اتامەكەن» ۇكپ-عا ەرىكتى ىسكەرلىك تاجىريبە ەرەجەلەرىنىڭ جيىنتىعىن جانە تۇتىنۋشىلاردىڭ مۇددەلەرى مەن قۇقىقتارىن ەسكەرەتىن ۇلگىلىك شارتتاردى قابىلداۋ, سونداي-اق ۇسىنىلاتىن قىزمەتتەر مەن تاۋارلاردىڭ ساپاسىن جاقسارتۋ ءۇشىن بيزنەستى ىنتالاندىرۋ شارالارىن پىسىقتاۋ تاپسىرىلدى.
پرەمەر-مينيستر 2020 جىلعى 1 قاراشاعا دەيىن تۇتىنۋشىلاردىڭ قۇقىقتارىن قورعاۋدىڭ ءبىرتۇتاس جۇيەسىن قۇرۋ جونىندەگى ءىس-شارالار جوسپارىن ازىرلەۋدى تاپسىردى.
