– بۇل – قازاقستاننىڭ سولتۇستىك وبلىستارىنداعى جالعىز فەرما. قازىر بەكىرەنى شەتىنەن ساتىپ تا جاتىرمىز, – دەيدى بەكىرە وسىرۋشىلەر.
شاعىن تسەحتىڭ تۇيىق سۋمەن قامتاماسىز ەتۋ تەحنولوگياسىن پايدالانۋعا مۇمكىندىك بەرەتىن دەربەس سۋ تازارتقىش جۇيەسى بار. بەكىرە باسسەينىندەگى سۋ اۋىستىرىلمايدى, تەك ارنايى سۇزگىنىڭ كومەگىمەن تازارتىلىپ, وعان ۋلتراسۇزگى قوسىلىپ وتىرادى. بالىق وسىرۋشىلەردىڭ ايتۋىنشا, بەكىرە سۋ ساپاسىنا وتە سەزىمتال بالىق ەكەن. تابيعي ورتادا بىرنەشە اي عانا داميتىن بۇل بالىق مۇنداعى باسسەيندە جىل ون ەكى اي بويى ءوسۋىن توقتاتپايدى. باستىسى, سۋ تەمپەراتۋراسىن 20-22 گرادۋستا تۇراقتى ۇستاپ, بەكىرەنى ازىقتان تارىلتپاي, جارىق رەجىمىنىڭ ساقتالۋىن قاداعالاپ, قولايلى جاعداي جاساپ وتىرۋ كەرەك.
– ءبىز الدىمەن رەسەيدىڭ كوپتەگەن بەكىرە فەرماسىن ارالاپ كورىپ, ولاردىڭ تەحنولوگيالارىن زەرتتەپ الدىق. ودان كەيىن عيمارات تاۋىپ, قۇرىلعىلاردى ورناتتىق. شەتەلدەن قىمبات بەكىرە شاباقتارىن اكەلىپ, باسسەينگە جىبەردىك. ءۇش ايدان سوڭ شاباقتار تۇگەلدەي قىرىلىپ قالدى. وتە كۇردەلى كەزەڭدەردى باستان وتكەردىك. بىراق ءۇمىت ۇزبەدىك. بۇل كاسىپكە, ەڭ باستىسى, تاباندىلىق كەرەك. ءبىز, مىنەكي, دايىن ونىمگە قول جەتكىزىپ وتىرمىز. مىنا باسسەيندەگى بەكىرەلەر شامامەن ءبىر توننا بولىپ قالار, – دەدى ۆالەنتين يششەنكو.
كاسىپكەرلەر بەكىرە ازىعىن رەسەيدىڭ بەلگورود قالاسىنان الدىرتادى. بالىق ۇنى, بيداي, سويا بۇرشاعىنىڭ ۇنتاعى, وسىمدىك مايى سياقتى توعىز قوسپادان تۇراتىن بۇل قۇراما ازىق پاندەميادان كەيىن ەكى ەسە قىمباتتاپ كەتكەن. سوعان قاراماستان بالىق فەرمەرلەرى قوستاناي اۋدانىنان 1 گەكتار جەر الىپ, ءوندىرىس كولەمىن ۇلعايتۋدى كوزدەپ وتىر.
قوستاناي وبلىسى
