تەاتر مەرەيتويىنا وراي, قازاقستاننىڭ ەڭبەك سىڭىرگەن قايراتكەرى, وبلىستىق قازاق دراما تەاترىنىڭ جەتەكشى اكتەرى قونىسبەك بەكايداروۆتى ءتول مەرەكەسىمەن قۇتتىقتاپ, وڭىرلىك تەاتردىڭ بۇگىنگى اياق الىسى جايلى سۇرادىق.
– بۇگىندە ءبىزدىڭ تەاتر ۇجىمى تىڭ ىزدەنىس ۇستىندە. ناتيجەسىن حالىق, تەاترىمىزدىڭ تۇراقتى كورەرمەندەرى كورىپ, ءبىلىپ وتىر. تەاتر ساحناسى – كيەلى ورىن. كەيدە سول كيەلى ساحناعا كاسىبي اكتەرلەر جەتىسپەي جاتادى. قازىر ەلورداداعى ونەر ۋنيۆەرسيتەتى, الماتىداعى ت.جۇرگەنوۆ اتىنداعى ونەر ۋنيۆەرسيتەتىنەن بىتىرگەن بالالاردىڭ كوبى وبلىس ورتالىقتارىنا كەلە قويمايدى. شالعاي دەيدى, دەنى الماتى مەن نۇر-سۇلتاندا قالعىسى كەلەدى. ءبىزدىڭ كەزىمىزدە تاجىريبە الۋ ءۇشىن وبلىس ورتالىقتارىنا بارۋعا قۇلشىنىپ تۇراتىنبىز. دەگەنمەن قازىر وبلىستىق قازاق دراما تەاترىندا ەڭبەك ەتىپ جۇرگەن جاستاردىڭ بەتالىسى جامان ەمەس. تىڭ ىزدەنىستەرى كوپ. جەتپەي جاتقان جەرلەرى بولسا, اقىل-كەڭەسىمىزدى بەرىپ وتىرامىز» – دەدى تەاتر ساڭلاعى.
مەرەكە بارىسىندا ساحنا ونەرىنىڭ دامۋىنا ۇلەس قوسىپ جۇرگەن تەاتر قىزمەتكەرلەرى ماراپاتتالدى. كيەلى تەاتر تورىندە تالاي تاعدىرلى رولدەردى سومداپ, كوپشىلىك سۇيىسپەنشىلىگىنە بولەنىپ جۇرگەن ساحنا ساڭلاقتارىمەن قوسا, ادەتتە كورەرمەن بايقاي بەرمەيتىن تەاتر قىزمەتكەرلەرى – كوستيۋمەر, گريمەر, ينجەنەرلەر وبلىس اكىمىنىڭ, مادەنيەت باسقارماسىنىڭ, Nur Otan پارتياسى مەن قازاقستان حالىق اسسامبلەياسىنىڭ ماداق ديپلومدارىمەن, العىس حاتتارىمەن ماراپاتتالىپ, قۇشاقتارى گۇلگە تولدى.
بيىل پاندەمياعا بايلانىستى مادەنيەت ورداسىنىڭ قانشاما جوسپارى ىسكە اسپاي جاتىر. بىراق سوعان قاراماستان, ارتىستەر جازعى ۋاقىتتا تابيعات اياسىنا شىعىپ, ونلاين فورماتتا اباي ولەڭدەرىن, قارا سوزدەرىن, سپەكتاكلدەردىڭ ۇزىندىلەرىن ساحنالادى.
جيىرما جىلدىق مەرەيتويعا وراي تەاتر ءوز مۇراجايىن, شايحانا زالىن اشىپ وتىر. مۇراجاي تورىندە ءىلياس وماروۆتىڭ پورترەتى, قايراتكەردىڭ جۇمىس ورنىنان باستاپ, ونەر ۇجىمىندا ىرگەسى قالانعاننان بەرگى ەڭبەك ەتكەن ازاماتتاردىڭ جەكە زاتتارى, سۋرەتتەر, بەلگىلى تۇلعالار سىيعا تارتقان دۇنيەلەر, ەتنوگرافيالىق زاتتار جانە باسقا دا كوز تارتار دۇنيەلەر قويىلعان. بۇل مۋزەي قاراشاڭىراقتىڭ شەجىرەسىنەن سىر شەرتىپ تۇراتىن تاريحي مۇيىسكە اينالماق.
قوستاناي وبلىسى
