قوعام • 21 قىركۇيەك، 2020

Nur Otan پارتياسى حالىقتى جۇمىسپەن قامتۋ جول كارتاسىن ۇزارتۋدى ۇسىنادى

22 رەت كورسەتىلدى

مەملەكەت باسشىسى قاسىم-جومارت توقاەۆتىڭ تاپسىرماسى بويىنشا حالىقتى جۇمىسپەن قامتۋدى قولداۋ ءۇشىن "جۇمىسپەن قامتۋدىڭ 2020-2021 جىلدارعا ارنالعان جول كارتاسى" باعدارلاماسى ىسكە اسىرىلۋدا. ونىڭ نەگىزگى ماقساتتارى – جۇمىسسىزدىق دەڭگەيىنىڭ وسۋىنە جول بەرمەۋ، قوسىمشا جۇمىس ورىندارىن قۇرۋ جانە ەلدى مەكەندەردىڭ ينفراقۇرىلىمىن دامىتۋ ءۇشىن جاعداي جاساۋ. پارتيالىق كۋراتور، Nur Otan پارتياسى فراكتسياسىنىڭ دەپۋتاتى ارتۋر پلاتونوۆتىڭ پىكىرىنشە، 2021 جىلعا قارجىلاندىرۋدىڭ قىسقارۋ قاۋپى بار، دەپ حابارلايدى Egemen.kz

"قاسىم-جومارت كەمەل ۇلى توقاەۆ مەملەكەت حالقىنا جولداۋىندا "قازىرگى كۇردەلى جاعدايدا ءبىزدىڭ باستى مىندەتىمىز – الەۋمەتتىك-ەكونوميكالىق تۇراقتىلىقتى، جۇمىسپەن قامتۋدى جانە حالىقتىڭ تابىسىن ساقتاۋ" دەپ اتاپ ءوتتى. ونىڭ ەرەكشە باسىمدىق بەرە ايتقان ويىنىڭ ءتۇيىنى – قولداۋ، كومەك، قامقورلىق بولدى. ولار ارا-تۇرا ەمەس، تۇراقتى بولۋى كەرەك. قالاي بولعاندا دا، الەمدەگى جاعداي قالىپقا كەلگەنگە دەيىن جالعاسۋى ءتيىس. ياعني ەلباسى مەن پرەزيدەنت ساياساتىنىڭ باعىتتارىن دامىتا وتىرىپ، الەۋمەتتىك باستامالاردى توقتاتپاي، ورىستەتۋ كەرەك! قازاقستاننىڭ كوپتەگەن دامىعان ەلدەردەن ايىرماشىلىعى، الەۋمەتتىك تولەمدەردى قىسقارتىپ، سالىقتى كوبەيتپەي، كەرىسىنشە، ازاماتتارعا وسى قيىن ۋاقىتتا كومەك كورسەتۋ ءۇشىن بارلىق جاعداي جاساۋعا مۇمكىندىگى بار"، دەپ اتاپ ءوتتى پارتيالىق كۋراتور.

ونىڭ ايتۋىنشا، وسىعان وراي Nur Otan پارتياسى جۇزدەگەن مىڭ قازاقستاندىق پايدالانا الاتىن زەينەتاقى قاراجاتىن مەرزىمىنەن بۇرىن الۋ كەزىندە تابىس سالىعىن الىپ تاستاۋ تۋرالى باستاما كوتەردى.

ءوز كەزەگىندە جۇمىسپەن قامتۋدىڭ جول كارتاسى – پاندەميا كەزىندە ءوزىنىڭ تيىمدىلىگىن دالەلدەگەن حالىقتى قولداۋدىڭ ماڭىزدى شارالارىنىڭ ءبىرى. سونىڭ ارقاسىندا قازىردىڭ وزىندە 177 مىڭنان استام قازاقستاندىق جۇمىسقا ورنالاستىرىلدى. ولاردىڭ اي سايىنعى تابىسى ورتاشا ەسەپپەن 90 مىڭ تەڭگەنى قۇرايدى. جوبامەن قامتىلعانداردىڭ 40%-ى – جۇمىسپەن قامتۋ ورتالىقتارى ارقىلى جۇگىنگەن جاستار. باعدارلاما جاستارعا تابىس تابۋدان باسقا، قازىرگى جاعدايدا ءتىپتى قاجەتتىلىگى ارتاتىن جۇمىس تاجىريبەسىن الۋعا مۇمكىندىك بەرەدى.

"اقمولا وبلىسىنىڭ بۋراباي اۋدانىندا 3-توپتاعى مۇگەدەك دەنيس پريادكو تۇرادى. ول كوللەدجدەگى وقۋىن اسپازشى ماماندىعى بويىنشا اياقتاپ، جول كارتاسى بويىنشا جۇمىسقا ورنالاستى. بۇل مىسال باعدارلامانىڭ قاراپايىم ادامدارعا ومىردە ءوز ورنىن تابۋعا، قابىلەتتەرىن جۇزەگە اسىرۋعا كومەكتەسەتىنىن ايقىن كورسەتەدى. مۇنداي مىسالدار كوپ"، دەدى ارتۋر پلاتونوۆ.

جۇمىسقا ورنالاستىرۋ پروبلەمالارىن شەشۋمەن قاتار، ينفراقۇرىلىمدىق جوبالاردى ىسكە اسىرۋ مۋلتيپليكاتيۆتىك اسەر بەردى.

ء"بىر عانا ەكىباستۇز قالاسىندا 11 كوپقاباتتى ءۇي سالىنادى. بۇل دەگەنىمىز جاقىن ارادا 1،3 مىڭنان استام وتباسى قونىس تويىن تويلايدى دەگەن ءسوز. مەديتسينالىق قىزمەتكەرلەر ءۇشىن 5 مىڭ تۇراقتى جۇمىس ورنىن قۇراتىن 2،7 مىڭ توسەك-ورىندىق 13 ءمودۋلدى اۋرۋحانا قۇرىلىسى جۇرگىزىلۋدە. ساياباقتار مەن سكۆەرلەر سالۋ، كوشەلەردى كوگالداندىرۋ، بالالار مەن سپورت الاڭدارىن ورناتۋ ەسەبىنەن 900-گە جۋىق ەلدى مەكەن اباتتاندىرىلادى"، دەدى ول.

ارتۋر پلاتونوۆ اتاپ وتكەندەي، ىسكە اسىرىلىپ جاتقان باستامالار جۇمىس ورىندارىن قۇرىپ قانا قويماي، ازاماتتاردىڭ ءومىرىن ساپالى تۇردە جاقسارتا وتىرىپ، وڭ اسەرىن تيگىزدى. دەسە دە، بۇگىندە پاندەميانىڭ ەكىنشى تولقىنىنىڭ ورىن الۋ ىقتيمالدىعىنا بايلانىستى ەكونوميكالىق احۋالدىڭ قۇلدىراۋ قاۋپى ساقتالۋدا. بۇل جۇمىسسىزدىقتىڭ ارتۋىنا جانە ازاماتتاردىڭ ەداۋىر بولىگىنىڭ ءال-اۋقاتىنىڭ ناشارلاۋىنا اكەلۋى مۇمكىن.

باعدارلامانىڭ الەۋمەتتىك ماڭىزدىلىعىن ەسكەرە وتىرىپ، Nur Otan پارتياسىنىڭ كۋراتورى 2021 جىلى جۇمىسپەن قامتۋ جول كارتاسىن ىسكە اسىرۋدى جالعاستىرۋدى جانە ونى ىسكە اسىرۋعا قارجى ءبولۋدى ۇسىنادى. سونىمەن قاتار، مەيلىنشە قوماقتى ناتيجەگە قول جەتكىزۋ ءۇشىن ارتۋر پلاتونوۆ ەڭ كوپ جۇمىس ورىندارىن قۇراتىن جانە بارىنشا جۇمىسپەن قامتاماسىز ەتەتىن جوبالاردى تاڭداۋ قاجەت دەپ سانايدى.

"جۇمىسپەن قامتۋدىڭ جول كارتاسىن ىسكە اسىرۋ بارىسىن ناقتى ۋاقىت رەجىمىندە قاداعالاۋعا مۇمكىندىك بەرەتىن مامانداندىرىلعان اقپاراتتىق جۇيەنى جاساۋ دۇرىس بولار ەدى. سونداي-اق Nur Otan پارتياسىنىڭ بەلسەندىلەرىن جەرگىلىكتى حالىقتىڭ سۇرانىستارىنا نازار اۋدارا وتىرىپ، جوبالاردى ىرىكتەۋ مەن قالىپتاستىرۋعا تارتقان ءجون"، دەپ تۇيىندەدى پارتيالىق كۋراتور.

سوڭعى جاڭالىقتار

ۇقساس جاڭالىقتار