وسىدان ءۇش جىل بۇرىنعى وقيعا 75 مىڭ تۇرعىنى بار ششۋچينسك قالاسى تۇرعىندارىنىڭ كوڭىلىن اسپانداتىپ جىبەرگەنى ەسىمىزدە. تەك كۋرورتتى ايماقتا عانا زاماناۋي ساۋلەتتىڭ وزىق ستيلىمەن, قوزىقۇيرىقشا قاپتاپ سالىنىپ جاتقان اسەم عيماراتتارعا تامسانا قارايتىن اۋدان ورتالىعىنىڭ ادامدارى باسپاناعا جارىماي, ارمانداي كۇي كەشەتىن. مىنە, ەندى ءبىر كۇندە جارىلقاۋشى پايدا بولىپ, ءاي-شايعا قاراماستان كوپقاباتتى ەكى ءۇيدىڭ قۇرىلىسىن باستادى دا جىبەردى. كومپانيانىڭ «شابىت ست» جشس اتالاتىنى دا كوپشىلىكتىڭ كومەسكىلەنىپ بارا جاتقان ءۇمىتىن وياتقان.
وسىدان ءۇش جىل بۇرىنعى وقيعا 75 مىڭ تۇرعىنى بار ششۋچينسك قالاسى تۇرعىندارىنىڭ كوڭىلىن اسپانداتىپ جىبەرگەنى ەسىمىزدە. تەك كۋرورتتى ايماقتا عانا زاماناۋي ساۋلەتتىڭ وزىق ستيلىمەن, قوزىقۇيرىقشا قاپتاپ سالىنىپ جاتقان اسەم عيماراتتارعا تامسانا قارايتىن اۋدان ورتالىعىنىڭ ادامدارى باسپاناعا جارىماي, ارمانداي كۇي كەشەتىن. مىنە, ەندى ءبىر كۇندە جارىلقاۋشى پايدا بولىپ, ءاي-شايعا قاراماستان كوپقاباتتى ەكى ءۇيدىڭ قۇرىلىسىن باستادى دا جىبەردى. كومپانيانىڭ «شابىت ست» جشس اتالاتىنى دا كوپشىلىكتىڭ كومەسكىلەنىپ بارا جاتقان ءۇمىتىن وياتقان.
مەملەكەتتىك باعدارلاما جالاۋىن كوتەرگەن قۇرىلىس عالامات قارقىنمەن جۇرگىزىلدى. اراعا جىل سالماي-اق قوس عيمارات قونىس تويىنا دايىن بولدى. جۇرتشىلىق تا, جەرگىلىكتى بيلىك تە قاتتى قۋاندى. جاس مامانداردى جۇمىسقا تارتۋدىڭ مۇمكىندىگى تۋعانىنا قۋانعان اقمولا وبلىسىنىڭ سول كەزدەگى اكىمى سەرگەي دياچەنكو پاتەر يەلەرىنە كىلت تاپسىرۋ سالتاناتىنا ارنايى قاتىسىپ, جالىندى ءسوزىن توگىلتتى. الگى ءۇيدىڭ ءتورتىنشى قاباتىنان پاتەر ءبولىنگەن بوتاكوز قۇسايىنوۆا مەن اننا ەليشەۆالاردى قىزۋ قۇتتىقتاپ, قولدارىنا جىبەك باۋلى كىلت پەن القىزىل گۇلدى قوسا ۇستاتقان. بىراق, جولدامامەن كەلگەن جاس ماماندارعا قامقورلىق كورسەتۋ جونىندەگى جوعارىدان جاسالىپ جاتقان قىسىمنان قۇتىلىپ قالۋدى ويلاعان اكىم داۋدىڭ باسى ءدال بۇگىن باستالعانىن قايدان ءبىلسىن!
شىنىندا, «شابىت ست» شاتتىق اكەلمەپتى. قۇرىلىس كومپانياسىنىڭ باسشىلارى اۋداندىق اكىمدىكپەن جاسالعان مامىلە-مەموراندۋمدى الگى سالتانات بولماي جاتىپ-اق ۇمىتقان ەكەن, تۋراسىن ايتقاندا ونى ورىنداۋ ويىندا بولماعان. بۇگىنگى جاعداي سول شىندىقتى قالقىتىپ شىعارىپ وتىر.
– تانىمايتىن, بەلگىسىز ادامدار پاتەردى بوساتۋىمدى تالاپ ەتىپ, قوقان-لوقى جاساۋىن قويار ەمەس, – دەيدى ب.قۇسايىنوۆا. –زاڭدى يەسى ءبىز دەيدى. جىلارمان كۇيدە قۇقىق قورعاۋ ورگاندارىن جاعالاپ كوردىم. وسى ەكى جىلدا اۋداننىڭ ءۇش اكىمى اۋىستى. ولاردىڭ ارقايسىسىنا ەكى-ەكىدەن التى رەت باردىم. جاناشىرلىق سوزدەرىن ايتقانىمەن ەشقانداي كومەكتەرى جوق. جانۇيامىزبەن ابدەن قالجىراپ بىتتىك.
ءدال وسىنداي جاعدايدى گينەكولوگ اننا ەليشەۆا دا باستان كەشىپ وتىر.
سيىرقۇيىمشاقتالىپ سوزىلىپ بارا جاتقان ماسەلەنىڭ استارىندا قانداي سىر بار؟ ءبىز بۋراباي اۋداندىق اكىمدىگىنىڭ زاڭگەرى ايتبەك ىقىلاسوۆقا حابارلاسقانىمىزدا سۇراقتىڭ تۇپكى جاۋابىنا اقىرىنداپ ساۋلە تۇسكەندەي بولدى. جولدامامەن كەلگەن جاس ماماندارعا پاتەرلەر سىيعا بەرىلگەن بولىپ شىقتى. «قام جەمەڭدەر. قۇجاتتارىڭ ەكى-ءۇش ايدان كەيىن قولدارىڭا تيەدى», دەلىنگەن.
سوندا ۇكىمەت جالاۋلاتىپ قولعا العان مەملەكەتتىك باعدارلاما, قولجەتىمدى باسپانا قايدا قالدى؟ جالپى, سولاي بولعان كۇننىڭ وزىندە ساۋعاسىن قايتىپ العان سالتتى قاي اتامىزدان كورىپ ەدىك؟ سوزىندە تۇرمايتىن, تيىن-تەبەن ءۇشىن جالعان سويلەيتىن قۇرىلىسشىلاردان نە قايران؟ جۇرت كوزىنشە كىلت بەرگەن اكىمدە, جالپى بيلىك اتاۋلىدا قانداي بەدەل قالدى مۇنان كەيىن...
ەندى, مىنە جازىقسىز ءجابىر كورگەن, جۇرتشىلىق ءۇمىت كۇتىپ وتىرعان دارىگەرلەر سوت دالىزدەرىندە سارساڭعا تۇسپەك. بيلىكتىڭ دارمەنسىزدىگى, تاعدىردى تالكەككە سالۋ دەگەن وسى شىعار.
باقبەرگەن امالبەك,
«ەگەمەن قازاقستان».
اقمولا وبلىسى,
ششۋچينسك قالاسى.
