03 قاراشا، 2013

قازاقستاننىڭ ءۇش وبلىسىندا شەنەۋنىكتەر جاپپاي قىزمەتتەرىنەن كەتەدى

153 رەت كورسەتىلدى

03-11-13-tekstil-shymkent-1

قازاقستاننىڭ ءۇش وبلىسىندا شەنەۋنىكتەردى جاپپاي قىزمەتتەرىنەن بوساتۋ باستالاتىن شىعار. ۆيتسە-پرەمەر قاراعاندى، وڭتۇستىك قازاقستان جانە ماڭعىستاۋ وبلىستارىنىڭ اكىمدەرىنە پروبلەماسى بار جوبالارعا جاۋاپتى شەنەۋنىكتەردى جازالاۋدى تاپسىردى. بۇل تۋرالى Total.kz سايتى حابارلادى.

مۇنداي تاپسىرما يندۋستريا جانە جاڭا تەحنولوگيالار ءمينيسترى اسەت يسەكەشوۆتىڭ سويلەگەن سوزىنەن كەيىن بەرىلدى. ول وسى جۇمىستارعا ايماقتاردا جاۋاپ بەرەتىن شەنەۋنىكتەردى جازاعا تارتۋدى ۇسىندى. مينيستر ۇكىمەتتىڭ 11 قازانداعى كەڭەيتىلگەن كەڭەسىندە پرەزيدەنت ايتقان ەسكەرتپەلەر مەن پروبلەمالاردىڭ شەشىلۋ بارىسىنا ارنالعان جيىندا وسىنداي قاتاڭ تالاپ قويدى. اسەت يسەكەشوۆ ءوز سوزىندە قاراعاندىدا ۇشاق شىعارۋ جوباسىنا بايلانىستى تۋىنداعان پروبلەماعا ەرەكشە ەكپىن سالدى. ول سونداي-اق وڭتۇستىك قازاقستان وبلىسىنداعى توقىما فابريكاسىن شيكىزاتپەن قامتاماسىز ەتۋ جانە ماڭعىستاۋ وبلىسىندا پلانشەتتى كومپيۋتەر شىعارۋ ماسەلەلەرىندەگى تار ورىستىلىك پەن كوزبوياۋشىلىققا قاتتى الاڭداۋشىلىق ءبىلدىردى. قاراعاندىداعى زاۋىتتىڭ شاماسى ءبىر ۇشاق شىعارۋدان اسپادى. وڭتۇستىك قازاقستانداعى توقىما زاۋىت ءتىپتى جاقىن كەلەشەكتىڭ ءوزىن ويلاستىرماي اشا سالعان بىردەڭە بولىپ شىقتى. وعان شيكىزات تاۋىپ بەرۋدىڭ قيىن بولعانى ءوز الدىنا، كاسىپورىننان شىعاتىن ءونىمنىڭ وزىندىك قۇنى شەتەلدەردەن ساتىپ اكەلىنەتىن دايىن بۇيىمداردان بىرنەشە ەسەلەپ اسىپ ءتۇستى. ال ماڭعىستاۋداعى پلانشەت زاۋىتى اتى عانا بار، زاتى جوق، تازا كوزبوياۋشىلىققا قۇرىلعان الاياقتىق تىرلىك كورىنەدى. ونىڭ كومپيۋتەر پلانشەتتەرى قىتايدان دايىن ءونىم تۇرىندە اكەلىنىپ، مۇندا تەك ەتيكەتكاسى، ياعني جاپسىرما قاعازدارى عانا اۋىستىرىلادى ەكەن.

مينيستر وسىعان بايلانىستى جەرگىلىكتى جەرلەردەگى اكىمدەردىڭ ايماقتاردىڭ ينۆەستيتسيالىق مۇمكىندىكتەرىن اشۋداعى، بيزنەس پەن ينۆەستورلار ءۇشىن قولايلى جاعدايلار جاساۋداعى جۇمىستارىنىڭ ناشار ەكەنىن اتاپ كورسەتتى. يندۋستريالاندىرۋ كارتاسى ءۇشىن اكىمدەر ۇسىناتىن جوبالاردىڭ ساپالارى تومەن ەكەنى بايقالادى. مينيسترلىك ولاردىڭ سوڭعى جولى ۇسىنعان 200 جوباسىنىڭ تەڭ جارتىسىن ۇدەمەلى يندۋستريالىق-يننوۆاتسيالىق دامۋ باعدارلاماسى تالاپتارىنا ساي كەلمەۋلەرى سەبەپتى جاراتپاي تاستاعان. بۇل ورايدا اتىراۋ، سولتۇستىك قازاقستان، اقمولا جانە ماڭعىستاۋ وبلىستارى الدارىنا جان سالماي، «توپجارعان تارلاندار» اتانىپ تۇر.

بىلتىرعى جىلى دا وسىنداي ساپاسىزدىق ورىن الىپ ەدى. الايدا، بيىلعى «بەلسەندىلىكتىڭ» ءتىپتى ۇرقى بولەك. وسىلار تۋرالى كەڭىنەن بايانداپ شىققان ءا.يسەكەشوۆ بۇدان ەندى ءتيىستى قورىتىندى شىعارماسقا بولمايتىنىن قاداپ ايتتى.

ساكەن مايلىباي.

سوڭعى جاڭالىقتار

شىڭعىستاۋدىڭ شاكىرى

ادەبيەت • كەشە

جانى ىزگى جۋرناليست

ەگەمەن قازاقستان • كەشە

ۇقساس جاڭالىقتار