03 قاراشا، 2013

قازاقستاندىق جيحادشىلاردىڭ ءبىرى تۋرالى قارالى حابار كەلدى

146 رەت كورسەتىلدى

31-10-13-naemniki-suria-1

بيىلعى جىلعى قازان ايىندا YouTub جەلىسىندە «ونداعان قازاقستاندىق جيحادشىلاردىڭ سيرياعا بارىپ جەتكەنى» تۋرالى بەينەجەلى جاريالانعاننان كەيىن «ازاتتىق» راديوستانساسىنىڭ قىزمەتكەرلەرى وندا كورسەتىلگەن بىرنەشە جىگىتتىڭ تۋعان-تۋىستارىمەن حابارلاسىپ، ولاردىڭ كىمدەر ەكەنىن انىقتاعان. بۇل تۋرالى «ازاتتىق» راديوستانساسى حابارلادى.

ستانسا ءتىلشىسى سوندا «سيرياعا اتتانعاندار» اراسىندا جەزقازعاندىق اعايىندى ەركەبۇلان، ەركەمۇرات جانە جاسۇلان سارسەنبەكتەردىڭ، ەرلى-زايىپتى كەنجەبەك جانە نۇرگۇل احماديەۆتەردىڭ، الماتى جانە شىعىس قازاقستان وبلىستارىنان شىققان ءبىر توپ ەرىكتىلەردىڭ بولۋلارى مۇمكىن ەكەندىكتەرىن انىقتاپتى.

جەزقازعاندا بولىپ قايتقان جۋرناليست سيرياعا كەتكەندەردىڭ ءبىرىنىڭ اناسى اۋىلداعى مولداعا ءجيى بارىپ، ودان دۇعا وقۋدى ءوتىنىپ تۇراتىنىنا كوز جەتكىزىپ قايتقان. سويتسە، ونىڭ ۇلكەن ۇلىنىڭ سيريا جەرىندە قازا تاپقانى تۋرالى اۋىز-ەكى حابار جەتكەن ەكەن. ال وتباسىسى جەزقازعاندا قالعان. قازاسى تۋرالى قارالى حابار جەتكەن ۇلكەن ۇل جوعارى وقۋ ورنىن بىتىرگەننەن كەيىن ەگيپەتتە ءبىلىم الۋدى جالعاستىرىپتى. راديو ءتىلشىسى جەزقازعانداعى مەشىتتەردىڭ بىرىندە وتكەن جۇما نامازى كەزىندە قالا تۇرعىنى ايتجان وتەشوۆتەن سيرياعا اتتانعان ءۇش اعايىندى جىگىتتىڭ اتى-جوندەرىن ءبىلىپ العان. ءوزىنىڭ ءداستۇرلى يسلام ءدىنىن، ياعني حانافي مازحابىن ۇستاناتىنىن بىلدىرگەن جەزقازعاندىق جاس جىگىت ولاردىڭ جوعارىدا ايتىلعان ءۇش جىگىت ەكەنىن دە ايتىپ بەرىپتى. 1994 جىلى تۋعان ول سول ۇشەۋدىڭ كىشىسى – جاسۇلانمەن دوس تا ەكەن.

«ءبىز مەشىتكە كەلىپ، ناماز وقىپ، سوندا تۇنەپ قالدىق. كەلەسى كۇنى ەرتەڭىنە جاسۇلان قاراعاندىعا كەتتى. بىرقاتار ۋاقىتتان كەيىن مەن «اگەنت» ارقىلى حابارلاسقانىمدا ول ءوزىنىڭ ەگيپەتتە جۇرگەنىن ايتتى. قازىر ونىڭ «سيرياعا اتتانعان جيحادشىلار قاتارىنداعى» بەينەجەلىدەگى كەسكىنىنە قاراپ وتىرمىز»، - دەدى ول.

«ازاتتىق» تىلشىسىنە بۇدان كەيىن قازاقستاننىڭ باسقا قالالارىنان سوعىسقا اتتانعاندار تۋرالى دا ماعلۇمات جيناۋدىڭ رەتى كەلەدى. ولاردىڭ دەنى وندا ايەلدەرى مەن بالالارىن الىپ اتتانىپتى.

ساكەن مايلىباي.

سوڭعى جاڭالىقتار

اقتاۋدا شارشى الاڭعا كىمدەر شىعادى؟

كاسىپقوي بوكس • بۇگىن، 14:52

اتىراۋدا ەپيدجاعداي ءالى دە كۇردەلى

كوروناۆيرۋس • بۇگىن، 13:50

تۇركىستاندا ۇشەم دۇنيەگە كەلدى

ايماقتار • بۇگىن، 12:50

ەرتەڭ ۇكىمەت وتىرىسى وتەدى

ۇكىمەت • بۇگىن، 11:31

ۇقساس جاڭالىقتار