قوستاناي قالاسىندا تۇراتىن جالعىزباستى انا نادەجدا دميتريەۆانىڭ ۇيەلمەلى-سۇيەلمەلى 8 بالاسى بار. رۋزانا, ەلۆينا, ۆەرونيكا, الەكساندرا, اناستاسيا, ليۋبوۆ, ۆيكتوريا ەسىمدى جەتى قىزى ءۇيدىڭ كەنجەسى ۆيكتوردى قولدان تۇسىرمەي, اناسىنا قولعانات بولىپ ءوسىپ كەلەدى. «قوستاناي سۋ» كاسىپورنى بيىل بۇل ۇيدەگى 8 بالاعا قىسقى كيىم ساتىپ الىپ بەرۋدى ءجون كورىپتى. ءۇر جاڭا قىسقى كۇرتە, ءساندى كومبينەزون, باس كيىم, جىلى ءارى جەپ-جەڭىل ەتىكتەردى كيىپ كورگەن شيەتتەي بالالار شاتتىققا كەنەلىپ قۋانىپ قالدى.
– ءبىز دميتريەۆتەر وتباسىن بۇرىننان بىلەمىز. جىل ون ەكى اي ىشىندە اينالىپ كەلەتىن ءار ماۋسىم قارساڭىندا مىندەتتى تۇردە كومەك كورسەتۋدى ۇردىسكە اينالدىردىق. بيىل «مەكتەپكە جول» اكتسياسى اياسىندا جىلى كيىمدەر اكەلدىك. كوپ بالا تاربيەلەپ وتىرعان كاسىپورىن جۇمىسشىلارىنىڭ وتباسىن دا نازاردان تىس قالدىرىپ كورگەن ەمەسپىز. ولاردى دا مۇمكىندىگىنشە بازارلىقپەن قۋانتىپ, تارتۋ-تارالعى جاساپ تۇرامىز, – دەدى «قوستاناي سۋ» مقك ديرەكتورىنىڭ ماركەتينگ جانە جالپى ماسەلەلەر جونىندەگى ورىنباسارى ارمان ءجۇنىسوۆ.
دميتريەۆتەر وتباسى بيىل مەملەكەتتىك باعدارلاما بويىنشا باسپانالى بولىپتى.
– جالعىزباستى ادامعا شيەتتەي بالانى باعىپ-قاعىپ ءوسىرۋ قيىن عوي. دەگەنمەن كوپشىلىكتىڭ, مەملەكەتتىڭ قامقورلىعىن سەزىنىپ وتىرمىن. ادامعا كادىمگىدەي جىگەر بەرەدى. قازىر باسىمىزدا باسپانا بار. بۇعان دەيىن قالاداعى جەكە ۇيلەردىڭ ءبىرىن جالداپ تۇردىق. اۋەلى جەتىمدەر ساناتىندا پاتەر كەزەگىنە تۇردىم. كەيىن الەۋمەتتىك از قامتىلعاندار توبىنىڭ وكىلى رەتىندە تىركەلدىم. سوڭعى رەت كوپبالالى انا رەتىندە كەزەككە تۇرىپ, كوپ كەشىكپەي پاتەر الىپ, باسپانا باقىتىنا كەنەلدىك. ءۇيىمىز كەڭ, بارىمىزگە ورىن جەتەدى. «قوستاناي سۋ» كاسىپورنى وسىمەن ءۇشىنشى جىل كومەك قولىن سوزىپ كەلەدى. بيىل مامىردا پاتەرلى بولعانىمىزدى ەستىپ, ارنايى كەلىپ قۇتتىقتاپ, ءتىپتى ءۇي قۇجاتتارىن رەسىمدەۋگە دەيىن كومەكتەستى, – دەدى جالعىزباستى انا.
اتالعان ۇجىمنىڭ كوپبالالى جانە تولىق ەمەس وتباسىلاردا تاربيەلەنىپ جاتقان 40 بالانى ءوز قامقورلىعىنا الىپ, تۇراقتى قولداۋ كورسەتىپ وتىرعانىن ايتا كەتكەن ءجون.
قوستاناي وبلىسى
