02 قاراشا، 2013

بەلگىلى رەجيسسەر قازاقستان ەليتاسىن سىنعا الدى

169 رەت كورسەتىلدى

02-11-13-ermek tursunov

بەلگىلى جازۋشى، ستسەناريست جانە رەجيسسەر ەرمەك تۇرسىنوۆ قازىرگى قازاقستان ەليتاسىن سىنعا الدى. «ليتەر» گازەتىنە بەرگەن سۇحباتىندا ول بۇگىنگى زيالى قاۋىم وكىلدەرى «تاريحقا دا، مادەنيەتكە دە، الدەكىمگە ۇقساۋعا دا مۇلدەم قىزىقپايدى»، «تەك قانا ەلدى توناۋمەن اينالىسادى» دەگەندى جايىپ سالدى. «ءبىزدىڭ ەليتانىڭ ەلىمىزگە رۋحاني قۇبىلىس رەتىندە، مادەني قۇبىلىس رەتىندە قاراۋعا تۇكىرگەنى بار سياقتى بولىپ كورىنەدى. بارلىق جوعارى قاۋىم، سونىڭ ىشىندە گرانت الۋ ءۇشىن، الدەقانداي قىزمەت، اتاق، وردەندەر مەن مەدالدار، قوعامدا بەلگىلى ءبىر ورىن الۋ ءۇشىن ۇدايى جۇگىرىپ جۇرەتىن شىعارماشىلىق وكىلدەرى دە كەيدە ادامدىق دەڭگەيلەرىنەن تومەن كەتىپ جاتادى. بۇل - اقشاعا، گرانتقا، ۇستانىمعا دەگەن قۇلدىق پيعىل»، - دەدى رەجيسسەر. تۇرسىنوۆتىڭ پىكىرىنشە، ەليتا مەن بۇقارا ءبىر-بىرلەرىن مويىندامايدى. «وسى جەردەن ءبىزدىڭ قوعامداعى توزىمسىزدىك، قاسكويلىك، وسى جەردەن ءوزىن-ءوزى قورلاۋشىلىق، ەشقانداي بىرلىكتىڭ بولماۋى، ءبىر-بىرىنەن جيىركەنۋشىلىك پەن ز ۇلىمدىق تۋىنداپ جاتادى. ينتەرنەت جانە ءتىپتى بۇقارالىق اقپارات قۇرالدارىنىڭ ءوزى قازىر تازا ەمەس ارەكەتتەرگە تولىپ كەتتى»، - دەگەن تۇجىرىم جاسادى رەجيسسەر. جازۋشى بۇل تىعىرىقتان شىعۋدىڭ بىردەن-ءبىر جولى مادەنيەتى تومەن ادامداردى ەلدىڭ ەليتاسى قۇرامىنان الاستاۋ دەپ بىلەدى. «مىسالى، مۇقاعاليدان جاتقا ءبىر جول ايتىپ بەرە الماعان، شاكارىم تۋرالى ەشتەڭە بىلمەيتىن، ابايدىڭ فيلوسوفياسى مەن قۇرمانعازىنىڭ كۇيلەرىنەن ماقۇرىم ادام ءبىردى-ءبىر ماڭىزدى مەكەمەنىڭ تابالدىرىعىنان اتتاي الماۋى ءتيىس. بىلايشا ايتقاندا، مۇنداي ادامدار ساياسي ەليتادا دا، پارلامەنتتە دە، مەملەكەتتىك ارنالاردا دا بولماۋى كەرەك. بۇلاي بولماس ءۇشىن ءجاي عانا مادەني فەيس باقىلاۋ ورناتقان ءجون سەكىلدى»، - دەپ تۇيەدى ويىن ول. مۇرات ايتقوجا.
سوڭعى جاڭالىقتار

اقتاۋدا شارشى الاڭعا كىمدەر شىعادى؟

كاسىپقوي بوكس • بۇگىن، 14:52

اتىراۋدا ەپيدجاعداي ءالى دە كۇردەلى

كوروناۆيرۋس • بۇگىن، 13:50

تۇركىستاندا ۇشەم دۇنيەگە كەلدى

ايماقتار • بۇگىن، 12:50

ەرتەڭ ۇكىمەت وتىرىسى وتەدى

ۇكىمەت • بۇگىن، 11:31

ۇقساس جاڭالىقتار