جاقسى جاندارعا جولىققان جاديەۆا
گۇلجانات جاديەۆانىڭ بالا كەزگى ارمانىنىڭ جۇزەگە اسۋى ءبىراز جىلدى كەرەك ەتىپتى. كىشكەنتايىنان سۋرەت سالۋدى, الدەنە تىگۋدى جاقسى كوردى. قيالىمەن قولىنان شىققان دۇنيەلەردى جۇرت الدىنا شىعارعاندا ەل قىزىقتاپ قول سوعىپ تۇرسا, العىسىن ايتسا, جاپپاي تۇتىنسا, جاراستىرىپ كيسە دەپ ارماندادى. بىراق بۇل ويىن اتا-اناسى قۇپتامادى.
– قوي, قىزىم, تۇقىمىمىزدا تىگىنشىلىكپەن تىرشىلىك ەتكەن ادام جوق. سەنىڭ بۇل ءىسىڭدى قولداپ كومەكتەسەتىن قاراجاتتى قايدان تابامىز؟ ودان دا قىزىلوردانىڭ پەدكوللەدجىنە بارىپ, مۇعالىم بول, – دەيدى. شەشە ءسوزىن ەكى ەتپەگەن گۇلجانات ارمانىن جيىستىرىپ, مۇعالىمدىك جولعا ءتۇستى. تۇرمىسقا شىعىپ, بالالارى ومىرگە كەلگەندە جۇبايىنا ەلدە جۇمىستىڭ رەتى بولماي 2013 جىلى ەلورداعا قونىس اۋدارعان ەكەن. ال تىگىنشىلىككە كەلۋىنە دەكرەتتە وتىرۋى سەبەپ بولىپتى.
– جالپى, قارەكەتسىز وتىرعاندى قالامايمىن. سول ۋاقىتتا تاپسىرىسقا تورت ءپىسىرىپ ساتتىم, ودان الەۋمەتتىك جەلىدەن ءبىلىپ, اقتاۋلىق نۇرلى قابۋلوۆا ەسىمدى قىزدان ونلاين قۇراق كورپە تىگۋدى ۇيرەندىم. نۇرلى بەينەساباقتار كورسەتەدى, ودان تاپسىرما بەرەدى, كەرى بايلانىس ارقىلى جاساعان تاپسىرماڭدى كورسەتەسىڭ, وسىلايشا قۇراق كورپە تىگۋدىڭ قىر-سىرىن وقىپ الدىم, – دەيدى ول.
ءسويتىپ جۇرگەندە ءبىر كۇنى بالاباقشادان تاپسىرىس الىپ, بۇل ىسپەن اينالىسىپ تابىس تابۋعا بولاتىنىن, جانى قالايتىن ەڭبەك ەكەنىن ۇقتى. 2017 جىلى گۇلشارات جۇباەۆا استاناعا شەبەرلىك ساباعىن وتكىزۋگە كەلدى. كۋرستان ءوتۋ 30 مىڭ تەڭگە تۇرادى. تەك كوپبالالى اناعا ارنالعان تەگىن 3 ورىن بار ەكەن. بالالارىنىڭ ارقاسىندا تەگىن وقۋعا جازىلعان ول گۇلشاراتتىڭ قاداعالاۋىمەن ءبىر كويلەك پەن قامزول تىگىپ شىقتى. كەيىننەن گۇلشارات قازاقستان بويىنشا كۋرستان وتكەن قىزداردىڭ باسىن بىرىكتىرىپ ورتاق چات اشتى. ول جەردە دە ءبىر-بىرىنەن سۇراپ, كەڭەسىپ وتىرۋعا بولادى. وسىلايشا گۇلجانات كورپە تىگۋ ماشىعىن تەرەڭدەتىپ بىلمەككە تاعى دا الىستا جاتىپ بىلگەنىن ۇيرەتەتىن تاعى ءبىر جاقسى جاننىڭ ساباعىنا قاتىسادى. ول سەمەيلىك نازىم قادىروۆا بولاتىن. قازىرگى قۇستىڭ قوس قاناتىنداي, قاناتتاسا ەڭبەك ەتىپ جۇرگەن قۇربىسى رابيعامەن وسى كورپە ساباعىنان وتۋدە تانىسادى.
قولىنان شىققان بۇيىمدارىن الەۋمەتىك جەلىگە سالىپ, ەلگە كورىنۋى گۇلجاناتقا جاڭا تاپسىرىستار اكەلەدى. بىراق ونىڭ ءىس تىگەتىن ماشيناسى دا جوق ەدى. بىردە اجەپتاۋىر قوماقتى تاپسىرىس ءتۇستى. سودان رابيعانىڭ ماشەڭكەسىن جالعا الىپ تىگىپ, 5 كۇننىڭ ىشىندە تاپسىرىستى ورىندايدى. وسى جەدەلدىگىمەن قۇتتىقتاعان قىز-كەلىنشەكتەر قالاي تىككەنىن سۇراعان ەكەن. «ماشەڭكەنى جالعا الىپ تىگىپ شىقتىم» دەگەنىن ەستىگەندە گۇلشارات: «قىزدار, ارقايسىمىز 1 مىڭ تەڭگەدەن شىعارساق, 100 مىڭ تەڭگەدەي قاراجات جينالادى, قالعانىن ءوزى قوسار, كومەكتەسەيىك», دەيدى.
– ءومىرى ءجۇزىن كورمەگەن ورتاق چاتتاعى قىزدار ءۇش كۇن ىشىندە 90 مىڭ تەڭگە جيىپ بەرىپ, قالعان 70 مىڭ تەڭگەسىن ءوزىم قوسىپ العاشقى ماشەڭكەمە قولىم جەتتى. قۋانىشىم قوينىما سىيماي, قىزىقتاپ اينالاسىنان شىقپايتىنمىن, ايتەۋىر جۇرگەن جەرىمدە جاقسى ادامدارعا جولىعامىن, – دەيدى گۇلجانات.
ءسويتىپ جەكە ماشەڭكەسىمەن ءىس تىگىپ جۇرگەندە «اتامەكەن» ۇلتتىق كاسىپكەرلىك پالاتاسىنىڭ «بيزنەس باستاۋ» اتتى ءبىر ايلىق كۋرس وتكىزەتىنىن كورەدى. وسى كۋرستا وقىعان ول 500 مىڭ تەڭگە گرانت الادى. بۇل قاراجات گۇلجاناتتىڭ ارمان-قيالىندا جۇرگەن تىگىنشىگە قاجەتتى كۇردەلى وپەراتسيالاردى ورىندايتىن جاڭا ماشەڭكە مەن 48 رازمەرلى مانەكەن جانە وندىرىستىك ۇتىك الۋعا مۇمكىندىك بەرەدى.
قوردايدان قانات قاققان رابيعا قىز
رابيعا وتەپوۆا قوردايدا تۋىپتى. جۇبايى اسكەري ادام, قازىر زەينەتكەر. سوندىقتان دا ەلىمىزدىڭ كوپتەگەن وڭىرىندە ەڭبەك ەتكەن. اۋەلدە كاسىپتىك-تەحنيكالىق كوللەدجدە تىگىنشىلىكتى يگەرگەن رابيعانىڭ بۇل ىستە قالانعان ىرگەتاسى بار. الايدا قازىرگى كۇنى بۇرىنعى بىلگەنىمەن وتىرىپ قالۋعا بولا ما, سونى جەتىلدىرەمىن دەپ ءجۇرىپ, ءبىر جىلعى ءتول – گۇلجاناتپەن تانىسىپ, جاراسىپ كەتكەنىن بايقاماي قالدى.
– ءبىزدىڭ وتاندىق شەبەرلەردە وقۋدى قالتا كوتەرە بەرمەيدى. 300 مىڭ تەڭگەدەن تولەپ, وقىپ شىعۋ وڭاي ما؟ كوبىنە مۇمكىن ەمەس. سوندىقتان «اتامەكەن» ۇكپ كورسەتكەن كومەككە رازىمىز. نەگىزى ەلوردادا ادىلدىك بار. «اتامەكەن» بيزنەس جوسپارىڭدى دالەلدەسەڭ گرانت بەرەدى, قايتارىمسىز نەسيەسى دە بار. اۋەلگى جولىڭنان اۋىتقىماي, بەرگەن قاراجاتتى تويعا, ءيا باسقاعا جۇمساپ جىبەرمەي, جۇمىس جۇرگىزگەنىڭدى كورسەتىپ وتىرساڭ بولدى. ال وڭىرلەردەگى قىزدارعا وتە قيىن. «بارماق باستى, كوز قىستىمەن», تانىستىقپەن بولىنەدى دەپ جىلايدى. گۇلجانات ەكەۋمىزدىڭ باعىمىزعا نۇر-سۇلتاندا تازالىق بار, كوزى جانىپ تۇرعان, ىنتالى جانعا قولۇشىن بەرەتىنىن بايقادىق. جۋىردا «اتامەكەن» الدا 5 جىلدىق جوبا بار ەكەنىن ايتىپ, سوعان قاتىسۋعا شاقىردى. وعان يننوۆاتسيالىق بيزنەس جوسپار قاجەت. ال ءبىزدىڭ قيالىمىز يننوۆاتسيياعا جەتىڭكىرەمەي توسىلىڭقىراپ وتىرمىز, – دەيدى رابيعا.
بىرەر ادامعا بولسا دا تابىس تاۋىپ, جۇمىسسىزدىقپەن كۇرەسەتىن وسىنداي يگى ءىس الداعى كۇنگە ءۇمىتى مەن سەنىمىن نىعايتتى. قازىر شەبەرحانا ەسىگى ءبىر جابىلمايدى. بارلىعىن تىگەدى. سىرت كيىم, ءۇي جابدىعى دەيسىز بە, كويلەكتەردىڭ سان ءتۇرىن, ەرلەر كيىمدەرىن تىگەدى, وڭدەۋ (رەستاۆراتسيا) جاسايدى. ءبىر كەلگەن جاننىڭ قايتىپ سوقپايتىنى جوق. ءتىپتى ۇنەمى تىكتىرىپ كيەتىن كليەنتتەر بازاسى دا قالىپتاستى.
– كۇيەۋىم قازىر زەينەتكەر, 3 بالامىز بار. گۇلجانات 5 بالاسىن قاجىمۇقاندا قالدىرىپ الىستان قاتىناسا, مەن جاقىن جەردەن ەڭبەكتەنەمىن. بالكىم كوپ جىلعى ەلدىڭ تۇكپىر-تۇكپىرىندە جۇرگەن كۇندەردىڭ وتەۋى بولار, – دەگەن رابيعا قارەكەتتى قولدايتىن ادامدار بىرىگۋىنىڭ ۇلكەن كۇش ەكەنىن ايتىپ بەردى.
ياعني, تىگىنشى قىز-كەلىنشەكتەردىڭ ورتاق چاتى سونداي ورتا بولىپ قالىپتاسىپتى. بۇرىن اپتا سايىن 1 مىڭ تەڭگەدەن سالسا, قازىر ايىنا 5 مىڭ تەڭگەدەن سالادى. ايدىڭ اياعىندا ينستاگرامدا تىكەلەي ەفيردە ءار قاتىسۋشىنىڭ اتى-ءجونى, قالاسى جازىلىپ, شىنى ىدىسقا سالىنادى. سونىڭ ىشىنەن كىشكەنتاي بالا ءبىر قاعازدى الىپ شىعادى. كىمنىڭ اتى شىقسا, سوعان قاراجات اۋدارىلىپ, ول وزىنە قاجەتتى ماشەڭكەسىن الادى. وسىلاي جەرەبە تارتۋ ارقىلى قانشاما ادام قولى جەتپەگەن دۇنيەسىن الدى.
قوس قۇربى قاراپ وتىرمايتىنىن ايتادى. ءتىپتى كارانتين ۋاقىتىندا دا بەتپەردە تىگىپتى. «ەرتەڭ كارانتين باستالادى دەگەندە تاپسىرىس ءتۇستى. سودان كۇن-ءتۇن دەمەي ەكى كۇن وتىرىپ, تاپسىرىسپەن 500 تۇمشا تىگىپ وتكىزدىك. ودان ماشەڭكەنى ۇيگە الىپ كەتىپ, ۇيدەن تاپسىرىس ورىنداپ ناتيجەسىندە كارانتين دەپ پالەندەي قينالمادىق» دەيدى تىگىنشىلەر.
– مۇعالىمدىكتى قويىپ, تىگىنشىلىككە كوشتىم دەگەندە باۋىرلارىم: «ساعىم قۋما, ماماندىعىڭا ورال» دەپ ۇرىستى دا, كۇلدى دە. بىراق مەن جولىمدى ەندى تاپتىم. بىلەسىز بە, مەن ۇيىندە تەك اۋزىن اشىپ, قاراپ وتىراتىن كەلىنشەكتەردى تۇسىنبەيمىن. تورت ءپىسىردىم دەپ ايتتىم عوي. سوندا كۇندە تاڭ الاڭىنان تۇرىپ, ۇلكەن ەتىپ بالدى تورت ءپىسىرىپ, ونى 21 تەڭ بولىككە كەسىپ تۋراپ, 304 اۆتوبۋسىنىڭ سوڭعى ايالداماسىنداعى دامحاناعا, ءار بولىگىن 180 تەڭگەدەن وتكىزەتىنمىن. ولار 220 تەڭگەدەن ساتىپ, كەشكە اقشاسىن بەرەدى. سونداي-اق قوسىمشا تاپسىرىستان تۇسەتىن تورتتار بار. ءسويتىپ وتباسىمىزدىڭ بيۋدجەتىن تولىقتىرىپ وتىردىم. ول كەزدە «لەسنايا پوليانا» شاعىن اۋدانىندا پاتەر جالداپ تۇردىق. قازىر قالا ىرگەسىنەن جەر الىپ, قاجىمۇقان اۋىلىندا ءۇي سالىپ جاتىرمىز, – دەگەن گۇلجاناتتىڭ ءسوزىن رابيعا جالعادى.
ء«بىز حالىققا قىزمەت كورسەتۋ ارقىلى وزىمىزگە دە جاقسى جول اشىپ ءجۇرمىز. توپتى تاپسىرىس كەلسە قۋانىپ قالامىز. ويتكەنى قول جاتتىعادى دا ءونىمدى بولادى. وتكەندە ءبىر ءدامحانا ءۇشىن 40 الجاپقىش تىگىپ شىقتىق. تەز ءارى ساپالى ورىندالدى دەپ قۋاندى. قارەكەتتە قايىردىڭ بارى راس, – دەيدى قوس شەبەر.
