"اندەرس بەرينگ برەيۆيك شارتتى تۇردە مەرزىمىنەن بۇرىن بوساتۋدى سۇرايدى. مەن ونىڭ (برەيۆيك) اتىنان شارتتى تۇردە مەرزىمىنەن بۇرىن بوساتۋ تۋرالى ءوتىنىش بەردىم",دەيدى قىلمىسكەردىڭ ادۆوكاتى ويستەن ستۋررۆيك.
ادۆوكات تۇسىندىرگەندەي, برەيۆيك سوتتالعان 21 جىلدان سەگىز جىلدان استام ۋاقىتىن تۇرمەدە وتكىزگەن. ول قازىر تەوريالىق تۇرعىدان وسىنداي ءوتىنىش بەرۋگە قۇقىلى. ادۆوكات سونىمەن بىرگە وتىنىشكە ەكى اتپەن قول قويىلعانىن ايتتى - اندەرس بەرينگ برەيۆيك جانە ونىڭ تۇرمەدەگى ەسىمى - فريتوف حانسەن-برەيۆيك. ادۆوكات اتاپ وتكەندەي, برەيۆيك ءالى جالعىز ادامدىق كامەرادا تۇرادى. زاڭگەر بۇل جاعدايدى تۇتقىننىڭ قۇقىعىن بۇزۋ دەپ سانايتىنىن دا جاسىرمادى.
ايتا كەتەيىك, 2011 جىلدىڭ 22 شىلدەسىندە برەيۆيك وسلودا سەگىز ادامدى جانە ۋتەيا ارالىنداعى نورۆەگيالىق جۇمىسشىلار پارتياسىنىڭ جازعى جاستار لاگەرىندە 69 ادامدى ءولتىردى. سوت ونى 21 جىلعا باس بوستاندىعىنان ايىرعان. ۇستالعاننان كەيىن برەيۆيك شابۋىل جاساعانىن بىردەن مويىندادى, بىراق ول ءالى دە ءوزىن كىنالى دەپ سانامايدى. ول نورۆەگيالىق مادەنيەتتىڭ قۇلدىراۋىن توقتاتۋ ءۇشىن ءوزىن-ءوزى قورعاۋ اياسىندا تەرروريستىك شابۋىلدار جاساعانىن بىرنەشە رەت ايتقان بولاتىن.
