سورەدە – جەرگىلىكتى شارۋا ونىمدەرى

قوعام • 16 قىركۇيەك، 2020

سورەدە – جەرگىلىكتى شارۋا ونىمدەرى

12 رەت كورسەتىلدى

بۇگىندە اقتوبە وبلىسىنىڭ استىقتى اۋداندارى – العا، ايتەكە بي، قارعالى، قوبدا، مارتوك، حرومتاۋ اۋداندارى ەگىن ورۋدى اياقتاۋعا جاقىندادى.

بايان قۋاندىققىزى

شارۋالار قىركۇيەكتىڭ سوڭعى كۇندەرىنە دەيىن اۋا رايى بۇزىلىپ كەتپەسە، جۇمىستى تولىق اياقتايمىز دەپ وتىر. ايتەكە بي اۋدانىنىڭ شارۋا قوجالىقتارى كوكتەمدە 219 مىڭ گەكتارعا ءدان سەپكەن بولسا، ونىڭ 168 مىڭى – ءداندى داقىل، 17 مىڭى – مال ازىعى، 4 مىڭى مايلى داقىلدار بولاتىن. الايدا جازداعى قۋاڭشىلىق ەگىن شىعىمدىلىعىنا اسەر ەتكەندىكتەن، اۋدان القاپتارىندا بيىلعى استىق ءتۇسىمى گەكتارىنا 6 تسەنتنەردەن اينالىپ وتىر.

مارتوك اۋدانىندا 126 مىڭ گەكتار القاپقا ەگىس ەگىلسە، ونىڭ 62 مىڭ گەكتارى – ءداندى داقىل، 195 گەكتارى – تارى، 5142 گەكتارى – كۇنباعىس پەن جۇگەرى. اۋداندا ارپا-بيداي ەگىپ، كوكونىس وسىرەتىن 186 شارۋا قوجالىعى تىركەلگەن. جەرى قۇنارلى مارتوك اۋدانىنىڭ ەگىنشىلەرى كۇزدىك بيداي، تارى، جۇگەرى، كۇنباعىس ءوسىرۋدى جاقسى جولعا قويا باستادى. سونىڭ ىشىندە جۇگەرىنى سىعىمدالعان كۇيىندە ەكسپورتتاۋ جاقسى تابىس كوزى ەكەنىن ءتۇسىندى. وسى اۋداندا تاۋارلى ءسۇت فەرمالارىنىڭ كوبەيۋىنە بايلانىستى ءىرى قارا ازىعى ءۇشىن كۇزدىك بيداي ەگىستىگى كولەمى ۇلعايىپ كەلەدى. مارتوك اۋدانىنىڭ شارۋالارى بيىل كۇزدىك بيداي ءدانىن كوبىرەك سەبۋگە ازىرلەنسە، ال ەرتە كوكتەمدە ەككەن وسى داقىلدىڭ قازىرگى ءونىمى ءار گەكتارعا 13،5 تسەنتنەردەن كەلىپ وتىر.

قوبدا، مارتوك، قارعالى اۋداندارى 30 جىل بۇرىن كوكونىس وسىرۋمەن ايگىلى بولسا، سوڭعى جىلدارى وسى داقىلداردى ەگۋدى مۇلدە ۇمىتتى دەۋگە بولادى. وسى كەزگە دەيىن جەرگىلىكتى رىنوكتى رەسەي فەدەراتسياسىنىڭ استراحان، ورىنبور، سامارا وبلىستارىنىڭ كوكونىستەرى مەن ءسۇت ونىمدەرى جاۋلاپ السا، قازىر اۋىلداعى قوجالىقتاردىڭ ونىمدەرى اقتوبە قالاسى مەن اۋدان ورتالىقتارىنداعى دۇكەن سورەلەرىنە ءتۇسىپ جاتىر.

وسىلايشا ىندەتكە بايلانىستى رەسەيدەن كارتوپ، ءسابىز، قىرىققابات اكەلىنبەگەندىكتەن، اقتوبەنىڭ سۋپەرماركەتتەرى مەن بازار سورەلەرىندە جەرگىلىكتى ونىمدەردىڭ ساۋدالانا باستاعانى اۋىلداعى شارۋا قوجالىقتارىن ىنتالاندىرۋدىڭ ءتيىمدى جولى بولدى دەۋگە بولادى.

دەگەنمەن، ەگىن وراعى تولىق اياقتالعان سوڭ وڭىردەگى قوجالىقتاردىڭ جۇمىستارىنا تولىق تالداۋ جۇرگىزىلىپ، قوجالىق يەلەرىنىڭ بارىمەن اشىق اڭگىمە وتكىزۋ قاجەتتىگى باسى اشىق ماسەلە بولىپ وتىر. ويتكەنى، شارۋالارى كەلىسپەي وتىرعان ۇساق شارۋاشىلىقتار يەلەرىنىڭ جەردى پايدالانۋ، سۋبسيديا الۋ، تەحنيكا ليزينگىنە قاتىستى ماسەلەلەرى وتە كوپ.

اقتوبە وبلىسى