"بۇگىن – وتباسى كۇنى. بۇل مەرەكە ەلىمىزدە بىرنەشە جىلدان بەرى قىركۇيەكتىڭ ءار ەكىنشى جەكسەنبىسىندە اتاپ وتىلەدى. ادەتتە جەكە ءومىرىم تۋرالى ايتپايتىنمىن, بىراق بۇگىن جازۋدى ۇيعاردىم. مەن كوپبالالى وتباسىندا دۇنيەگە كەلدىم: مەنەن بولەك وتباسىمىزدا تاعى بەس بالا بار. اكەم 6 جاسىمدا قايتىس بولدى, كەيىن انامىزعا بارلىق اۋىرتپاشىلىقتى ەڭسەرۋگە تۋرا كەلدى. سول كەزدە انام 40 جاسقا دا تولماعان ەدى, بىراق ماعان جاسى كەلگەن كىسى سياقتى كورىنەتىن. ونى ءوزىڭ سول جاستا بولعاندا عانا جاقسى تۇسىنەدى ەكەنسىڭ", دەپ جازادى مينيستر.
مينيستر توقسانىنشى جىلدارى اناسىنا وتە قيىن بولعانىن ايتادى.
"اۋىلدا تۇردىق, انامىز جۇمىستان بولەك بىزبەن, شارۋاشىلىقپەن اينالىستى. ءبىر-بىرىمىزگە كومەكتەستىك. سۋ تاسىدىق, شارۋاشىلىققا ارالاسىپ, مالعا ءشوپ دايىندادىق, پەش جاقتىق. ۇيدەگى ەرەسەكتەر ارتىنان ەرگەن باۋىرلارىنا ۇيرەتتى, ال كىشىلەر ۇلكەندەرگە كومەكتەستى. بۇل قيىن كەزەڭنىڭ ماعان ۇيرەتكەنى مول, اسىرەسە جاقىندارىمنىڭ, وتباسىمنىڭ قانشالىقتى قىمبات ەكەنىن ۇعىندىردى", دەيدى ول.
اسحات ايماعامبەتوۆ بۇگىن دە ەكى بالانىڭ اكەسى. جۇمىستان كەيىن بالالارى مەن جارى ۇيدە قارسى العاندا بارلىق قيىندىقتى ۇمىتاتىنىن جازادى.
"اڭگىمەلەسىپ, بالالارمەن بىرگە ويناعاننان شارشاعانىڭ باسىلادى, راقاتتانىپ قالاسىڭ. جىگەرلەندىرىپ, كۇش-قايرات بەرەتىن دە – وتباسىم. جاقىندارىمىزدى باعالايىق. "وتان وتباسىنان باستالادى" دەيدى دانا حالقىمىز. ءار وتباسىنىڭ دامۋى ارقىلى ەلىمىز دە گۇلدەنە بەرەدى. مەرەكە قۇتتى بولسىن, دوستار! بارلىعىڭىزعا زور دەنساۋلىق, وتباسىلارىڭىزعا بەرەكە تىلەيمىن!", دەپ تۇيىندەدى مينيستر.
