ءىس-شارا وتباسى ينستيتۋتىن ناسيحاتتاۋ, كوپبالالى انالارعا كورسەتۋ ماقساتىندا ۇيىمداستىرىلىپ وتىر. شاراعا كوپبالالى انالار, ەتنومادەني بىرلەستىكتەردىڭ وكىلدەرى مەن بەلسەندى قوعام قايراتكەرلەرى, سونداي-اق نۇر-سۇلتان قالاسى قحا انالار كەڭەسىنىڭ مۇشەلەرى قاتىستى.
"وتباسى كۇنىنە وراي قوعامدا بەلسەندى جۇمىس اتقارىپ, ەڭبەكتە تابىستى بولعان, ىسكەر ايەلدەردىڭ فوتوكورمەسىن ۇيىمداستىرىپ وتىرمىز. بارلىعى 24 ايەل مەن ولاردىڭ وتباسىلارىنىڭ فوتولارى بار. اسسامبلەيا جانىندا بىرنەشە قوعامدىق قۇرام قىزمەت اتقارادى. سولاردىڭ ءبىرى ءارى بىرەگەيى ەلوردالىق قحا-نىڭ انالار كەڭەسى. كەڭەس مۇشەلەرىنىڭ فوتوسۋرەتتەرى دە وسى كورمەگە قويىلعان", دەدى نۇر-سۇلتان قالاسى ىشكى ساياسات باسقارماسىنىڭ ءبولىم باسشىسى ءلاززات قۇسايىنوۆا.
بيىل قازاقستان حالقى اسسامبلەياسىنىڭ 25 جىلدىعى. مەرەكەلىك ارنايى شىعارىلعان توسبەلگىلەردى انالار كەڭەسىنىڭ بەلسەندى مۇشەلەرىنە كورمە اياسىندا ءلاززات قۇسايىنوۆا تابىستادى. ولاردىڭ قاتارىندا ناتاليا رۋدوي, سارسەنگۋل زياۆدينوۆا, كامەتا يبراەۆا, حانيفا ماتسيەۆا, شاپاات نۋراحۋنوۆا بار.
"انالار كەڭەسى العا قويعان بارلىق مىندەتتەردى ىسكە اسىرىپ كەلەدى. ەلىمىزدە ورىن العان توتەنشە جاعدايلارعا قاراماستان, قوعام بەلسەندىلەرى سانالاتىن نازىك جاندىلار قايىرىمدىلىق ءىس-شارالارىمەن قاتار, پسيحولوگيالىق قولداۋ كورسەتۋ فۋنكتسياسىن اتقاردى. بۇگىنگى فوتوكورمە, بۇگىنگى ايەلدەر - انا ءوز جانۇياسىن قورعاۋشى ەكەنىنىڭ دالەلى", دەدى نۇر-سۇلتان قالاسى قحا انالار كەڭەسىنىڭ توراعاسى التىناي تاڭىربەرگەنوۆا.
