قىلمىستىق توپتىڭ قۇرامىندا قازاقستان, رەسەي جانە باحرەين ازاماتتارى بولعان. ولار باحرەيندە سەكسۋالدى ەكسپلۋاتاتسيا ماقساتىندا قىزداردىڭ, سونىڭ ىشىندە كامەلەتكە تولماعانداردىڭ ساۋداسىمەن اينالىسقان. ءىىم-ءنىڭ مالىمەتىنشە قىلمىستىق توپ ۇزاق ۋاقىت بويى 16-25 جاس ارالىعىنداعى قىزداردى ىزدەپ, وزدەرىنە تارتقان. ك وزدەگەن ادامدارىن اسىرەسە, قازاقستاننىڭ وڭتۇستىگىندە حالىقتىڭ الەۋمەتتىك از قامتىلعان توبىنان ىزدەگەن.
"قىلمىسكەرلەر ادامداردىڭ سەنىمىن پايدالانىپ, شەتەلدە كوپ اقشا تابۋعا بولاتىنى جونىندە وتىرىك سوزگە سەندىرگەن. بويجەتكەندەر كەلىسكەننەن كەيىن ولاردىڭ قۇجاتىن راسىمدەۋ, زارداپ شەگۋشىلەردى, ونىڭ ىشىندە كامەلەتكە تولماعانداردى زاڭدى جولمەن باحرەين كورولدىگىنە الىپ شىعۋدى ۇيىمداستىرعان. باحرەينگە جەتكىزىلگەن ءاربىر بويجەتكەندى قىلمىسكەرلەر 5 مىڭنان 15 مىڭ اقش دوللارىنا دەيىن ساتقان. ماناماعا كەلگەننەن كەيىن ولاردىڭ قۇجاتتارىن تارتىپ الىپ, زاڭسىز باس بوستاندىعىنان ايىرىپ, ۇزاق ۋاقىت بويى جەزوكشەلىكپەن اينالىسۋعا ماجبۇرلەگەن. باعىنباعان جاعدايدا ساباپ, 500 مىڭ تەڭگەگە دەيىن اقشالاي ايىپپۇل سالىپ, ءتىپتى باسقا جەڭگەتايلارعا ساتىپ جىبەرەتىندەرىن ايتىپ قورقىتقان", دەپ حابارلايدى ءىىم-نەن.
قازىرگى ۋاقىتتا اتالمىش فاكتىلەر بويىنشا قر 135-بابى 4-بولىگى 2-تارماعى (كامەلەتكە تولماعانداردىڭ ساۋداسى) جانە 128-بابى 3-بولىگى (ادام ساۋداسى) بويىنشا سوتقا دەيىنگى تەرگەۋ امالدارى جۇرگىزىلىپ جاتىر. ۇيىمداستىرۋشىلار ۇستالىپ, ۋاقىتشا وقشاۋلاعىشقا قامالعان. ەسكە سالا كەتسەك, بيىلعى جىل باسىندا باحرەيندە سەكسۋالدى قۇلدىقتا بولعان قازاقستاندىق بويجەتكەندەر ەلگە قايتارىلعان بولاتىن. بۇل تۋرالى قر سىرتقى ىستەر مينيسترلىگىنەن ءمالىم ەتكەن ەدى.
