قۋانىشتى جاڭالىققا الدىمەن تالدىساي اۋىلىنىڭ تۇرعىندارى كۋا بولدى. اتالعان اۋىلدا ۇزىندىعى 18 732 م بولاتىن قۇبىر ارقىلى 408 تۇرعىن ءۇي, 23 الەۋمەتتىك نىسان كوگىلدىر وتىنعا قول جەتكىزبەك. اۋىلىشىلىك گاز قۇبىرىنىڭ العاشقى ىسكە قوسۋ راسىمىنە وبلىس اكىمى وڭداسىن ورازالين ارنايى قاتىستى.
ايماق باسشىسىنىڭ ايتۋىنشا, وتكەن جىلى تالدىساي, جامبىل, ەڭبەكتۋ اۋىلدارىنا گاز قۇبىرىن سالۋ جۇمىستارىنا قاراجات بولىنگەن. بۇگىندە اۋدان تۇرعىندارىنىڭ 47,8%-ى كوگىلدىر وتىن يگىلىگىن كورۋدە. جىل سوڭىنا دەيىن بۇل كورسەتكىشتى 56,4 پايىزعا دەيىن جەتكىزىلەدى.
جۇمىس ساپارىن ەڭبەكتۋ اۋىلىندا قورىتىندىلاعان وبلىس اكىمى ەلدىمەكەن تۇرعىندارىنىڭ كوپتەن كۇتكەن قۋانىشىنا ورتاقتاسىپ, گاز قۇبىرىنىڭ ىسكە قوسىلۋىنا كۋا بولدى. مۇندا 59 ملن تەڭگەگە ىسكە اسىرىلعان گاز قۇبىرىنىڭ ۇزىندىعى 6,4 كم قۇرايدى.
وبلىس اكىمى وڭداسىن ورازالين ايتەكە بي اۋدانىنىڭ باسشىسى دارحان ەرماعانبەتوۆكە يندۋستريالدى-يننوۆاتسيالىق دامۋ باعدارلاماسى مەن مەملەكەتتىك جانە جەكە ارىپتەستىك شەڭبەرىندە جوبالاردى ىسكە اسىرۋدى, شاعىن جانە ورتا بيزنەس سالاسىن دامىتۋدى تاپسىردى.
