قر ۇلتتىق ۇلانى "باتىس" وڭىرلىك قولباسشىلىعى ءباسپاسوز قىزمەتىنىڭ باستىعى, پودپولكوۆنيك ەربولات سۇلتانوۆتىڭ ءمالىم ەتكەنىندەي, وقيعا 11 قىركۇيەك كۇنى ساعات 19.30 شاماسىندا "ورال" حالىقارالىق اۋەجايى ماڭىندا بولدى.
ۇلكەن جىلدامدىقپەن كەلە جاتقان "ۆاز-2114" اۆتوكولىگىنىڭ جۇرگىزۋشىسى رۋلگە يە بولا الماي, سونىڭ سالدارىنان بىرنەشە رەت اۋدارىلىپ تۇسكەن. جۇرگىزۋشى اۆتوكولىككە قىستىرىلىپ قالىپ, وزدىگىنەن شىعا الماعان.
سول ساتتە 5517-اسكەري ءبولىم كومانديرىنىڭ ورىنباسارى, مايور مەلس دۋلاتباەۆ پەن كەلىسىمشارتپەن قىزمەت ەتەتىن اسكەري ءبولىم مەديتسينالىق پۋنكتىنىڭ مامانى, قاتارداعى جاۋىنگەر يسا نۇرعاليەۆ "سۇڭقار" وقۋ ورتالىعىنان قايتىپ كەلە جاتقان. ولار وقيعا ورنىنا شۇعىل جەتىپ, قىستىرىلىپ قالعان ەر ادامدى بوساتىپ العان. سودان كەيىن يسا نۇرعاليەۆ جەدەل جاردەم كەلگەنگە دەيىن زارداپ شەگۋشىگە العاشقى دارىگەرلىك كومەك كورسەتكەن.
"جۇرگىزۋشى اشىق باس-مي جاراقاتىن الىپ, ەداۋىر قان جوعالتقان ەكەن, قان قىسىمى دا تومەن بولدى. قيىن جاعدايدا قالعان ادامعا جاردەم بەرۋ ءبارىمىزدىڭ بورىشىمىز دەپ بىلەمىن", دەدى يسا نۇرعاليەۆ.
ادام ءومىرىن قۇتقارۋ كەزىندە كورسەتكەن كاسىبي قىزمەتى ءۇشىن ي.نۇرعاليەۆ «باتىس» وڭىرلىك قولباسشىسىنا ىنتالاندىرۋعا ۇسىنىلدى.
