قوعام • 12 قىركۇيەك، 2020

قازاقستان جاستارىنىڭ نەگىزگى پروبلەمالارى تالقىلاندى

41 رەت كورسەتىلدى

نۇر-سۇلتاندا "JASTAR: ózekti másele" پىكىرتالاس الاڭىنىڭ العاشقى ءماجىلىسى ءوتىپ، ساراپشىلار مەملەكەت باسشىسىنىڭ "جاڭا جاعدايداعى قازاقستان: ءىس-قيمىل كەزەڭى" جولداۋى مەن قازاقستان جاستارى دامۋىنىڭ وزەكتى ماسەلەلەرىن تالقىلادى، دەپ حابارلايدى Egemen.kz

قازاقستان حالقىنا ارناعان جولداۋىندا پرەزيدەنت بۇگىنگى كۇننىڭ باستى ماقساتى – ساپالى ۇلت قالىپتاستىرىپ، حالىقتىڭ دامۋىنىڭ جاڭا پاراديگماسىن قۇرۋ ەكەندىگىن اتاپ ءوتتى. سونداي-اق ەل الدىندا تۇرعان كۇردەلى دە، ۇلكەن ماسەلەلەردى ءساتتى شەشۋ ءۇشىن جاڭا كوزقاراس، ورتاق جۇيە جانە جان-جاقتى قولداۋ قاجەت. وسى ورايدا "رۋحاني جاڭعىرۋ" قازاقستاندىق قوعامدىق دامۋ ينستيتۋتىنىڭ جانىنداعى "جاستار" عىلىمي-زەرتتەۋ ورتالىعى "JASTAR: ózekti másele" الاڭىن باستادى.

اشىق پىكىرتالاس ۇيىمداستىرىپ، جاڭا كوزقاراستاردىڭ اتىرابىن ءبىر توراپقا توعىستىرۋ ءۇشىن العاشقى ماجىلىسكە جاس تا بولسا، تاجىريبەسى مول، ۇلكەن جوبالاردا ءىرى جەتىستىكتەرگە قول جەتكىزىپ، ءوز سالالارىندا ايتۋلى پروبلەمالاردىڭ ءتۇيىنىن شەشىپ جۇرگەن جاستار توبى شاقىرىلدى. قازاقستان رەسپۋبليكاسى اقپارات جانە قوعامدىق دامۋ ۆيتسە-ءمينيسترى اسقات ورالوۆتىڭ ايتۋىنشا، "JASTAR: ózekti másele" الاڭى قوعامداعى وزەكتى ماسەلەلەردى ءار سالاداعى بىلىكتى ماماندارمەن بىرگە اتقارىپ شەشۋ ءۇشىن تاپتىرماس ورىن.

"جاھاندىق پاندەميا قوعامنىڭ الەۋمەتتىك-ەكونوميكالىق جاعدايىنا ۇلكەن وزگەرىستەر جاساپ، كۇندەلىكتى تۇرمىس-تىرشىلىككە تۇبەگەيلى تۇزەتۋ ەنگىزدى. وسى ورايدا مەملەكەت باسشىسىنىڭ «جاڭا جاعدايداعى قازاقستان: ءىس-قيمىل كەزەڭى» جولداۋى بارلىق تۇيتكىلدى ماسەلەلەردىڭ شەشىمىن تابۋعا سەرپىن بەرۋى ءتيىس. پرەزيدەنت ادام كاپيتالىنىڭ دامۋىنا دا ۇلكەن ءمان بەردى. وسى ورايدا، ەرتەڭگى قوعامنىڭ نەگىزگى ىرگەتاسى بۇگىنگى وسكەلەڭ ۇرپاق، ياعني جاستار ەكەنىن ەسكەرۋىمىز كەرەك"، دەدى اسحات ورالوۆ.

ءوز كەزەگىندە ماجىلىسكە قاتىسۋشىلار پرەزيدەنت جولداۋىنىڭ نەگىزگى باعىتتارىن تالقىلاپ، قازاقستان جاستارىنىڭ ماسەلەسىنە دە توقتالدى. وسى ورايدا، ساراپشىلار تاراپىنان حالىقتىڭ ساناسىن جاڭعىرتۋعا باعىتتالعان باستامالار دا ۇسىنىلدى. سونىمەن قاتار، پاندەميا كەزىندە جاس مامانداردى جۇمىسپەن قامتۋ ماسەلەسى دە كوتەرىلىپ، الەۋمەتتىك كاسىپكەرلىككە كوڭىل بولۋگە شاقىردى. "Green TAL" الەۋمەتتىك شەبەرلىك قوعامىنىڭ نەگىزىن قالاۋشى ەمين اسكەروۆتىڭ پىكىرىنشە، بۇگىنگىنىڭ باستى ماقساتتارىنىڭ ءبىرى – پاتريوت جاستاردى تاربيەلەپ، سانالى قوعام قالىپتاستىرۋ.

"پاندەميادان تۋعان داعدارىستىڭ سالدارىنان قازىر جۇمىس ورىندارى قاتتى قىسقارىپ جاتىر. ناتيجەسىندە، اۋىلداردا مارگينال جاستار كوبەيىپ كەتتى. سونداي-اق شەتەلگە ءبىرجولا كەتىپ قالۋدى اڭسايتىن جاستاردىڭ دا كوپتىگى الاڭداتادى. وسىنداي جاعدايلارعا توسقاۋىل بولۋ ءۇشىن ەلدەگى ەكونوميكالىق جاعدايدى جاقسارتىپ، جاستاردىڭ ساناسىن جاڭعىرتاتىن جوبالار قاجەت. وسى ورايدا الەۋمەتتىك كاسىپكەرلەردى قولداۋىمىز كەرەك. ولاردىڭ سانى قازاقستاندا 250 عانا. سالىستىرمالى تۇردە ايتايىق، ۇلىبريتانيادا 70 مىڭ الەۋمەتتىك كاسىپكەرلىك توپ تىركەلسە، اقش-تا ولاردىڭ سانى 160 مىڭنان اسادى ەكەن. جالپى مىنانى ءتۇسىنۋىمىز كەرەك: الەۋمەتتىك بيزنەس تۇتىنۋشىلاردىڭ ناقتى ءبىر پروبلەمالارىن شەشۋ ماقساتىندا پايدا بولىپ، قوعامنىڭ الەۋمەتتىك وسال توپتارىنىڭ ماسەلەلەرىن شەشەدى. سوندىقتان، مۇنداي جوبالاردى قولداۋ ارقىلى ءبىز حالىقتىڭ الەۋمەتتىك احۋالىن جاقسارتامىز"، دەدى ەمين اسكەروۆ.

ءماجىلىستىڭ قورىتىندىسى بويىنشا ساراپشىلاردىڭ بارلىق ۇسىنىستارىن سالالىق مامانداردىڭ وڭدەۋىنە بەرىلىپ، ءارى قاراي جۇزەگە اسىرىلۋى ءۇشىن ءتيىستى جۇمىستار جۇرگىزىلەتىن بولادى. "رۋحاني جاڭعىرۋ" ققدي باسقارماسىنىڭ توراعاسى دانيار ەسيننىڭ ايتۋىنشا، الەمنىڭ دامىعان 30 ەلىنىڭ قاتارىنا كىرۋ ءۇشىن قوعام بولىپ بىرىگىپ، كوزى اشىق، باسەكەگە قابىلەتتى جاستاردى بىرلەسە تاربيەلەۋىمىز قاجەت.

"بيىل "رۋحاني جاڭعىرۋ" باعدارلاماسىنا 3 جىل جانە ونىڭ باستى ۇستانىمدارى كوپ جاعدايدا جاستارعا ارنالعان. سوندىقتان جاستار ساياساتى تۇرعىسىنداعى ماسەلەلەردى شەشۋ جانە قوعام اراسىنداعى بايلانىستى ورناتۋ قۇندى دۇنيە. وسىنداي پىكىرتالاس الاڭدارىن ۇيىمداستىرىپ، جاستاردىڭ زاماناۋي كوزقاراسى ارقىلى قوعامنىڭ تۇيتكىلدى ماسەلەلەرىن وڭتايلى شەشۋگە ابدەن بولادى"، دەدى دانيار ەسين.

دوڭگەلەك ۇستەلگە قر اقپارات جانە قوعامدىق دامۋ ۆيتسە-ءمينيسترى اسحات ورالوۆ، "رۋحاني جاڭعىرۋ" ققدي" باسقارماسىنىڭ توراعاسى دانيار ەسين، قر اقپارات جانە قوعامدىق دامۋ مينيسترلىگى جاستار جانە وتباسى كوميتەتىنىڭ توراعاسى شاحماردان بايمانوۆ، "جاستار" عزي ديرەكتورى ايان ساكوشەۆ، قر پارلامەنتىنىڭ سەناتى اپپارات جەتەكشىسىنىڭ ورىنباسارى ماكسيم سپوتكاي، "اتامەكەن" قر ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ولجاس ورداباەۆ، قر جوعارعى سوت اپپاراتى جەتەكشىسىنىڭ ورىنباسارى نۇرسۇلتان بايتىلەسوۆ، قر كاسىپوداقتارى فەدەراتسياسىنىڭ توراعاسىنىڭ ورىنباسارى قايرات جانابەكوۆ، "Green TAL" الەۋمەتتىك شەبەرلىك قوعامىنىڭ نەگىزىن قالاۋشى ەمين اسكەروۆ، سونداي-اق، عىلىمي جانە شىعارماشىلىق قوعامداستىقتىڭ وكىلدەرى، قوعام قايراتكەرلەرى مەن ساراپشىلار قاتىستى.

سوڭعى جاڭالىقتار

ەلەنگەن ەرلىك

ايماقتار • بۇگىن، 13:22

ۇقساس جاڭالىقتار