ناقتىراق ايتقاندا ىرىكتەلىپ, رەزەرۆكە ەنگەن جاستارمەن كەزدەسۋگە اقپارات جانە قوعامدىق دامۋ ءمينيسترى ايدا بالاەۆا, تسيفرلىق دامۋ, يننوۆاتسيالار مەن اەروعارىش ونەركاسىبى ءمينيسترى باعدات مۋسين, پرەزيدەنت اكىمشىلىگى باسشىسىنىڭ ورىنباسارى مالىك مىرزالين, سونداي پرەزيدەنتتىڭ كومەكشىسى ەرلان قارين شاقىرىلعان.
باسقوسۋدىڭ باستى ماقساتى – پرەزيدەنت جولداۋىن تالقىلاپ, الداعى ۋاقىتتا پرەزيدەنتتىك جاستار كادرلىق رەزەرۆىن دامىتىپ, جۇزەگە اسىرۋدى جوسپارلاۋ. «پرەزيدەنت جولداۋىنىڭ بىرەگەي سيپاتى بار.
سەبەبى ول قازىرگى قازاقستاندى جۇيەلى تۇردە ترانسفورماتسيادان وتكىزۋدىڭ كەشەندى شارالارىنان تۇرادى. البەتتە ونى ءتيىمدى تۇردە جۇزەگە اسىرۋ ءۇشىن مەملەكەت پەن قوعام بىرلەسە ەڭبەك ەتۋى كەرەك.
ەڭ باستىسى قوعامعا جولداۋدىڭ نەگىزگى اسپەكتىلەرىن, ونى ىسكە اسىرۋدىڭ ناقتى جوسپارلى شارالارىن جەتكىزە بىلگەن ابزال. بۇل باعىتتا جولداۋدى ءتۇسىندىرۋ جۇمىستارى قىزۋ جۇرگىزىلىپ جاتقانىن اتاپ ءوتۋ كەرەك», - دەدى ايدا بالاەۆا جاستارمەن كەزدەسۋى بارىسىندا. ءمينيستردىڭ ايتۋىنشا, ءار ادامنىڭ وسى كەشەندى شارالارعا اتسالىسۋى – جولداۋدى جۇزەگە اسىرۋدىڭ بارىنشا ساتتىلىگىن كورسەتەدى.
"10 كۇننىڭ ىشىندە جولداۋداعى تالقىلاۋعا قاتىستى قانشاما كەزدەسۋ مەن باسقوسۋ ءوتتى. رەسپۋبليكالىق جانە ايماقتىق بۇقارالىق اقپارات قۇرالدارىندا 5 مىڭعا تارتا ماتەريال جاريالاندى. ساراپشىلار جولداۋدىڭ كوپ بولىگى بۇعان دەيىنگى ازاماتتاردىڭ وتىنىمدەرىن ەسكەرگەنىن كورسەتەتىنىن ايتادى. ياعني بۇل دەگەنىمىز «حالىق ۇنىنە قۇلاق اساتىن مەملەكەت» تۇجىرىمداماسىنىڭ جۇمىس ىستەپ تۇرعانىن كورسەتەدى. دەمەك قوعاممەن ءوزارا تىعىز قارىم-قاتىناس بار. مەملەكەت حالىقتىڭ ۇنىنە قۇلاق اسىپ وتىر. جولداۋدىڭ 11 باعىتى دا قوعامنىڭ سۇرانىسىنا جاۋاپ بەرەدى", دەدى ول.
