ءبىز وسىدان ەكى كۇن بۇرىن شىعىس قازاقستان وبلىسىندا 15 جىل جوعالىپ كەتىپ, «ولدىگە» سانالعان ايەلدىڭ وتباسىنا ورالعانى تۋرالى جازعانبىز. بۇل تۋرالى وسكەمەننىڭ yk.kz سايتى حابارلادى.
ءسوز بولىپ وتىرعان ءلاززات بەيسەقانوۆا (سۋرەتتە) 1999 جىلى وتباسىن اسىرايتىن تابىس تابۋ ءۇشىن ءوزى تۇراتىن تارباعاتاي اۋدانىنداعى تۇعىل اۋىلىنان الماتىعا اتتانادى. ۇيدە ءۇش بالاسى مەن كۇيەۋى قالادى. بىراق وڭتۇستىك استاناعا بارعان بويىندا كولىكتىڭ استىنا ءتۇسىپ قالىپ, اۋرۋحاناعا جاتىپ شىعادى. وسىدان باستاپ ايەل جادىنان ايرىلىپ, ءوزىنىڭ كىم ەكەنىن جانە قايدان كەلگەنىن ەسىنە تۇسىرە المايدى. كەسەلحانادان وسىنداي قالىپتا شىققان ونى سوندا سانيتار بولىپ جۇمىس جاسايتىن ايەل الىپ كەتىپ, ۇيىنە پانالاتادى. ءۇي يەسىنە العىسى رەتىندە ءلاززات سوسىن ونىڭ باسپاناسىن جوندەپ بەرەدى. مۇنىڭ جاساعان جۇمىسىن ۇناتقان سانيتار ايەل كەيىن قۇربىسىنا تاپسىرىس بەرگىزەدى. وسىلايشا ءلاززات تابىس تابۋدىڭ ءبىر كوزىنە يە بولادى. كەيىنىرەك ءتىپتى پاتەر جالداپ تۇرۋعا دا شاماسى جەتەدى.
بىراق وسى جىلداردىڭ بارىندە وعان ءوزىنىڭ قايدان كەلگەنىن, تۋىستارى كىمدەر ەكەنىن بىلۋگە دەگەن قۇشتارلىق مازا بەرمەيدى. اقىرىندا سول ويمەن ول جەرگىلىكتى ءبىر بالگەر ايەلگە جولىعادى. ال كورىپكەل: «سەن ءوزىڭنىڭ كۇندە بارىپ جۇرگەن جەرىڭە بارا بەر. ىزدەگەنىڭدى سول جەردەن تاباسىڭ», - دەيدى. ايتقانىنداي,
ارادا بىرنەشە كۇن وتكەندە, ءوزى كۇندە ازىق-ت ۇلىك ونىمدەرىن الىپ جۇرگەن دۇكەنگە بارعانىندا, قارسى الدىنان تۇعىلدا كورشى تۇرعان تانىس ايەلى كەزدەسە كەتەدى. ءلاززاتتى ءتىرى كورگەنىنە ەسى شىعىپ كەتكەن ايەل سول بويدا تۇعىلعا قوڭىراۋ شالادى..
بۇدان ارعىسى بەلگىلى. وتكەن سەنبى كۇنى تۋعان-تۋىستارى ءلاززاتتى ستانسادا كۇتىپ الدى. جادىنان ايرىلعان ايەلدىڭ ءبىرىنشى تانىعانى ءوزىنىڭ تۋعان ءسىڭلىسى بولىپتى. ال ون بەس جىلدا ەلدە كوپ نارسە وزگەرىپتى. جالعىز ۇلى قايتىس بولىپ كەتىپتى. ۇلكەن قىزى تۇرمىسقا شىعىپ, ەكى بالانىڭ اناسى اتانىپتى. اناسى كەتكەندە 4 جاستا بولعان كىشى قىزى قىمبات ءۇشىنشى كۋرستىڭ ستۋدەنتى ەكەن. كۇيەۋى سودان بەرى ۇيلەنبەپتى.
قازىر ءلاززاتتىڭ ءوزىن دارىگەرلىك تەكسەرۋدەن وتكىزىپ الۋ كەرەك. ەمدەلىپ بولعاسىن ۇيىنە جىبەرىلەدى.
مۇرات ايتقوجا.
