ايماقتار • 10 قىركۇيەك، 2020

جيىن-تەرىن اياقتالۋعا جاقىن

بيىل اقتوبە وبلىسىنىڭ شارۋالارى 445 مىڭ گەكتار جەرگە ءداندى داقىل، 46 مىڭ 200 گەكتارعا مايلى داقىل، 104 مىڭ گەكتارعا جوڭىشقا، جۇگەرى، ارپا سياقتى مال ازىعىن، 3310 گەكتارعا كوكونىس وتىرعىزدى. كوكتەمدەگى كولىك قوزعالىسىنىڭ شەكتەۋلەرىنە قاراماستان، اۋىلشارۋاشىلىق قۇرىلىمدارىنىڭ تەحنيكاسىنا كىدىرىس بولعان جوق ءارى شارۋا قوجالىقتارى ارزان جانار-جاعارمايمەن قامتاماسىز ەتىلدى. سونىڭ ناتيجەسىندە قىركۇيەكتىڭ سوڭعى اپتاسىندا جيىن-تەرىن جۇمىستارى اياقتالماق.

بايان قۋاندىققىزى

بيىلعى بيداي ءتۇسىمى – ءار گەكتاردان 9،5-10 تسەنتنەر. جينالعان استىق جالپى سىيىمدىلىعى 500 مىڭ توننا بولاتىن جەتى ەلەۆاتوردا ساقتالادى. ەكى ەلەۆاتور – اقتوبە قالاسىندا، قالعاندارى العا، مارتوك، قارعالى، قوبدا، حرومتاۋ اۋداندارىنىڭ ورتالىقتارىندا ورنالاسقان. ودان وزگە ەلدى مەكەندەردە شارۋا قوجالىقتارىنىڭ استىق ساقتايتىن 180 قويماسى بار.

اقتوبەلىك شارۋا قوجالىقتارى ازىرگە استىق ساتۋعا ونشا ىقىلاستى ەمەس. ويتكەنى الەمدەگى بيداي باعاسى قىسقا تاياۋ كۇرت كوتەرىلەدى دەگەندى ەستىگەن سوڭ شارۋالار ساقتاۋعا مۇمكىندىك بولسا، بيدايدى قامبادا ۇستاي تۇرۋدى تيىمدىرەك سانايدى. بۇل ءۇشىن ءداندى داقىلداردى شىرىتپەي ۇزاقمەرزىمدى ساقتاۋعا لايىق قامبالار جەلىسىن جاڭارتۋ، استىق ونىمدەرىن وڭدەيتىن كاسىپورىندار جەلىسىن كوبەيتۋ – وڭىرلەردەگى ماقساتتى جوبالاردىڭ بىرىنە اينالۋى ءتيىس.

بيىل رەسپۋبليكالىق بيۋدجەتتەن وبلىسقا 19 ملرد تەڭگە سۋبسيديا ءبولىندى. مەملەكەتتىك قولداۋعا قول جەتكىزگەن مارتوك، قارعالى اۋداندارىنىڭ ديقاندارى وڭىردە بۇرىن-سوڭدى وسىرمەگەن بۇرشاق تۇقىمداس مايلى داقىلداردى ءوسىرىپ، جوعارى اگروتەحنيكالىق شارالاردىڭ ناتيجەسىندە مول ءونىم جيناپ، بۇرشاق پەن جوڭىشقا ەكسپورتىنىڭ ءتيىمدى جولدارىن ويلاستىرىپ جاتىر. مال ازىعى داقىلدارىنان جوعارى ءونىم الۋعا بيىل 10 600 گەكتار سۋارمالى جەردى قوسىمشا اينالىمعا ەنگىزۋ مۇمكىندىك بەردى. 2021 جىلى سۋارمالى جەر كولەمى 40،8 مىڭ گەكتارعا ۇلعايتىلىپ، قاراۋسىز قالعان بۇرىنعى سۋ توعاندارى قالپىنا كەلتىرىلمەك. بۇل ءۇشىن قىستا قار توقتاتۋ، كوكتەمدە ەرىگەن قار سۋىن ۇستاپ شاعىن سۋ توعاندارىنا جيناۋ جۇيەلى ىسكە اسىرىلۋى كەرەك.

اقتوبە وبلىسى