وبلىستىڭ وڭتۇستىك اۋداندارىنداعى بىرقاتار شاعىن شارۋاشىلىقتار ازىن-اۋلاق استىعىن شاشاۋسىز جيناپ تا العان. ال ىرگەلى ءىرى شارۋاشىلىقتار ءداندى داقىلدىڭ باسىم بولىگىن ەڭسەرىپ, ەندى مايلى داقىلعا وراق سالدى.
ارقالىق قالاسىنا قاراستى 17 اۋىلدىڭ ديقاندارى بيىل جالپى اۋماعى 270 مىڭ گەكتار القاپقا بيداي ەگىپتى. ديقاندار بۇگىندە وراق ناۋقانىن ەڭسەرىپ تە قالعان. ەگىن شىعىمى جامان ەمەس, ورتا ەسەپپەن گەكتارىنا 7-8 تسەنتنەردەن كەلەدى. تابيعاتى قۋاڭ تورعاي ءوڭىرى ءۇشىن بۇل جاقسى كورسەتكىش, دەيدى ارقالىقتىق ديقاندار.
ال وبلىستىڭ سولتۇستىك اۋداندارىندا تامىز ايىنداعى اپتاپ ىستىق بيدايدىڭ ساپاسىن ءبىرشاما تومەندەتىپ جىبەرگەن. سوعان قاراماستان, بيداي شىعىمى بىلتىرعىدان جوعارى. تاياۋدا وبلىس اكىمى ارحيمەد مۇحامبەتوۆ القاپتاردى ارالاپ, جيىن-تەرىن بارىسىن اڭداپ كوردى.
– ەڭ باستىسى – بار مۇمكىندىكتى پايدالانىپ, جەر ىرىسىن شاشاۋسىز جيناپ الۋ كەرەك. جانار-جاعارماي جەتكىلىكتى, باعا تۇراقتى ساقتالادى. تەحنيكا پاركى دە سايلى. كۇن سايىن مونيتورينگ جۇرگىزىپ وتىرمىز. القاپتاردىڭ 60 پايىزدان استامى ورىلدى. ەندى ەكى اپتاداي كۇن اشىق تۇرسا, بيدايدى تولىق جيناپ الۋعا مۇمكىندىك بار, – دەدى ايماق باسشىسى.
وبلىستىڭ وڭتۇستىك وڭىرلەرىندەگى بىرقاتار شاعىن شارۋاشىلىقتار وراق ناۋقانىن اياقتاپ تا قالعان. «بيىل جەر ىرىزدىعى مول, جانارماي قورى دا جەتكىلىكتى. سوڭعى ءبىر-ەكى جىل بويى ءونىم الا الماي كەلىپ ەدىك. وسى جىلى قوردالانىپ قالعان ءبىراز قارىزىمىزدى جاۋىپ, ءتىپتى پايدا تۇسىرۋدەن دە ۇمىتتەنىپ وتىرمىز, – دەيدى ولار.
قوستاناي وبلىسى
