ساپار بارىسىندا ۇكىمەت باسشىسى سالىنىپ جاتقان كولىك ينفراقۇرىلىمنىڭ ساپاسىنا قاتىستى سىن-ەسكەرتپە ايتىپ, "وسكەمەن - تالدىقورعان" جولىنىڭ جىل سوڭىنا دەيىن ىسكە قوسىلاتىنىن مالىمدەدى. ياعني, رەسپۋبليكالىق ماڭىزى بار كۇرە جولداعى جۇمىس قارقىنى ۇدەي تۇسپەك.
"قايتا جاڭعىرتۋ جۇمىستارى كولىك قوزعالىسى قاۋىپسىزدىگىن ارتتىرىپ, ەلدى مەكەندەر مەن جولعا جاقىن اۋماقتاردىڭ ەكولوگيالىق جاعدايىن جاقسارتادى, سول سياقتى جاڭا جۇمىس ورىندارىن اشا وتىرىپ, جول بويىنداعى كورسەتىلەتىن قىزمەتتى دامىتۋعا ىقپال ەتپەك. جولدىڭ جالپى ۇزىندىعى 768 شاقىرىم بولاتىن بولىگىندەگى قوزعالىستى وسى جىلدىڭ سوڭىنا دەيىن ىسكە قوسۋ جوسپارلانىپ وتىر", - دەدى ءوز سوزىندە پرەمەر-مينيستر اسقار مامين.
ال الماتى وبلىسىنىڭ اۋماعىنداعى ستراتەگيالىق ماڭىزى بار اۆتوجولدىڭ پايدالانۋعا بەرىلۋى وڭىردەگى كولىك قاتىناسىن دا جاڭا ساتىعا كوتەرەتىنى انىق. ويتكەنى, قازىر ايماقتىڭ شىعىسىندا ورنالاسقان اۋداندارمەن اراداعى بارىس-كەلىس سىن كوتەرمەيدى. اسىرەسە, وبلىس ورتالىعىنان شالعايدا جاتقان الاكول اۋدانى, سارقان اۋدانى مەن اقسۋ اۋدانىنىڭ تۇرعىندارى ءۇشىن قالاعا قاتىناۋ قيىن بولىپ وتىر. سونداي-اق, كۇرە جول قۇرىلىسىنىڭ اياقتالۋى ايماقتاعى ىشكى جولداردىڭ جاعدايىنا ءجىتى نازار اۋدارۋ قاجەتتىگىن دە كۇن تارتىبىنە شىعاراتىنى انىق. جالپى, جەتىسۋ جولدارىنىڭ ساپاسى ەلىمىزدىڭ كوپ وڭىرىنە قاراعاندا كوش ىلگەرى. ياعني, ىشكى قاتىناستى جاقسارتۋعا وبلىس تاراپىنان ءجىتى كوڭىل ءبولىنىپ وتىر.
بيىلدىققا جەرگىلىكتى ماڭىزداعى جولداردىڭ ساپاسىن جاقسارتۋ ءۇشىن 556 جوبا جۇزەگە اسىرۋى كەرەك. وسى ماقساتقا 62,7 ملردتەڭگە قاراستىرىلعان ەكەن. ونىڭ ىشىندە رەسپۋبليكالىق بيۋدجەتتەن 12,9 ملرد تەڭگە, جەرگىلىكتى بيۋدجەتتەن 49,8 ملرد تەڭگە جولساپاسىن جاقسارتۋعا باعىتتالۋدا. قارجى كوزى "نۇرلى جول" باعدارلاماسى مەن "اۋىل - ەل بەسىگى" جوباسى بويىنشا جانە "جۇمىسپەن قامتۋدىڭ جول كارتاسى-2020" باعدارلاماسى اياسىندا ءبولىنىپ وتىر. سونداي-اق قاراجاتتىڭ ءبىر بولىگى "وڭىرلەردى دامىتۋ" باعدارلاماسى شەڭبەرىندە يگەرىلۋدە.
وسى جەردە ايماقتاعى جول ساپاسىنىڭ جاقسارۋىنا "نۇرلى جول" مەملەكەتتىك باعدارلاماسىنىڭ وڭ اسەرى ءتيىپ وتىرعانىن ايتۋ كەرەك. بيىل وسى باعدارلاما بويىنشا جەرگىلىكتى ماڭىزداعى اۆتوكولىك جولىنىڭ 326,3 شاقىرىمىن قايتا جاڭعىرتۋ مەن قۇرىلىسىن جۇرگىزۋ جوسپارلانعان. اتاپ ايتقاندا, 29 شاقىرىمدى قايتا جاڭعىرتۋعا 4 634,3 ملن تەڭگە, سونىڭ ىشىندە بالقاش كولىنە دەيىنگى 19 شاقىرىم اۆتوجولعا 4 010,0 ملن تەڭگە, 4 كم اۆتوجول مەن 12 كوپىردى كۇردەلى جوندەۋگە 1 799,6 ملن تەڭگە, 293,3 كم جولدى ورتاشا جوندەۋدەن وتكىزۋگە 8 881,1 ملن تەڭگە باعىتتالعان. جالپى الماتى وبلىسىندا 2025 جىلعا دەيىن "نۇرلى جول" باعدارلاماسى اياسىندا 188,7 كم جولعا قۇرىلىس پەن قايتا جاڭعىرتۋ جۇمىستارىن جۇرگىزۋ, 120,2 كم جول مەن 16 كوپىردى كۇردەلى جوندەۋ, وبلىستىق ماڭىزداعى 1 480 كم اۆتوكولىك جولىنا ورتاشا جوندەۋ جۇرگىزۋ كوزدەلگەن. بۇعان كەتەتىن قارجى كولەمى 148 511,9 ملن تەڭگە شاماسىندا ەكەن.
جەرگىلىكتى جولداردى جاڭعىرتۋ مەن قايتا سالۋ دەگەندە جەتىسۋدا باستالعان ەكى ءىرى جوبانى ءسوز ەتپەي كەتۋگە بولماس. ماسەلەن, الماتى قالاسى ماڭىنداعى ۇلكەن اينالما جولدىڭ قۇرىلىسى ءۇشىن 51 ملرد تەڭگە قارجى ءبولۋ جوسپارلانعان. جوبا بويىنشا ۇزىندىعى 36,4 شاقىرىم بولاتىن ىشكى جولدار سالىنىپ, وبلىستىڭ ىلە, تالعار, قاراساي اۋداندارى اۋماعىندا جاڭا قوزعالىس كەشەندەرى ىسكە قوسىلۋى ءتيىس. ال تالدىقورعاننان بالقاش كولىنە دەيىنگى 75 شاقىرىم جولدىڭ قۇرىلىسى اياقتالىپ, پايدالانۋعا بەرىلگەننەن كەيىن اۋىلدار اراسىنداعى كولىك قاتىناسىنىڭ ساپاسى ارتىپ قانا قويماي, ءوڭىردىڭ تۋريستىك الەۋەتى ارتادى دەگەن سەنىم بار. قازىر جول قۇرىلىسىنا 18 ملرد تەڭگە بولىنگەن.
جالپى, اتقارىلعان شارالاردىڭ ناتيجەسىندە وبلىستىڭ ىشكى جولدارىنىڭ ساپاسى 99 پايىزعا دەيىن «جاقسى جانە قاناعاتتانارلىق» جاعدايىنا جەتەدى دەگەن بولجام بار. جول ساپاسى دەمەكشى, يندۋستريا جانە يننوۆاتسيالىق دامۋ مينيسترلىگى اۆتوموبيل جولدارى كوميتەتىنىڭ جول اكتيۆتەرى ۇلتتىق ساپا ورتالىعى ەلىمىزدەگى جول قۇرىلىسى, قايتا جاڭارتۋ جانە جوندەۋ جۇمىستارىنا ساراپتاما جاسايتىنى بەلگىلى. وسى ورتالىقتىڭ الماتى وبلىسىنداعى فيليالىنىڭ ماماندارى جىلدىڭ التى ايىندا رەسپۋبليكالىق ماڭىزى بار اۆتوموبيل جولدارىنا 3732 ينسپەكتسيالىق تەكسەرۋ, ال جەرگىلىكتى جول جەلىسىنە 1915 تەكسەرۋ جاساپتى. ناتيجەسىندە ماماندار جول سالۋدا جىبەرگەن 3,9 مىڭ ولقىلىقتى انىقتاعان.
"بيىل "نۇرلى جول" باعدارلاماسىنىڭ 2020-2025 جىلدارعا ارنالعان جاڭا كەزەڭى باستالدى. جوسپار بويىنشا ەلىمىزدە 9,8 مىڭ شاقىرىمعا جەتەتىن اۆتوكولىك جولىنا جوندەۋ جۇمىستارى جۇرگىزىلمەك. جىل سوڭىنا دەيىن 2,6 مىڭ شاقىرىم جولدى حالىق يگىلىگىنە تاپسىرۋ مىندەتى تۇر. ال "نۇرلى جول" باعدارلاماسى بويىنشا بولىنگەن قارجىعا الماتى وبلىسىنان 18 جوبا ەنگىزىلدى. قازىردىڭ وزىندە 5 باعىتتاعى جول قۇرىلىسىنىڭ قارقىنى ايتارلىقتاي. بۇلاردىڭ قاتارىندا "تالدىقورعان – وسكەمەن", "كۇرتى – بۋرىلبايتال", "ۇزىناعاش – وتار", "قاپشاعاي – كۇرتى", ء"ۇشارال – دوستىق" اۆتوجولدارى بار", - دەيدى "جول اكتيۆتەرى ۇلتتىق ساپا ورتالىعى" الماتى وبلىستىق فيليالى ديرەكتورىنىڭ مىندەتىن اتقاۋشى عاليا اسانوۆا.
