بقو تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى مۇحامعالي ارىسپاەۆتىڭ ءمالىم ەتكەنىندەي, وسى ماقساتقا جەرگىلىكتى بيۋدجەتتەن بولىنگەن 58 ملن استام تەڭگەگە رەسەيدە وندىرىلگەن "گريپپول +" ۆاكتسيناسى ساتىپ الىندى.
م.ارىسپاەۆتىڭ سوزىنە قاراعاندا, بيىل وبلىستا تۇماۋعا قارسى جوسپارلى ەكپە قىركۇيەكتىڭ ورتاسىنان باستالادى. بۇل ازاماتتاردىڭ جەدەل رەسپيراتورلىق اۋرۋلار كەزىندە تۇماۋعا قارسى تۇراقتى يممۋنيتەتىن قالىپتاستىرۋ ءۇشىن جاسالادى.
تۇماۋعا قارسى ەكپەنى اقىسىز نەگىزدە مەديتسينا قىزمەتكەرلەرى, التى ايدان اسقان ءجيى اۋىراتىن بالالار, جەتىم جانە اتا-انا قامقورلىعىنسىز قالعان بالالار, بالالار ۇيلەرىندە تاربيەلەنۋشىلەر, ەكىنشى جانە ءۇشىنشى تريمەستردەگى جۇكتى ايەلدەر, ەپيدەميولوگيالىق كورسەتكىشتەرى بويىنشا جانە جۇرەك-قان تامىرى, تىنىس الۋ جۇيەسىنىڭ سوزىلمالى دەرتىنە شالدىققان ادامدار, قارتتار ۇيلەرىنىڭ تۇرعىندارى الادى.
"سونىمەن قاتار تۇماۋدىڭ الدىن الۋ ءۇشىن ەكپەدەن باسقا ساقتىق شارالارىن ۇمىتپاۋ كەرەك. اتاپ ايتقاندا, حالىق كوپ جينالاتىن جەرلەرگە بارۋدى شەكتەۋ, ءبىر رەتتىك ماسكالاردى جابىق بولمەلەردە جانە ادامدار كوپ جينالاتىن جەرلەردە قولدانۋ, تۇشكىرۋ نەمەسە جوتەل سياقتى اۋرۋ بەلگىلەرى بار ادامدارمەن بايلانىستى شەكتەۋ, قولدى سابىنمەن ءجيى جانە مۇقيات جۋ, مۇرىن قۋىسىن تۇزدى ەرىتىندىمەن جۋ, بولمەنى ءجيى جەلدەتۋ جانە تازالاۋ, ىلعالداندىرۋ, س دارۋمەنى بار تاعامداردى مۇمكىندىگىنشە كوپ قولدانۋ (مۇكجيدەك, شىرعاناق, قاراقات, ليمون جانە ت.ب.), دارىگەردىڭ ۇسىنىسى بويىنشا يممۋنيتەتتى ارتتىراتىن دارىلەر مەن پرەپاراتتاردى قولدانۋ, سالاۋاتتى ءومىر سالتىن ۇستانۋ, دۇرىس تاماقتانۋ جانە ۇنەمى جاتتىعۋلار جاساۋ قاجەت», دەدى دەپارتامەنت باسشىسى.
ءجىتى رەسپيراتورلىق ۆيرۋستى جۇقپالار جانە تۇماۋدىڭ ەپيدەميولوگيالىق ماۋسىمى بيىلعى 1 قازاننان الداعى جىلدىڭ مامىر ايىنا دەيىن سوزىلادى. 2019-2020 جىلعى ماۋسىمدا وڭىردە 24 222 ادامنىڭ جرۆج-مەن اۋىرعانى تىركەلدى. سونداي-اق 204 ادام تۇماۋعا شالدىقتى. جىل سايىن وبلىستا تۇرعىنداردىڭ 10 پايىزىنان استامىنا تۇماۋعا قارسى ەكپە جاسالادى.
