ارحەولوگ - ابدەش تولەۋباەۆتىڭ جەتەكشىلىگىمەن جۇرگىزىلگەن تارباعاتاي اۋدانىنداعى قازبا جۇمىستارىندا ءبىر توپ عالىمدار ساق بيلەۋشىسىنىڭ ات-ابزەلدەرىن تاپتى. تابىلعان 850 التىن بۇيىمنىڭ بارلىعى سالتاناتتى ات شەرۋىنە ارنالعان. قازبا جۇمىستارىن جۇرگىزگەن ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمداردىڭ پايىمداۋىنشا, قۇندى جادىگەرلەر ءبىزدىڭ داۋىرىمىزگە دەيىنگى V-IV عاسىرلارعا تيەسىلى.
"اڭ" ستيلىندەگى اشەكەي بۇيىمدار قورعاننىڭ قاسىنداعى قۇلشىلىق ەتەتىن ورنىنان شىققان. زەر سالىپ قاراساق, گريفونداردىڭ, بۇعىلاردىڭ, ميستيكالىق جانۋارلاردىڭ مۇسىندەرى اسا شەبەرلىكپەن جاسالعان. التىنى دا تىعىز كورىنەدى. اي قۇلاقتى جولبارىس ۇلگىسىندەگى القا دا زەرگەردىڭ حاس شەبەرلىگىن كورسەتىپ تۇرعانداي.
سونىمەن قاتار, قوس شىنجىرداعى اقىق تاستى القا عالىمداردىڭ ەرەكشە نازارىن اۋدارىپ وتىر. مامانداردىڭ ايتۋىنشا, مىسىق تۇقىمداس قۇلاقتى جىرتقىش بەينەلەنگەن القا دا بۇرىن-سوڭدى كەزدەسپەگەن.
تابىلىپ جاتقان بىرەگەي جادىگەرلەر بابالارىمىزدىڭ مادەنيەتىن, ونەرىن تاعى ءبىر مارتە دالەلدەگەندەي بولدى. التىن بالقىتىپ, اشەكەي بۇيىمدار جاساۋ – شەبەرلىكتىڭ سول زامانداعى شىڭى شىعار.
قورعاننان قارعا ادىم جەردەن شەبەرلەردىڭ ۇستاحاناسىنىڭ ورنى بايقالعان. مۇندا ولار قولا مەن التىن بالقىتقان كورىنەدى.
ەستەرىڭىزدە بولسا, بىلتىر دا ەلەكە سازىنان ەرەكشە بۇيىمدار شىققان. ەندەشە, ارحەولوگيا سالاسىنداعى عىلىمي-زەرتتەۋ جۇمىستارىنىڭ باعدارلاماسى 2021 جىلعا دەيىن جالعاسىن تابا بەرمەك.
