رۋحانيات • 03 قىركۇيەك، 2020

وڭىرلەردە ۇلتتىق قولونەر ورتالىقتارى اشىلادى

55 رەت كورسەتىلدى

مادەنيەت جانە سپورت ۆيتسە-ءمينيسترى نۇرقيسا داۋەشوۆ ۇكىمەتتىڭ ءباسپاسوز ورتالىعىندا وتكەن بريفينگ اياسىندا 2020 جىلعى 1 قىركۇيەكتەگى پرەزيدەنتتىڭ قازاقستان حالقىنا ارناعان جولداۋىن ىسكە اسىرۋ بويىنشا جوسپارلانعان شارالار تۋرالى ايتىپ بەردى، - دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.

مەملەكەت باسشىسى قاسىم-جومارت توقاەۆ 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا ارناعان جولداۋىندا بۇقارالىق سپورتتىڭ دامۋىنا ەرەكشە نازار اۋداردى. قارجى تاپشىلىعى جاعدايىندا، كاسىبي سپورت كلۋبتارىن تولىعىمەن مەملەكەت ەسەبىنەن ۇستاۋدىڭ ماعىناسى جوق ەكەندىگى اتاپ ءوتىلدى. وڭىرلەردە سپورت سەكتسيالارىن اشۋعا جانە بالالاردىڭ سپورتتىق جانە شىعارماشىلىق الەۋەتىن دامىتۋعا باسىمدىق بەرىلىپ وتىر. 

«بۇل ماسەلەنى شەشۋ ءۇشىن 2020 - 2025 جىلدارعا ارنالعان دەنە شىنىقتىرۋدى جانە بۇقارالىق سپورتتى دامىتۋدىڭ كەشەندى جوسپارى اياسىندا ءىس-شارالار جۇزەگە اسىرىلاتىن بولادى، وندا ءبىلىم بەرۋ ۇيىمدارىندا تەگىن سپورت سەكتسيالارىن اشۋ، مەكتەپ وقۋشىلارى مەن ستۋدەنتتەردىڭ سپورتتىق ليگالارىن قۇرۋ، مەكتەپتەردى سپورتتىق قۇرالدارمەن جانە جابدىقتارمەن قامتاماسىز ەتۋ قامتىلادى»، — دەدى ن. داۋەشوۆ.

بۇگىنگى تاڭدا ەلىمىزدە دەنە شىنىقتىرۋ جانە سپورتپەن جۇيەلى تۇردە 5 ملن استام ادام اينالىسادى، بۇل ەل حالقىنىڭ 30،6%-ىن قۇرايدى.  كەشەندى جوسپارعا ساي بۇل كورسەتكىشتى 2025 جىلعا دەيىن 7،5 ملن ادامعا دەيىن نەمەسە 45% جەتكىزۋ كوزدەلگەن. جالپى، ۆيتسە-ءمينيستردىڭ ايتۋىنشا، بۇگىندە ەلىمىزدە دەنى ساۋ ۇرپاق قالىپتاستىرۋ ماقساتىمەن بالالار مەن جاسوسپىرىمدەر ءۇشىن جاعداي جاسالىپ كەلەدى. مىسالى، 2019 جىلى 11 جاڭا بالالار مەن جاسوسپىرىمدەرگە ارنالعان سپورت مەكتەبى اشىلدى. ەلىمىزدە بالالار مەن جاسوسپىرىمدەرگە ارنالعان 477 سپورت مەكتەبىندە 350 مىڭنان استام بالالار مەن جاسوسپىرىمدەر سپورت تۇرلەرىمەن شۇعىلدانادى. بۇل رەتتە اتالعان سپورت مەكتەپتەرىندەگى سەكتسيالار تەگىن وتكىزىلەدى. مەملەكەت باسشىسى بالالار ەنەرگياسىن دۇرىس ارناعا باعىتتاۋدىڭ ماڭىزدىلىعىن اتاپ ءوتتى. بۇل ءۇشىن بالالار مەن جاستاردىڭ شىعارماشىلىق الەۋەتى ماقساتىندا وڭىرلەردە ۇلتتىق قولونەر ورتالىقتارىن اشۋ جوسپارلانۋدا، وندا جاس ۇرپاق وكىلدەرى شىعارماشىلىق جانە قولونەر نەگىزدەرىن مەڭگەرەتىن بولادى.

«بۇگىنگى تاڭدا وسىنداي كەشەندەردىڭ ءبىرى جامبىل وبلىسىنداعى «شاحرەستان» ورتالىعى بولىپ تابىلادى. بۇدان باسقا، تۇركىستان قالاسىنداعى حالىقارالىق تۋريزم جانە قوناقجايلىلىق ۋنيۆەرسيتەتى كەشەنىنىڭ بازاسىندا قولونەر ورتالىعىن اشۋ جوسپارلانۋدا. وسى ورتالىقتاردىڭ جۇمىس ىستەۋ تاجىريبەسىن زەردەلەگەننەن كەيىن ەل وڭىرلەرىندە قولونەر ورتالىقتارىنىڭ جەلىسىن كەڭەيتۋ بويىنشا ودان ءارى جۇمىس جۇرگىزىلەتىن بولادى»، — دەدى ن. داۋەشوۆ.

بالالاردى شىعارماشىلىققا جاپپاي تارتۋدىڭ وسىنداي قاعيداتى بويىنشا رەسپۋبليكالىق جانە جەرگىلىكتى دەڭگەيدەگى مادەنيەت ۇيىمدارىندا شىعارماشىلىق ۇيىرمەلەر قۇرۋعا باستاماشىلىق جاسالادى. بۇل بالالاردى دامىتۋ ماقساتىندا بوس ۋاقىتتارىن ءتيىمدى پايدالانۋدى قامتاماسىز ەتىپ، تالانتتى بالالاردى ەرتە كەزەڭدە انىقتاۋعا ىقپال ەتەدى. سونىمەن قاتار، مادەنيەت جانە ونەر ۇيىمدارىندا ەرەسەكتەرمەن بەلسەندى ءوزارا ءىس-قيمىل جاساۋ ءۇشىن قاجەتتى جاعدايلار ىسكە اسىرىلادى. وسى ماقساتتار ءۇشىن ەڭ الدىمەن مادەنيەت جانە سپورت مينيسترلىگى مادەنيەت ۇيىمدارىنا وسىنداي قۇقىق بەرۋ جونىندەگى قولدانىستاعى زاڭناماعا تۇزەتۋلەر ەنگىزۋگە باستاماشىلىق ەتۋدى جوسپارلاۋدا.

سونداي-اق، جولداۋدا مۇعالىمدەردىڭ ءال-اۋقاتىن ارتتىرۋعا جانە 2021 جىلعى 1 قاڭتاردان باستاپ ولاردىڭ جالاقىسىن 25%-عا ارتتىرۋعا نازار اۋدارىلدى. بۇل باعىتتا مادەنيەت جانە سپورت مينيسترلىگى ءتيىستى جۇمىستار جۇرگىزىپ جاتىر. ماسەلەن، 2020 جىلعى 1 قاڭتاردان باستاپ مادەنيەت جانە سپورت سالاسىنداعى مامانداندىرىلعان مەكتەپتەر مەن كوللەدجدەر قىزمەتكەرلەرىنىڭ جالاقىسى 2023 جىلعا دەيىن جىل سايىن 25%-عا ۇلعاياتىن بولادى. بۇگىندە قر پارلامەنت ماجىلىسىندە بۇقارالىق سپورتتى دامىتۋعا باعىتتالعان زاڭ جوباسى قاراستىرىلىپ جاتىر. قۇجاتتىڭ اياسىندا مەملەكەتتىك ءبىلىم بەرۋ ۇيىمدارىنىڭ پەداگوگتارىنا ساباقتان تىس سپورت ساباقتارىن جۇرگىزگەنى ءۇشىن بازالىق لاۋازىمدىق جالاقىنىڭ 100% مولشەرىندە قوسىمشا اقى ەنگىزۋ ماسەلەسى پىسىقتالۋدا.

«مەملەكەت باسشىسىنىڭ جولداۋىندا اتالىپ وتكەن ستراتەگيالىق باعدارلاردى ساپالى جانە ۋاقىتىلى ورىنداۋ ءۇشىن مينيسترلىك تاراپىنان بارلىق ءتيىستى شارالارار قابىلداناتىن بولادى»، — دەپ تۇيىندەدى ر. داۋەشوۆ.


سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار