جيىندا ماڭىزدى قۇجاتتا العا قويىلعان نەگىزگى باسىمدىقتار مەن مىندەتتەردى جۇزەگە اسىرۋ ماسەلەلەرى تالقىلاندى. باسقوسۋدا جامبىل وبلىسىنىڭ اكىمى بەردىبەك ساپارباەۆ جولداۋدا ايتىلعان ماڭىزدى مىندەتتەرگە توقتالىپ, وڭىردە ودان تۋىندايتىن مىندەتتەردىڭ جۇزەگە اسىرىلۋ بارىسىنا توقتالدى. «پرەزيدەنت كوروناۆيرۋسپەن كۇرەس شارالارىنا ايرىقشا نازار اۋداردى. بوساڭسۋعا ءالى ەرتە. كوروناۆيرۋستىق ينفەكتسيانىڭ تارالۋىنا قارسى تۇرۋ ماسەلەلەرى ەرەكشە باقىلاۋدا بولۋى كەرەك. وبلىسىمىزدا توسەك-ورىن سانىن كوبەيتۋ جۇمىستارى جۇرگىزىلۋدە. ءدارى-دارمەكتەر مەن مەديتسينالىق جابدىقتار قورى قالىپتاسۋدا. جاقىندا عانا اشىلعان ورتالىقتا كوروناۆيرۋسپەن اۋىرعان تۇرعىندار وڭالتۋ كۋرسىنان ءوتىپ جاتىر. ءبىز جامبىلدىقتاردىڭ ساپالى مەديتسينالىق قىزمەت الۋى ءۇشىن بارىمىزدى سالىپ جاتىرمىز», دەدى ول.
سونىمەن قاتار, بەردىبەك ساپارباەۆ مەملەكەت باسشىسىنىڭ ەل دامۋىنىڭ ەڭ وزەكتى ماسەلەلەرىن اتاپ وتكەنىن جانە ولاردى شەشۋ جولدارىن كورسەتىپ, ستراتەگيالىق باسىمدىقتاردى ايقىنداعانىن اتاپ ءوتتى. جولداۋعا سايكەس, وبلىستا مەملەكەتتىك باسقارۋدىڭ جاڭا مودەلىن قۇرۋ بويىنشا رەفورمالار جۇيەلى تۇردە جۇرگىزىلەتىن بولادى. سونداي-اق, بەردىبەك ساپارباەۆ ءوز سوزىندە جاڭا جاعدايداعى ەكونوميكالىق دامۋ, يمپورتتى ازايتۋ جانە جامبىل كاسىپورىندارىنىڭ ەكسپورتتىق الەۋەتىن دامىتۋدىڭ ماڭىزدىلىعىنا دا ايرىقشا توقتالدى. «ەلىمىزدىڭ جاڭا ەكونوميكالىق باعىتى ەل پرەزيدەنتى اتاپ كورسەتكەن جەتى نەگىزگى قاعيداتقا نەگىزدەلۋى كەرەك. ءبىزدىڭ وندىرىستىك الەۋەتىمىزدى تولىعىمەن پايدالانۋ تاپسىرىلدى. وڭدەۋ ونەركاسىبىندەگى ءتۇستى مەتاللۋرگيا, ماشينا جاساۋ, اۋىلشارۋاشىلىق ونىمدەرىن قايتا وڭدەۋ, قۇرىلىس ماتەريالدارى مەن تاماق ءوندىرىسى سەكىلدى جاڭا باعىتتاردى زەردەلەۋ قاجەت. ءبىزدىڭ وبلىستا بۇل باعىتتارداعى جوبالاردى زەردەلەۋگە جانە جۇزەگە اسىرۋعا بارلىق جاعدايلار جاسالعان. ءتيىستى تاپسىرما مەنىڭ ورىنباسارلارىما جانە سالالىق باسقارما باسشىلارىنا جۇكتەلەدى», دەدى اكىم. جيىن بارىسىندا بەردىبەك ساپارباەۆ اۋدان اكىمدەرىنە الەۋمەتتىك ماڭىزى بار ازىق-ت ۇلىك تاۋارلارىنىڭ باعالارىن باقىلاۋدى تاپسىردى. تۇرعىنداردىڭ تابىسىن ارتتىرۋ ءۇشىن پيلوتتىق جوبانىڭ مۇمكىندىكتەرىن پايدالانۋ جانە اتالعان جوبانى ىسكە اسىرۋدىڭ ەكىنشى كەزەڭىنە دايىندالۋ قاجەتتىگىن ەسكەرتتى. «مەملەكەت باسشىسى 2025 جىلعا دەيىن رەسپۋبليكالىق ماڭىزى بار جولداردى قايتا جاڭعىرتىپ قانا قويماي, جول بويىنداعى سەرۆيسپەن قامتاماسىز ەتۋ مىندەتىن جۇكتەپ وتىر. وسى ورايدا ءبىز «نۇرلى جول» باعدارلاماسىن جۇزەگە اسىرۋدى ودان ءارى جالعاستىراتىن بولامىز. بۇگىندە مەركى-شۋ-بۋرىلبايتال اۆتوموبيل جولىنىڭ 262 شاقىرىمىنىڭ قۇرىلىسى جۇرگىزىلۋدە. اعىمداعى جىلدىڭ سوڭىنا دەيىن اتالعان اۆتوجول قۇرىلىسىن ءبىر باعىتتا اياقتاۋ جوسپارلانۋدا. اۋدان اكىمدەرى مەن جاۋاپتى تۇلعالار قۇرىلىس جۇمىستارىنىڭ ساپاسىن قاداعالاۋى ءتيىس», دەدى بەردىبەك ساپارباەۆ. سونىمەن قاتار, وبلىس اكىمى تسيفرلاندىرۋعا قاتىستى ماسەلەلەردى جويۋ, بارلىق ازاماتتاردىڭ ينتەرنەتكە قولجەتىمدىلىگىن قامتاماسىز ەتۋ بويىنشا اۋقىمدى جۇمىستاردىڭ كۇتىپ تۇرعاندىعىن ايتتى. سونداي-اق, پرەزيدەنتتىڭ مەملەكەتتىك قىزمەتتەگى قاعازباستىلىق ماسەلەسىن جويۋعا وراي, وڭىردە كوپتەگەن پروتسەستەر تولىعىمەن تسيفرلاندىرىلاتىنىن جەتكىزدى.
جامبىل وبلىستىق قوعامدىق كەڭەسىنىڭ توراعاسى امزەبەك جولشىبەكوۆ, م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ رەكتورى ماحمەتعالي سارىبەكوۆ, قازاقستاننىڭ ەڭبەك ەرى, كاسىپكەرلەر پالاتاسى وڭىرلىك كەڭەسىنىڭ توراعاسى مۇقاش ەسكەندىروۆ, «اۋىل» حالىقتىق-دەموكراتيالىق پاتريوتتىق پارتياسى وبلىستىق فيليالىنىڭ توراعاسى ەربولات ساۋرىقوۆ, «جاستار-زەرتتەۋ» قوعامدىق بىرلەستىگىنىڭ جەتەكشىسى پاريدا مامەدوۆا جانە وزگە دە ازاماتتار جولداۋدا جۇكتەلگەن مىندەتتەردى جۇزەگە اسىرۋ جولدارى تۋرالى ويلارىمەن ءبولىستى. جيىنعا قاتىسۋشىلار شاعىن جانە ورتا بيزنەستى قولداۋ, كوممۋنالدىق مەنشىك نىساندارىن جەكەشەلەندىرۋ, ەكولوگيا, «جاسىل» ەكونوميكا, قۇقىقتىق ءتارتىپتى قامتاماسىز ەتۋ, ءماسليحاتتاردىڭ, قوعامدىق كەڭەستىڭ جۇمىسى, كوپپارتيالىق جۇيەنى ودان ءارى دامىتۋ, حالىقتىڭ ءوز زەينەتاقى جيناقتارىنىڭ ءبىر بولىگىن پايدالانۋى, جەكە تۇرعىن ءۇي قۇرىلىسىن دامىتۋ, «5-10-25», «نۇرلى جەر» باعدارلامالارىن ىسكە اسىرۋ جانە بالالاردىڭ قاۋىپسىزدىگى مەن قۇقىقتارىن قورعاۋ ماسەلەلەرىن دە تالقىلادى.
جامبىل وبلىسى
