قازاق اندەرىنىڭ ۇلتتىق بايقاۋى «التىن كۇز-2013» ماسكەۋدە وتەدى, دەپ حابارلايدى Tengrinews.kz اقپاراتتىق سايتى. 2 قاراشا كۇنى العاشقى كاستينگ بولادى. وندا ءاربىر قاتىسۋشى ەكى ءان ورىنداۋى شارت.
ۇمىتكەر ءاننىڭ بىرەۋىن قازاق تىلىندە, ال ەكىنشىسىن ءوزى قالاعان تىلدە ايتا الادى. ءان سايىسى ءۇش كەزەڭنەن تۇرادى. ەكى كەزەڭنىڭ قورىتىندىسى بويىنشا 12 ۇمىتكەر انىقتالادى. ولار 16 قاراشا كۇنى فينالعا شىعىپ, ءوزارا باق سىناسادى. «التىن كۇز -2013» سوڭى رەسەيلىك جانە قازاقستاندىق ونەر جۇلدىزدارىنىڭ گالا-كونتسەرتىمەن اياقتالماق.
«بايقاۋ جۇزدەگەن تالانتتى جاستاردىڭ شىعارماشىلىق الەۋەتىن اشۋعا, ولاردىڭ وتانعا, مۋزىكاعا, پوەزياعا دەگەن ىستىق سەزىمدەرىن ءان ارقىلى بەينەلەۋگە مۇمكىندىك بەرەدى. بۇل شارا جاس تالانتتاردى شىعارۋدى, ولارعا قولداۋ كورسەتىپ جانە ءوز-وزدەرىن دامىتۋعا سەپتىگىن تيگىزۋدى ماقسات ەتەدى», دەيدى ۇيىمداستىرۋشىلار. ءان جارىسىن ماسكەۋدەگى قازاقستاندىق ستۋدەنتتەردىڭ «اتامەكەن» بىرلەستىگى رەسەيدەگى قازاقستانداعى ەلشىلىگىنىڭ قولداۋىمەن ۇيىمداستىرىپ وتىر.
«ەگەمەن-اقپارات».
