گرۋزيانىڭ قازىرگى ءىس ۇستىندەگى پرەزيدەنتى ميحايل سااكاشۆيلي ەلدى تاستاپ شىقتى. دۇيسەنبىدەن سەيسەنبىگە قاراعان ءتۇنى ول ۇشاقپەن بريۋسسەلدى بەتكە الدى. بۇل تۋرالى «رۋستاۆي-2» تەلەارناسى حابارلادى.
گۇرجىستان باسشىسى ۇلتقا قوشتاسۋ ۇندەۋىن وقىپ بەرگەن بويدا ۇشىپ كەتتى. وسى ءجايت ەل ىشىندە كوپ قاۋەسەت تۋعىزىپ ۇلگەردى. سونىڭ ءبارى ونىڭ تبيليسيگە ەندى قايتىپ كەلمەيتىنى تۋراسىندا ءوربىدى. الايدا, قاراشانىڭ باسىندا يناۋگۋراتسيا وتكەنگە دەيىن فورمالدى تۇردە ەلدىڭ پرەزيدەنتى بولىپ قالا بەرەتىن ميشيكو سااكاشۆيلي بۇل الىپ-قاشتى اڭگىمەلەردىڭ نەگىزسىز ەكەنىن ايتتى.
«مەن ءوزىمنىڭ ەۋرووداققا بارىپ-شىعۋىمدى نىشاندىق نارسە دەپ بىلەمىن. مۇندا كەلگەندە ەلدە كەشە وتكەن سايلاۋداعى ءوزىمنىڭ ۇستانعان باعىتىمدى جەتكىزبەك بولدىم. ەگەر گرۋزيا الداعى ۋاقىتتا دۇرىس باعىتتا جۇرمەيتىن بولسا, جاعداي ناشارلايدى. مەنى تەك ءوزىمىزدىڭ ەل ءۇشىن ءبىراز نارسەنى ىستەپ ۇلگەرگەنىمىز قۋاندىرادى», - دەدى ول.
ايتا كەتەيىك, سااكاشۆيليدىڭ ساياسي قارسىلاسى گەورگي مارگۆەلاشۆيلي پرەزيدەنت سايلاۋىندا جەڭىسكە جەتكەنگە دەيىن-اق گرۋزيادا بۇرىنعى پرەزيدەنتكە قاتىستى قىلمىستىق ءىس قوزعالاتىنى ايتىلىپ جۇرگەن ەدى. اتاپ ايتقاندا, اڭگىمە پرەمەر-مينيستر زۋراب جۆانيانىڭ 2005 جىلعى اقپانداعى ولىمىنە قاتىستى جايلار قايتا تەكسەرۋدەن وتىلمەك. ال قازىر گرۋزيادا بيلىكتى اۋىستىرۋ قازىردىڭ وزىندە قىزۋ باستالىپ كەتتى. سەيسەنبى كۇنى ەلدىڭ بەس وبلىسىنداعى گۋبەرناتورلار الماستى. سول سياقتى سااكاشۆيليدىڭ كەزىندە شەت ەل اسىپ كەتكەن بىرقاتار وپپوزيتسيا مۇشەلەرى قايتا ورالاتىندارىن ءبىلدىردى.
ساكەن مايلىباي.
