"سۋدا ادامداردىڭ قاۋىپسىزدىگىن قامتاماسىز ەتۋ ماقساتىندا, تجك پوليتسيامەن جانە جەرگىلىكتى اتقارۋشى ورگاندارىمەن بىرلەسىپ ۇيىمداستىرۋشىلىق, پراكتيكالىق ءىس-شارالار كەشەنىن جۇرگىزدى. كۇن سايىن ازاماتتىق قورعاۋ ورگاندارى مەن پوليتسيا قىزمەتكەرلەرىنىڭ قاتىسۋىمەن رەيدتەر مەن پاترۋلدەۋ جۇزەگە اسىرىلدى. وسى جىلدىڭ باسىنان بەرى ەلىمىزدىڭ سۋ ايدىندارىندا قۇتقارۋشىلار 160 ادامدى, ونىڭ ىشىندە 35 بالانى قۇتقاردى. ال, سۋعا شومىلۋ ماۋسىمى باستالعاننان بەرى 140 ادام, ونىڭ ىشىندە 27 بالا قۇتقارىلدى", - دەلىنگەن حابارلامادا.
سونىمەن قاتار, حابارلامادا سۋعا شومىلۋ كەزەڭىنىڭ باسىنان باستاپ ءوز كۇشتەرىن باعالاماۋ سەبەپتەرى بويىنشا, سۋعا شومىلۋ كەزىندە الكوگولدىك ماس كۇيىندە, سۋعا باتۋشىنى قۇتقارۋ جانە بالالاردى ەرەسەكتەردىڭ قاراۋىنسىز قالدىرۋ كەزىندە 239 ادام (2019 جىلى 282), ونىڭ ىشىندە 75 بالا (2019 جىلى 88 بالا) سۋعا كەتىپ, كوز جۇمعانى ايتىلعان.
"تەك سۋعا شومىلۋ ماۋسىمىنىڭ سوڭعى اپتاسىندا (24-31 تامىز ارالىعىندا) الماتى, اقتوبە, قوستاناي, اقمولا, جامبىل, پاۆلودار, شىعىس قازاقستان, قىزىلوردا وبلىستارىندا, شىمكەنت قالاسىندا 14 ادام, ونىڭ ىشىندە 3 بالا سۋعا باتىپ, كوز جۇمدى. سۋعا شومىلۋ ماۋسىمىندا الماتى - 35, شىعىس قازاقستان – 31, تۇركىستان - 23 وبلىستارىندا سۋعا باتىپ كەتكەن ادامداردىڭ سانى كوپ بولدى", - دەدى كوميتەتتەگىلەر.
تج كوميتەتىنىڭ مالىمەتىنە سايكەس, ەلىمىزدە سۋعا شومىلۋعا رۇقسات ەتىلگەن 445 ورىن انىقتالدى, 6 020 ەسكەرتۋ بەلگىسى ورناتىلدى. ادامداردىڭ سۋ ايدىندارىنداعى قاۋىپسىزدىگىن قامتاماسىز ەتۋ ءۇشىن جەكە جاعاجايلاردىڭ 689 قۇتقارۋشى-جاساقشىسى وقىتىلعان. پوليتسيا دەپارتامەنتى مەن ۆولونتەرلىك ۇيىمدارمەن بىرىگىپ قوعامدىق ورىندارداعى ءجۇرىس-تۇرىس جانە سۋ ايدىندارىندا قاۋىپسىزدىك قاعيدالارىن بۇزۋشىلاردى انىقتاۋ بويىنشا بىرلەسكەن رەيدتەر مەن پاترۋلدەۋ جۇرگىزىلگەن.
"1 ماۋسىمنان باستاپ 33 مىڭ رەيد جانە پاترۋلدەۋ جۇرگىزىلدى, 6 355 ادام اكىمشىلىك جاۋاپكەرشىلىككە تارتىلدى, «قوعامدىق ورىنداردا بولۋ قاعيدالارىن بۇزۋ» اقبك 440-بابى جانە «ورتاق سۋ پايدالانۋ قاعيدالارىن بۇزۋ» 364-بابى بويىنشا 14 ملن. استام تەڭگە ايىپپۇل سالىندى. رەيد ءىس-شارالارى بارىسىندا سۋ ايدىندارىنداعى قاۋىپسىزدىك شارالارى بويىنشا حالىقپەن ءتۇسىندىرۋ جۇمىستارى جۇرگىزىلدى, ۇگىت-ناسيحاتتاۋ ونىمدەرى (پاراقشالار, جادنامالار) تاراتىلادى. بارلىعى 499 564 مىڭ ءونىم تاراتىلدى", - دەلىنگەن حابارلامادا.
