ەكى اۋىسىمداعى ورىنداردىڭ جالپى سانى 9 مىڭدى قۇرايدى. جاڭا ءبىلىم بەرۋ مەكەمەلەرى ءتورت مەكتەپتە – № 31, 40, 53, 85-تە ءۇش اۋىسىمدا وقۋدى الىپ تاستاۋعا مۇمكىندىك بەردى. سونداي-اق وقۋشى سانى كوپ التى مەكتەپتىڭ - No12, 58, 71, 75, 76, 84 جۇكتەمەسىن ازايتۋعا مۇمكىندىك بەردى. بۇگىن ەلوردا اكىمى التاي كولگىنوۆ بىرقاتار جاڭا ءبىلىم بەرۋ مەكەمەلەرىندە بولدى.
ء"بىزدىڭ الدىمىزدا مەكتەپ وقۋشىلارىن ورىنمەن قامتاماسىز ەتۋ جانە وقۋعا قولايلى جاعداي جاساۋ مىندەتى تۇر. ساۋران, 5/1, كوشەسىندە ورنالاسقان مەكتەپ ەكى اۋىسىمدا وقىتىپ, جاڭا 2400 وقۋشىعا ورىن پايدا بولدى. بۇل ايماق تۇرعىندارى ءۇشىن بۇعان دەيىن وقۋ ورنى بولعان ەمەس. جاڭا مەكتەپ №59 جانە 85 مەكتەپتەردىڭ ءۇش اۋىسىمدىق ءبىلىم بەرۋ ماسەلەسىن شەشىپ, №76 جانە 75 مەكتەپتەردىڭ جۇكتەمەسىن ازايتادى. مەكتەپ ينتەراكتيۆتى دامۋ كابينەتىمەن, قاشىقتان وقىتۋعا ارنالعان ونلاين ستۋديامەن جابدىقتالعان. ستۋديادا مۇعالىمدەر ونلاين ساباقتارىن جازىپ, ۆەبينارلار وتكىزىپ, تىكەلەي ەفيردە كورسەتە الادى. بولاشاقتا ءبىز بۇل تاجىريبەنى باسقا مەكتەپتەردە دە قولداناتىن بولامىز", – دەدى ەلوردا اكىمى التاي كولگىنوۆ.
ەلوردا اكىمى سونداي-اق №8 ءىت مەكتەپ-ليتسەيىندە بولدى (سەيفۋللين – وماروۆ ك-ءسى, ەكى اۋىسىمدا 1800 ورىن). 60 جىل بۇرىن سالىنعان ەسكى مەكتەپ عيماراتى اپاتتى دەپ تانىلدى. وتكەن جىلداردا بالالار №56 جانە 16 مەكتەپتەردىڭ عيماراتتارىندا وقىدى. جاڭا مەكتەپ IT جانە STEM سىنىپتارىمەن جابدىقتالعان – وقۋشىلار 3D نىساندارىن جاساۋ, روبوتتاردى مودەلدەۋ بويىنشا عىلىمي جانە تەحنيكالىق بىلىمدەرىن پراكتيكادا بىردەن قولدانا الادى. سونىمەن قاتار مەكتەپتە ينكليۋزيا جانە پەداگوگيكالىق-پسيحولوگيالىق تۇزەتۋ بولمەلەرى بار – ارنايى دايىندالعان مۇعالىمدەر ەرەكشە قاجەتتىلىكتەرى بار بالالارمەن جۇمىس ىستەيدى.
باستاۋىش سىنىپ وقۋشىلارى مەكتەپ قابىرعاسىندا "كەزەكشى توپتار" فورماتىندا وقيدى – سىنىپتا 15-تەن كوپ بالا بولمايدى, پارتالار شاحمات تارتىبىمەن قويلادى. دەزينفەكتسيالىق تۋننەلدەر, انتيسەپتيكتەر, الەۋمەتتىك اراقاشىق بەلگىلەرى جانە ماسكا تاعۋ تۋرالى ەسكەرتۋلەر ورناتىلدى.
جالپى بيىل ەلوردادا 12 مەكتەپ سالىنىپ, پايدالانۋعا بەرىلەدى, بۇل وتكەن جىلمەن سالىستىرعاندا ەكى ەسە كوپ. تاعى 12 مەكتەپ 2021 جىلى سالىنادى.
