اۋدانعا جۇمىس ساپارى بارىسىندا وبلىس اكىمى ومىرزاق شوكەەۆ ورگەباس اۋىلىنىڭ قاسىم امانجولوۆ اتىنداعى جالپى ورتا مەكتەبىندە بولدى. اتالمىش ءبىلىم وشاعىندا 300-گە جۋىق وقۋشى, ال فيردوۋسي اتىنداعى ورتا مەكتەپتە 700-دەن استام بالا وقيدى. ونىڭ ىشىندە از قامتاماسىز ەتىلگەن وتباسى بالالارى كومپيۋتەرلىك تەحنيكالار جانە پلانشەتتەرمەن قامتاماسىز ەتىلگەن. ءبىلىم ۇيالارى ينتەرنەت جۇيەسىمەن تولىق قامتىلعان. جالپى, رەسپۋبليكالىق رەزەرۆتەن بولىنگەن قاراجاتقا ماقتاارال اۋدانىنداعى وقۋشىلار ءۇشىن 4900 كومپيۋتەرلىك تەحنيكا تاراتىلادى. ساپار بارىسىندا ومىرزاق ەستاي ۇلى بالالاردىڭ ساپالى ءبىلىم الۋى ءۇشىن بارلىق جاعداي جاسالۋى قاجەتتىگىن ايتتى.
سونداي-اق وبلىس اكىمى اۋدانداعى قۇرىلىس جۇمىستارىمەن تانىستى. اۋىل تۇرعىندارىمەن كەزدەسىپ, تالاپ - تىلەگىن تىڭدادى. ءاربىر ءۇيدىڭ قۇرىلىس ساپاسىن ءجىتى تەكسەرىپ, تاسقىن سۋدان زارداپ شەككەن ەلدى مەكەندەردى قالپىنا كەلتىرۋ جۇمىستارىن باقىلادى. سۋ باسقان اۋىلداردىڭ تۇرعىندارى بۇگىندە قۇرىلىس جۇمىستارىنا قاراستىرىلعان كەزەكتى ترانش قارجىلارىن العان. مىرزاكەنتتەگى جاڭا شاعىن اۋداندا سالىنىپ جاتقان 200 باسپانانىڭ قۇرىلىسى تولىق اياقتالعان. سونىمەن قاتار فيردوۋسي ەلدى مەكەنىندە 53 ءۇي, ورگەباس اۋىلىندا 39 ءۇي پايدالانۋعا بەرۋگە دايىن. قۇرىلىس جۇمىستارى توقتاۋسىز جۇرۋدە.
