– شىركىن, مۇنداي مەرەكەلىك ءىس-شارانى تىكەلەي ساحنادان تاماشالاعانعا نە جەتسىن. وكىنىشكە قاراي, كارانتين تالابى كوپ جوبالاردى ونلاين-باعدارلاما ارقىلى عانا تاراتۋعا ماجبۇرلەيدى. سوعان قاراماستان بۇگىنگى مەرەكەلىك تارتۋ كورەرمەن اۋديتورياسىنا تاماشا كوڭىل-كۇي سىيلايدى دەگەن ويدامىن. ءسوزسىز, كونستيتۋتسيا كۇنى – قازاقستانداعى باستى مەملەكەتتىك مەرەكەلەردىڭ ءبىرى, ەلىمىزدىڭ اتازاڭى ءبىز ءۇشىن باعا جەتپەس بايتاق قۇندىلىق سانالادى. وسىنداي ساتتە وتانداستارعا كەلىسىم مەن تۇراقتىلىق تىلەيمىز, ءاربىر شاڭىراقتا بەرەكە-بىرلىك, باقىت پەن شاتتىق ورناسىن, – دەدى "استانا وپەرا" تەاترى وپەرا ترۋپپاسىنىڭ مەڭگەرۋشىسى, قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆ.
كەشتە جانات شىبىقباەۆ, جان تاپين, مەيىر باينەش, بەيىمبەت تاڭارىقوۆ, ايزادا قاپونوۆا, سالتانات مۇراتبەكوۆا, بيبىگۇل جانۇزاق, ءجاميلا جارقىمباەۆا, ءمادينا يسلاموۆا, ەلەنا گانجا, رامزات بالاكيشيەۆ, نازىم ساعىنتاي, ەرجان سايپوۆ, عاليا بايعازينوۆا, كۋرۆانجان احاتوۆ, جانار احمەتوۆا, راۋشان بەسكەمبيروۆا, يرينا كۋرگۋزكينا, سونىمەن قاتار Dolce ءانسامبلى ونەر كورسەتەدى.
باعدارلامادا قازاق حالىق اندەرى, وتان تۋرالى پاتريوتتىق جانە ليريكالىق كومپوزيتسيالار قامتىلعان. قازاقستاندىقتاردىڭ بىرلىگى مەن ىنتىماقتاستىعى تۋرالى جىرلاناتىن اۆتورلىق اۋەندەردىڭ كوبى بۇگىندە حالىق قازىناسىنا اينالىپ ۇلگەرگەن.
– كونتسەرتتە مەن حالىق انى"«اقباقايدى" ورىندايمىن. ونلاين سيپاتىندا بولعانمەن ايتۋلى ءىس-شاراعا بارىنشا دايىندالدىق. سەبەبى ونەر يەسى ءۇشىن ساحنا مەن شىعارماشىلىق ورتانىڭ ورنى بولەك. كارانتين جاقىن ارادا اياقتالىپ, جاڭا سەگىزىنشى ماۋسىمدى زال تولى كورەرمەنمەن بىرگە قارسى الاتىنىمىزعا سەنىمدىمىن, – دەپ ءوز ويىن جەتكىزدى "استانا وپەرانىڭ" جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى جان تاپين.
