ال قازىر قولدانىستاعى اتا زاڭىمىزدىڭ ءجونى بولەك. حالىقتىق رەفەرەندۋم نەگىزىندە 1995 جىلى قابىلدانعان كونستيتۋتسيامىز – ەلىمىزدىڭ دامۋىنا نەگىز بولاتىن, الەۋمەتتىك, زايىرلى, قۇقىقتىق جانە دەموكراتيالىق ەلگە اينالۋعا جەتەلەيتىن, مەملەكەتتىڭ نەگىزگى بازالىق قاعيدالارى قامتىلعان, جوعارعى بيلىك اراسىنداعى شەشىم قابىلداۋ تەتىكتەرىن ايقىنداعان باستى قۇجاتىمىز.
ءسال كەيىنگە شەگىنسەك, تاۋەلسىز مەملەكەتتىڭ ماقساتتارى مەن مىندەتتەرىنە ساي كەلەتىن جاڭا كونستيتۋتسيا قابىلداۋ ءۇشىن كەزىندە ارنايى كوميسسيا قۇرىلعان بولاتىن. كوميسسيا سول كەزدەگى بىلىكتى زاڭگەرلەردەن, قۇقىقتانۋشى عالىمدار مەن ساراپشىلاردان, مەملەكەت جانە قوعام قايراتكەرلەرىنەن جاساقتالىپ, ءوزىمىزدىڭ باي تاريحىمىز بەن ەرەكشەلىكتەرىمىزدى باسىمدىققا الا وتىرىپ, الەمنىڭ جەتەكشى مەملەكەتتەرىنىڭ كونستيتۋتسيوناليزم بويىنشا وزىق تاجىريبەلەرى ەسكەرىلىپ, دايىندالدى.
جاڭا كونستيتۋتسيانىڭ جوباسى ەل ىشىندە كەڭىنەن تالقىلانىپ, ءبىر اي كولەمىندە 33 مىڭ ۇجىمدا قاراستىرىلىپ, جوباعا تولىقتىرۋلار ەنگىزۋگە ۇسىنىستار جەكە ازاماتتاردان, ۇجىمداردان, ءماسليحاتتار مەن بىرلەستىكتەردەن كەلىپ ءتۇستى. بارلىعى 30 مىڭعا جۋىق ۇسىنىس كەلىپ تۇسكەن, ولاردىڭ نەگىزىندە كونستيتۋتسيا جوباسىنىڭ 55 بابىنا 1100-دەن استام تولىقتىرۋلار مەن وزگەرتۋلەر ەنگىزىلگەن.
ءسويتىپ شيرەك عاسىر بۇرىن ەلىمىزدىڭ تاريحىندا العاش رەت, حالىق ەل بولىپ رەسپۋبليكالىق رەفەرەندۋمدا مەملەكەتتىڭ اتا زاڭىن قابىلدادى.
جاڭا كونستيتۋتسيانىڭ ارقاسىندا ەلدە مەملەكەتتىلىكتىڭ ىرگەلى جاڭا نەگىزى قالىپتاسىپ, قوعامدىق دامۋدى رەتتەۋگە جانە باعىتتاۋعا قاۋقارلى ءبىرتۇتاس مەملەكەتتىك بيلىك قۇرىلدى. بۇل اتا زاڭ پرەزيدەنتتىك باسقارۋ ۇلگىسىن بەكىتىپ, ەلدە ەكى پالاتالى كاسىبي پارلامەنت قۇرۋعا جول اشتى. مۇنىڭ ءبارى قوعامدىق-ساياسي جاعدايدى تۇراقتاندىرىپ, ماڭىزدى ماسەلەلەر بويىنشا قاجەتتى شەشىمدار قابىلداپ, ەلگە شەتەلدىك ينۆەستورلاردى شاقىرۋعا مۇمكىندىكتەر بەرگەنى بەلگىلى.
سونىمەن قاتار وسى جىلدار ىشىندە زاماناۋي زايىرلى, دەموكراتيالىق مەملەكەتتى قالىپتاستىرۋ اتا زاڭنىڭ وزەگىندەگى سالىنعان نەگىزگى ستراتەگيالىق ماقساتتاردىڭ ءبىرى ەدى. بۇگىندە كوپپارتيالىلىق پەن ساياسي پىكىر الۋاندىعى قازاقستاندا قالىپتى جاعدايعا اينالدى. ءىرى, حالىقتىڭ قولداۋى مەن ناقتى ىقپالعا يە ساياسي پارتيالار قالىپتاسىپ, ولاردىڭ سايلاۋ ۇدەرىسىندەگى رولدەرى ارتۋدا. شيرەك عاسىر ىشىندە كونستيتۋتسيا بيۋدجەتارالىق قاتىناستار مەن مەملەكەتتىك باسقارۋ جۇيەسىن ورتالىقسىزداندىرۋ باعىتىندا رەفورمالار جۇرگىزۋگە مۇمكىندىكتەر بەردى. سونداي-اق ادام قۇقىقتارى جونىندەگى ۋاكىل ينستيتۋتى قۇرىلىپ, ءولىم جازاسىنا موراتوري ەنگىزىلىپ, قىلمىستىق جاۋاپكەرشىلىككە تارتۋ ۇدەرىسى ىزگىلەندىرىلۋدە. ەلىمىز ادام قۇقىقتارى جونىندەگى حالىقارالىق كونۆەنتسيالارعا قوسىلىپ, حالىقتىڭ ەتنيكالىق جانە كونفەسسيالىق توپتارى اراسىندا تەڭقۇقىقتىق قاتىناستار قامتاماسىز ەتىلگەن.
رەسپۋبليكادا ازاماتتىق قوعام ينستيتۋتتارى قۇرىلىپ, بۇگىندە 12 مىڭنان استام ۇيىم ءار سالادا ءتيىمدى قىزمەت اتقارىپ كەلەدى. تاۋەلسىز بۇقارالىق اقپارات قۇرالدارى دا قارقىندى دامىپ, عالامتور اۋديتورياسىنىڭ سانى جىلدان-جىلعا ارتۋدا. اتا زاڭدا بەلگىلەنگەن دەموكراتيانىڭ ءاربىر بازالىق قاعيدالارىنىڭ الەۋەتى ءالى تولىق اشىلعان جوق. ولاردىڭ تولىق ءىس جۇزىنە اسىپ, قازاقستان قوعامىن دەموكراتيالاندىرۋدىڭ ىرگەتاسىنا اينالۋىنا ءبىراز ۋاقىت قاجەت ەكەنى بەلگىلى, كوپ جاعدايدا ولار وبەكتيۆتى سەبەپتەرگە بايلانىستى كۇندەلىكتى تۇرمىسقا باياۋ ەنۋدە.
شيرەك عاسىر ىشىندە جۇرگىزىلگەن بىرقاتار كونستيتۋتسيونالدىق رەفورمالار اتا زاڭىمىزدىڭ الەۋەتىن ودان ءارى ارتتىرا وتىرىپ, ونى مەملەكەتىمىزدىڭ دامۋ قارقىنى مەن زامان تالابىنا ساي جاڭا ماقسات-مىندەتتەرگە سايكەستەندىرۋدە.
ءبىزدىڭ كونستيتۋتسيامىز, مەملەكەتىمىزدى تولىق قالىپتاستىرىپ, نارىقتىق ەكونوميكانى قۇرىپ, ازاماتتىق قوعامدى كەمەلدەندىرىپ, شەكارامىزدى شەگەندەپ, حالىقارالىق قوعامداستىقتا ءوز ورنىمىزدى تاۋىپ, دۇنيە ءجۇزىنىڭ بەدەلدى ۇيىمدارىندا بەلسەندىلىك تانىتۋعا مۇمكىندىكتەر بەردى. الداعى ۋاقىتتا دا العا قويعان ماقساتتارىمىزدى ءىس جۇزىنە اسىرىپ, الەمنىڭ باسەكەگە قابىلەتتى ەلدەرىنىڭ قاتارىندا ەنۋىمىزدە اتا زاڭىمىز ارقاسۇيەرىمىز بولا بەرەتىنىنە سەنەمىز.
