وڭتۇستىك قازاقستان وبلىسىنداعى شاردارا بالىق زاۋىتىن جاڭارتۋ جۇمىسىن اياقتاۋعا جاقىن قالدى. بۇل تۋرالى Otyrar.kz حابارلادى.
ءوندىرىستى تولىق مودەرنيزاتسيالاۋدى «اگرارلىق نەسيە كورپوراتسياسى» اكتسيونەرلىك قوعامى جۇزەگە اسىرۋ ۇستىندە. ولاردىڭ قولعا العان ءىسىنىڭ جالپى قۇنى 182 ملن. تەڭگەنى قۇرايدى. ەندى جىلىنا 1000 مىڭ توننا بالىق وڭدەيتىن زاۋىت 100-دەن اسا جەرگىلىكتى تۇرعىنداردى جۇمىسپەن قامتۋدى كوزدەپ وتىر.
« شاردارا بالىق زاۋىتىنىڭ ىرگەتاسى قالانعانىنا ءبىراز جىلدىڭ ءجۇزى بولدى. زامان تالابىنا ساي ءوندىرىستى جاڭا تەحنولوگيامەن جابدىقتاۋ ءىسى جاقىن ارادا اياقتالادى. تاعى ءبىر اتاپ وتەرلىك, بۇل زاۋىتتىڭ جۇمىسىن جانداندىرۋ ءۇشىن قوسىمشا اۋدان ورتالىعىنان يندۋستريالاندىرۋ ورتالىعى اشىلعالى وتىر»,-دەيدى شاردارا اۋدانىنىڭ اكىمى قامىتبەك ايتورەەۆ.
بۇل زاۋىتتىڭ كۇنىنە 10 توننا بالىقتى قابىلداۋعا مۇمكىندىگى بار. سونى تازالاپ, وڭدەپ رەسەي مەن باسقا دا ەلدەرگە جونەلتۋدى جوسپارلاۋدا. زاۋىت باسشىلىعى بالىقتاردى ءوز ايماعىنان جانە ارال اۋدانىنان كەلىسىم-شارت نەگىزىندە الادى ەكەن. وسىلايشا وتاندىق نارىقتى ساپالى ونىممەن قامتاماسىز ەتۋ ءىسى تاياۋ ارادا ءوز شەشىمىن تابادى.
باقىتبەك كەنەش ۇلى.
