سونىمەن, الماتىدا ءوتىپ جاتقان بوكستان XVII الەم چەمپيوناتىنىڭ ەڭ ءبىر شەشۋشى شەگىنە, ەرەكشە تولقۋلى تورىنە جەتتىك. كەشە ول جارتىلاي فينالدىق ايقاستار تۇرىندە كەرەگە كەرىپ, التىن مەدال ءۇشىن شايقاسۋعا ءتيىستى تارلاندار توبىن توپتاستىرىپ بەردى. بۇل كۇن سونىمەن بىرگە, قازاق بوكسىنىڭ كەلبەتىن كورسەتىپ, كەلەشەگىنە كوز جۇگىرتكىزىپ كەتكەن كەزەڭ دە بولدى. وسى كۇنى 1/2 فينالدا ايقاسقان 8 جىگىتىمىزدىڭ التاۋى التىن جۇلدە ءۇشىن كۇرەسەتىن 20 سايىپقىراننىڭ قاتارىنان تابىلدى.
سونىمەن, الماتىدا ءوتىپ جاتقان بوكستان XVII الەم چەمپيوناتىنىڭ ەڭ ءبىر شەشۋشى شەگىنە, ەرەكشە تولقۋلى تورىنە جەتتىك. كەشە ول جارتىلاي فينالدىق ايقاستار تۇرىندە كەرەگە كەرىپ, التىن مەدال ءۇشىن شايقاسۋعا ءتيىستى تارلاندار توبىن توپتاستىرىپ بەردى. بۇل كۇن سونىمەن بىرگە, قازاق بوكسىنىڭ كەلبەتىن كورسەتىپ, كەلەشەگىنە كوز جۇگىرتكىزىپ كەتكەن كەزەڭ دە بولدى. وسى كۇنى 1/2 فينالدا ايقاسقان 8 جىگىتىمىزدىڭ التاۋى التىن جۇلدە ءۇشىن كۇرەسەتىن 20 سايىپقىراننىڭ قاتارىنان تابىلدى.
ءدال سايىستار باستالار الدىندا عانا بىزگە 75 كيلوعا دەيىنگى سالماقتاعى اعىلشىن بوكسشىسى ەنتوني فوۋلەردىڭ جاراقاتتانىپ قالۋىنا بايلانىستى شارشى الاڭعا شىعا المايتىنى بەلگىلى بولدى. بۇل ونىڭ قارسىلاسى جانىبەك ءالىمحان ۇلىنىڭ فينالعا ۇرىسسىز جولداما العانىن ايعاقتاپ بەرگەن ەدى. سول قۋانىشتى حاباردىڭ سوڭىن الا الاڭعا 49 كيلوعا دەيىنگى سالماقتاعى ءبىرجان جاقىپوۆ پەن كۋبالىق يوسۆاني سوتو ۆەيتيا كوتەرىلدى. بىردەن بايقالعانى, ءبىزدىڭ قۇرامانىڭ ارداگەرى ۇرىستى بارىنشا بايسالدى باستادى. ول ءوزىن بىرىنشىلىكتە ءۇش رەت جەڭىسكە جەتكىزگەن ءتالىمدى تاكتيكاسىنان بۇل جولى دا اينىعان جوق. اقىرىن ءجۇرىپ, انىق باستى. كەرەكتى جەرىندە جانارتاۋداي بۇرق ەتىپ كوتەرىلىپ, ءابجىل ارىپتەسىن جۇدىرىقتىڭ استىنا الدى. ەڭ باستىسى, ول وزىنە وتە سەنىمدى كورىندى. مۇنىڭ الدىنداعى الەم چەمپيوناتىندا ادەپكى قارسىلاس بولىپ كەزىگىپ, ءوزىن 1/32 فينالدا جولدان تايدىرعان جاس پەرىدەن قالايدا قارىمتا قايتارۋ قامىمەن اپتىقپادى. وسى قيمىل اقىرىندا تالاسسىز جەڭىسكە دە اپاردى. كەلەسى جۇپتا الجيرلىك موحاممەد فليسسي كوستاريكالىق داۆيد رودريگەستى 3:0 ەتىپ ۇتىپ, ءبىرجاننىڭ اقتىق سىنداعى قارسىلاسى بولىپ شىعا كەلدى.
بۇدان كەيىن بالۋان شولاق كەشەنىندەگى جانكۇيەرلەر 56 كيلوداعى قايرات ەراليەۆ پەن ازەربايجان دجاۆيد چەلەبيەۆتىڭ تەكەتىرەسىن تاماشالادى. جاسىراتىنى جوق, ءبىزدىڭ باعلاننىڭ ءۆيزاۆيى حالىقارالىق ارەنا تۇرماق, ءوز ەلىندە دە پالەندەي ساليقالى سالماعى جوق سايىسكەر ەدى. بۇل ءۇشىن ونىڭ ءالى ازەربايجاننىڭ دا چەمپيونى بولىپ كورمەگەنىن, بار جەتىستىگى بيىلعى ۇلتتىق بىرىنشىلىكتە العان قولا مەدال ەكەنىن ايتساق تا جەتكىلىكتى. ۇرىس بارىسىندا ءبىزدىڭ بوكسشى شەبەرلىك جاعىنان دا, سوققىلارىنىڭ دالدىگى جاعىنان دا وزىق كورىندى. ارىپتەستىڭ بار ارتىقشىلىعى وڭمەندەپ العا ۇمتىلا بەرۋ بولدى. سونداي ايىرىم بولعانىنا قاراماستان, نەگە ەكەنى تۇسىنىكسىز, تورەشىلەر كەيىنگى ەكى راۋندتاردى دەڭگەيى مەن ورەسى تومەن سپورتشىعا بەردى دە جىبەردى. البەتتە, قازاقستاننىڭ ءبىر رەت قانا چەمپيونى اتانىپ, كۇنى كەشە ازيا چەمپيوناتىنان قۇرقول قايتقان قايرات ءۇشىن جاھاندىق جارىستا ءۇشىنشى جۇلدەلى بولۋدىڭ ايتارلىقتاي زور تابىس ەكەنىن ءبارىمىز دە بىلەمىز. بىراق, وسىنىڭ الدىندا عانا تۋرنيردەگى جالعىز وليمپيادا چەمپيونى, كۋبالىق قابىلان روبەيسي راميرەستى تەربەلتىپ ۇتىپ, مۇلدە مەدالسىز قالدىرعان وعلانىمىزدىڭ بەلگىسىز بىرەۋگە بەلبەۋىن بوساتىپ بەرىپ قويعانى ەرىكسىز وكىندىردى.
وسى كەتكەن ەسەنى كەيىنىرەك 64 كيلو سالماقتاعى مەرەي اقشالوۆ جاقسى قايتاردى. ونىڭ ۇستىنە ونىڭ ارىپتەسى الگىندەگى سەكىلدى بوزىم ەمەس, تالاي جىلداردىڭ تاڭىن تالاستى كۇرەسپەن ايىرعان تارلان ەدى. باسقاسىن ايتپاعاندا, ول وسىنىڭ الدىندا باكۋدە وتكەن الەم چەمپيوناتىندا باس بايگەنى العان. بۇدان دا ءارى كەتسەك, برازيليانىڭ چەمپيونى دەگەن اتاققا سوناۋ 2006 جىلى-اق قول جەتكىزگەن ج ۇلىنداي جىگىت بۇگىنگە دەيىن ونىڭ سانىن 5-كە تولتىرعان. پانامەريكا ويىندارى مەن لاتىن امەريكاسى ويىندارىنىڭ اربىرىندە ەكى دۇركىننەن, پانامەريكا چەمپيوناتىندا ءبىر مارتە جۇلدە تاققان. مىنە, سول چەمپيوندى ءبىزدىڭ مەرەي ءوزىنىڭ كەرەمەت ونەرىمەن تاقتان تايدىردى. بۇعان دەيىن قارسىلاستار ءبىر-بىرىمەن ەكى رەت كەزدەسكەن ەكەن. ونىڭ ءبىرىنشىسى برازيليادا وتكەن اسكەري قىزمەتكەرلەر اراسىنداعى الەم بىرىنشىلىگى كەزىندە بولدى. ەكىنشىسىندە بۇكىلالەمدىك بوكس سەرياسى ماتچى اياسىندا جۇدىرىق سىلتەستى. ناتيجەلەرى تەڭ – 1:1. كىمنىڭ قايدا جەڭگەنىن تۇيسىگى تۇرىك وقىرماندار پايىمداپ وتىرعان شىعار. سول ەجەلگى ەڭكۋلەستەردىڭ ەندىگى ەرەن ۇرىسىن ءبىزدىڭ باعلان باستادى. ولاي ەتپەسكە ءاددى دە جوق ەدى. بۇل جەكپە-جەكتى مەرەيدىڭ ءوز ءۇيىنىڭ تورىندە وتكىزگەنىنەن بولەك, تاپ سول كۇنى ونىڭ وتباسىندا كول-كوسىر قۋانىش ورىن الىپ, دۇنيەگە اميرا ەسىمدى قىزى كەلىپ جاتقان-دى. سوندىقتان شاتتىعى شاشاسىنا سىيماعان شاندوز ءوزىنىڭ بۇل جەڭىسىن تۋعان رەسپۋبليكاسى مەن قىزىنا قاتار ارنادى. ال مەرەيگە فينالدا كۋبا بوكسشىسى تاپ كەلىپ تۇر. ءبىر قىزىعى, ەلىمىزدىڭ قازىرگى قۇراماسىندا بوستاندىق ارالىنىڭ گۇرزى جۇدىرىقشى جىگىتتەرىمەن ءتورت رەت كەزدەسىپ, سونىڭ ءتورتەۋىندە دە جەڭىسكە جەتكەن ودان باسقا ەشكىم جوق. ول وسى كەزگە دەيىن تاپ وسىلاي يوردەنيس ۋگاستى 2 رەت, لوندون وليمپياداسىندا چەمپيون اتاناتىن روسنيەل يگلەسياس پەن يۋدەنيس تاۋراستى ءبىر-ءبىر مارتەدەن تىزەرلەتكەن. ەندىگى قارسىلاسى – الەمنىڭ 2011 جىلعى كۇمىس جۇلدەگەرى, پانامەريكا ويىندارىنىڭ سول جىلعى جەڭىمپازى, 2010 جىلعى پانامەريكا چەمپيوناتىنىڭ التىن جۇلدەگەرى, 2009 جىلعى بوليۆار ويىندارىنىڭ ءبىر مارتە جانە كۋبانىڭ 4 دۇركىن چەمپيونى ياسنيەر تولەدو لوپەس! ارينە, ءبىز بۇگىن دە سول ءىزى قالانىپ قويىلعان جەڭىستى ءۇردىستىڭ جالعاسقانىن قالايمىز.
قازاقستاندىقتار ءۇشىن وسىمەن كۇندىزگى سەسسيا ۇرىستارى اياقتالدى. اراعا ەكى ساعاتتىق ءۇزىلىس سالىپ, قايتا جالعاسقان كەلەسى باسەكەلەردى قازاقستاندىقتار قاتارىنان 60 كيلوعا دەيىنگى سالماقتاعى بەرىك ءابدىراحمانوۆ باستادى. ءبىز ونىڭ كۋبالىق تاجىريبەلى تارلان لازارو الۆارەس ەسترادامەن شايقاسىن تىم «تابانداتتىعا» ساناماس ەدىك. بىراق, بۇل جولى دا وعان قولىنىڭ قىسقالىعى ءبىراز قيىندىق كەلتىردى. سوندىقتان قانشاما قايتپاس قيمىلمەن اتويلاپ العا شاپقانىمەن, كۋبالىقتىڭ قاشا ءجۇرىپ سالعان ۇرىسى ۇپايدى كوبىرەك جيناپ كەتتى. راس, سوڭعى راۋندتا بەرىك كەرەمەت سوققىلار سەرياسىنىڭ سىلتەۋىن جازدى. ايتكەنمەن, جالپى جەڭىس ءۇشىن مۇنىڭ ءوزى ازدىق ەتكەن سياقتى. سول سەبەپتى دە وسىدان سوڭ وتە ءتاجىريبەلى يتاليان ۆالەنتينو دومەنيكودان ايلاسىن اسىرا بىلگەن برازيليالىق روبسون كونكەيكاوعا كۋبالىق بوكسشى اقتىق ايقاستا قارسى شىعاتىن بولىپ شەشىلدى.
ءبىزدىڭ بۇل جەردە ريو-دە-جانەيرو ۇلانىنا ارنايى توقتاپ ءوتۋىمىزدىڭ تاعى ءبىر سەبەبى, ول وسى كۇنى ءوزىنىڭ 25-كە تولعان تۋعان كۇنىن تويلادى. تاپ وسىنداي قۋانىشتى ءساتتى بۇل كۇنى, سونداي-اق ءبىزدىڭ داڭقتى بوكسشىمىز سەرىك قوناقباەۆ تا باستان كەشىردى. ال ەرتەڭ تۋعان كۇنى جەتىپ, 25-كە تولعالى تۇرعان رەسەيلىك بوكسشى, قازاقتىڭ جيەنى ارتەم چەبوتارەۆ بولسا, كۇندىزگى سەسسيادا كۇتپەگەن جەردەن دجەيسون كۋيگلەيگە ەسە جىبەرىپ الدى. ءسويتىپ, جانىبەك ءالىمحان ۇلى فينالدا يرلاند مارعاسقاسىمەن كەزدەسەتىن بولدى. ءبىر عاجابى, وسىدان كەيىن رينگكە كوتەرىلگەن بوكسشىلارىمىزدىڭ قاي-قايسىسى دا بىزگە شاتتىقتىڭ شاشۋىن شاشىپ تۇردى. سول جولدى 69 كيلوعا دەيىنگى سالماقتاعى دانيار ەلەۋسىنوۆ ءتۇزۋ جولعا سالىپ جىبەردى. ونىڭ گەرمانيا قۇراماسى اتىنان ءتۇسىپ جۇرگەن ارميان جىگىتى ارايك مارۋتيانمەن ۇرىسى بوكس وقۋلىقتارىنا ويلانباي ەنگىزەتىندەي ءۇزىرلى ۇلگى بولىپ شىقتى.
تاپ وسىنداي ساۋاتتى دا سالاۋاتتى سىناقتى 81 كيلوعا دەيىنگى سالماقتاعى ادىلبەك نيازىمبەتوۆ تە وتكەردى. ەڭ ءتاۋىرى, وسىدان ەكى عانا اي بۇرىن, اممان رينگىندە وتكەن قۇرلىق بىرىنشىلىگىنىڭ فينالىندا وزبەك بوكسشىسىنا كەتىپ قالعان ەسەنىڭ ەرەنى قايتتى. بۇل جولى ساڭلاعىمىزدىڭ وق بويى الدا بولعانى ايداي انىق كورىنىپ تۇردى. بۇعان ونىڭ تاسقامال قورعانىستى ۇستاي وتىرىپ, ۇرانداتا ۇرىپ شىعاتىن سوققىلارى دالەل بولادى. سونىڭ نەگىزىندە ويبەك مامازۋلۋنوۆ ءبىرىنشى راۋندتا-اق ەكى رەت ارقانعا كەرىلىپ بارىپ, قۇلاۋدان امان قالدى. ال سوڭعىسىندا اقىرى اينالىپ بارىپ, جەرگە ۇشىپ ءتۇستى. ەندى فينالدا ادىلبەك 2011 جىلى باكۋدىڭ فينالىندا كەزدەسكەن تاعى ءبىر قارسىلاسى, كۋبالىق حۋليو سەزار دە لا كرۋسپەن ۇشىراسادى. ول بۇل كەزدە يرلاند دجوي ۋاردتان باسىم ءتۇستى. ەگەر وليمپيا ويىندارى مەن الەمنىڭ كۇمىس جۇلدەگەرى الدىڭعى جاھاندىق جارىستا كەتكەن ەسەنى دە تاپ كەشەگىدەي ەتىپ قايتارار بولسا, ول تەك ءوزى ءۇشىن عانا ەمەس, ونىڭ ونەرىن بارىنشا بابىمەن باعالايتىن مىڭداعان جانكۇيەرلەرى ءۇشىن دە تاپتىرماس تارتۋ بولىپ شىعار ەدى.
جارتىلاي فينالدىق ايقاستاردىڭ ەڭ سوڭعى گونگى ءبىزدىڭ يۆان دىچكونىڭ جەڭىسىن پاش ەتىپ سوعىلدى. ول بۇل ساتتە گەرمانيالىق ەريك پفايففەردى تۇرالاتىپ جاتىر ەدى. بۇعان دەيىن وليمپيادا مەن الەمنىڭ ءبىر-ءبىر قولا مەدالدارىن الىپ قالعان ايبىندى ازاماتىمىز ءۇشىن فينالعا شىعۋدىڭ ءوزى تابىس. سوڭىندا ۆانيانىڭ ءوزى دە وسىنى مويىنداي وتىرىپ, اقىرعى سىندا ايانباي ايقاساتىنىن ايتىپ سالدى. ال ونىمەن سوڭعى تىرەك باسىندا وسى جولى يتاليان روبەرتو كاممارەللەنى تەڭسەلىپ ءجۇرىپ ۇرىپ شىعىپ, بۇكىلالەمدىك سەرياداعى جەڭىلىسىنىڭ جەتەگىن قايتارعان الەمنىڭ 2011 جىلعى چەمپيونى, ازەربايجاندىق ماگومەدراسۋل مەدجيدوۆ كەزدەسپەكشى. ءبىزدىڭ باعلان ودان باكۋدەگى جارتىلاي فينالدا جەڭىلگەن. جالپى, وسى كەزگە دەيىن داعىستاندىق داۋىلپاز ءۇش قازاقستاندىق اتلەتپەن كەزدەسكەن ەكەن. سولاردىڭ ىشىندە تاعى قامشىبەك قوڭقاباەۆتى ۇتقانىمەن, جان كوسوبۋتسكيگە ەسە جىبەرگەن. دەمەك, تيەگىن تاپسا, يۆانعا دا ەكى جىل بۇرىنعى ۇتىلىستىڭ ۇستىنىن قايتارۋدىڭ ورايى كەلىپ قالار دەپ شامالايمىز.
سونىمەن, جارتىلاي فينالدىق ايقاستار اياقتالدى. ول بۇگىن وتەتىن اقتىق ايقاسقا قازاقستاننىڭ 6 بوكسشىسىنان بولەك, كۋبانىڭ – 4, رەسەيدىڭ – 3, ازەربايجاننىڭ – 2, سونداي-اق الجير, يرلانديا, يتاليا, وزبەكستان جانە برازيليا ەلدەرىنىڭ ءبىر-ءبىر بىلعارى قولعاپ شەبەرلەرىن الىپ شىقتى.
«ەگەمەن قازاقستاننىڭ» الەم
چەمپيوناتىنداعى كوشپەلى رەداكتسياسى.
