قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆتىڭ شۆەيتسارياعا جۇمىس ساپارى جالعاسۋدا. جەنەۆادا ق.توقاەۆتىڭ بۇۇ باس حاتشىسىنىڭ ورىنباسارى, بۇۇ جەنەۆا ءبولىمىنىڭ باس ديرەكتورى قىزمەتىن اياقتاۋىنا بايلانىستى بىرقاتار شارالار ءوتتى, دەپ حابارلادى وسى پالاتانىڭ ءباسپاسوز قىزمەتى.
قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆتىڭ شۆەيتسارياعا جۇمىس ساپارى جالعاسۋدا. جەنەۆادا ق.توقاەۆتىڭ بۇۇ باس حاتشىسىنىڭ ورىنباسارى, بۇۇ جەنەۆا ءبولىمىنىڭ باس ديرەكتورى قىزمەتىن اياقتاۋىنا بايلانىستى بىرقاتار شارالار ءوتتى, دەپ حابارلادى وسى پالاتانىڭ ءباسپاسوز قىزمەتى.
ق.توقاەۆتىڭ قۇرمەتىنە «ۆيكتوريا حول» كونتسەرت زالىندا شۆەيتساريا فەدەرالدىق ۇكىمەتى مەن جەنەۆا كانتونى بيلىگىنىڭ اتىنان سالتاناتتى كونتسەرت بولدى. شارا سونداي-اق جىل سايىن 24 قازاندا اتاپ وتىلەتىن بۇۇ كۇنىنە ارنالدى.
شارادا قازاقستان وكىلىنىڭ جەتەكشىلىگى كەزىندە جەنەۆانىڭ حالىقارالىق ءرولى بۇۇ ەۋروپالىق شتاب-پاتەرى تۇرعىسىندا عانا ەمەس, كوپتاراپتى ديپلوماتيانىڭ جاھاندىق ورتالىعى رەتىندە دە ارتا تۇسكەنى اتاپ كورسەتىلدى. سونىمەن بىرگە, بۇل كۇندەرى ق.توقاەۆ قارۋسىزدانۋ ءجونىندەگى كونفەرەنتسيانىڭ باس حاتشىسى ۋاكىلەتتىگىن دە توقتاتتى. ونىڭ باسشىلىعىمەن كونفەرەنتسياداعى يادرولىق ءماسەلەلەر جونىندەگى پىكىرسايىستاردا ءىلگەرىلەۋشىلىك ايقىندالدى.
كەشە ۇلتتار سارايىندا ق.توقاەۆ بۇۇ-نىڭ جەنەۆا ءبولىمىنىڭ ۇجىمى ءۇشىن رەسمي قابىلداۋ بەردى جانە كەڭسەنىڭ اعا قىزمەتكەرلەرىمەن قورىتىندى كەڭەس وتكىزدى. بۇۇ كۇنى اياسىندا ق.توقاەۆ ۇيىمنىڭ ارداگەرلەرىنە ادال قىزمەتى ءۇشىن مەدالدار تابىس ەتتى.
بۇۇ-نىڭ جەنەۆا كەڭسەسىندە الەمنىڭ 115 ەلىنەن 1500-دەن استام قىزمەتكەر جۇمىس ىستەيدى. ءبولىم بۇۇ جۇيەسىنىڭ 90-نان استام ءتۇرلى قۇرىلىمدارىن قولداۋ ءىسىن قامتاماسىز ەتەدى, يراننىڭ يادرولىق باعدارلامالارى, سيرياداعى جاعداي, افريكاداعى اۋماقتىق داۋلاردى رەتتەۋ جانە باسقا دا ماسەلەلەر جونىندەگى كەلىسسوزدەردى قوسقاندا جىل سايىن كەڭسە وتكىزگەن كونفەرەنتسيالار مەن كەزدەسۋلەردىڭ سانى 10 مىڭنان اسقان.
شۆەيتساريالىق بۇقارالىق اقپارات قۇرالدارى, ديپلوماتيالىق كورپۋس, سونداي-اق, جەرگىلىكتى قوعام ق.توقاەۆتىڭ جەنەۆاداعى جۇمىسى تۋرالى ىستىق ىقىلاستارىن ءبىلدىرىپ, ول ءوزىنىڭ بەلسەندى جانە كاسىبي قىزمەتىمەن بۇۇ-نىڭ امبەباپ سيپاتتاعى بالاماسىز ەرەكشە حالىقارالىق ۇيىم رەتىندەگى ەڭ ۇزدىك كەلبەتىن پاش ەتكەنىن اتاپ ءوتتى. بەلگىلى ديپلومات, ەلشى فرانسۋا نوردمانن تانىمال شۆەيتساريالىق «Le Temps» گازەتىندە ق.توقاەۆ تۋرالى «ۇلتتار سارايىنداعى كۇندەلىكتى ىستەردى باسقارۋدا جانە بۇۇ-نىڭ جەنەۆاداعى اكىمشىلىك ورگاندارىنىڭ جۇمىستارىنا جەتەكشىلىك ەتە وتىرىپ, ۇنەمدەۋ جانە جاڭاشىلدىق باعدارلاماسىن ىسكە اسىرۋدا شىن مانىندەگى مەنەدجەرلىك قابىلەت-قارىمىن كورسەتتى», دەپ جازدى. ماقالا اۆتورىنىڭ پىكىرىنشە, باس ديرەكتور بۇۇ-نىڭ جەنەۆا جانە شۆەيتساريا بيلىگىمەن اراداعى قاتىناستارىن نىعايتۋ جونىندەگى جۇمىستاردى تابىستى جۇزەگە اسىرىپ, جەرگىلىكتى قوعامدىق ومىرگە بەلسەندى تۇردە قاتىستى.
قازاقستاننىڭ بۇۇ-نىڭ جەنەۆاداعى ءبولىمى جانىنداعى تۇراقتى وكىلدىگى جەنەۆالىق ديپلوماتيالىق قوعامداستىققا بۇۇ باس حاتشىسى ورىنباسارىنىڭ ەلگە ورالۋ راسىمىنە بايلانىستى رەسمي قابىلداۋ بەردى.
جەنەۆادا, سونىمەن ءبىرگە, ق.توقاەۆقا «ممحقي (مگيمو) تۇلەكتەرى اسسوتسياتسياسىنىڭ قۇرمەتتى مۇشەسى» كەۋدە بەلگىسىن تابىس ەتۋدىڭ رەسمي سالتاناتى بولدى. ودان باسقا, حالىقارالىق جاسىل كرەستىڭ پرەزيدەنتى الەكساندر ليحوتال ق.توقاەۆقا وسى ۇيىمنىڭ ماقساتتارى مەن مىندەتتەرىن ىسكە اسىرۋداعى زور ۇلەسى ءۇشىن ديپلوم جانە كۇمىس مەدال تابىس ەتتى.
