الماتى قالاسىندا بوكستان الەم چەمپيوناتىنىڭ ءوتۋىن تاۋەلسىز مەملەكەتىمىزدىڭ وسى سپورت سالاسىنداعى قول جەتكىزگەن تابىستارىنىڭ ناتيجەسى دەپ بىلەمىن. تمد بويىنشا ماسكەۋ, باكۋدەن كەيىن بىزدە ءوتىپ وتىر. ورتالىق ازيادا مۇنداي جارىس وتكەن جوق. سوندىقتان بۇل بىرىنشىلىكتىڭ ماڭىزى وتە زور.
الماتى قالاسىندا بوكستان الەم چەمپيوناتىنىڭ ءوتۋىن تاۋەلسىز مەملەكەتىمىزدىڭ وسى سپورت سالاسىنداعى قول جەتكىزگەن تابىستارىنىڭ ناتيجەسى دەپ بىلەمىن. تمد بويىنشا ماسكەۋ, باكۋدەن كەيىن بىزدە ءوتىپ وتىر. ورتالىق ازيادا مۇنداي جارىس وتكەن جوق. سوندىقتان بۇل بىرىنشىلىكتىڭ ماڭىزى وتە زور.
24 قازان كۇنى الماتى قالاسىندا بوكس اكادەمياسىنىڭ اشىلۋى دا ايتۋلى وقيعا بولدى. ءويتكەنى, الاتاۋ باۋرايىندا ورىن تەپكەن بۇل سپورت شاڭىراعى كەرەمەت. تەڭىز دەڭگەيىنەن الدەقايدا بيىكتە دايىندىقتان وتكەن بوكسشىلاردىڭ الەۋەتى جوعارى بولادى. كوپ جاعدايدا سوڭعى راۋندتاردا جىگىتتەر ءسال-ءپال بوساڭسىپ قالىپ جاتادى. ال مىقتى مەكتەپ بار جەردە, سونداي ولقىلىق بولمايدى دەپ ويلايمىن.
مەن الەم چەمپيوناتى اشىلعان كۇننەن بەرى ءدۇبىرلى دودانى «قازسپورت» تەلەارناسىنان ۇزبەي كورۋدەمىن. بوكسشىلارىمىز قۋانتىپ جاتىر. باسقا ەلدىڭ بىلعارى قولعاپ شەبەرلەرىنىڭ دە جارق ەتىپ كورىنىپ قالىپ جاتقاندارى بار. نەمەسە, تانىمال بوكسشىلار بەلگىسىز قارسىلاستارىنان ۇتىلىپ قالعانىن دا كورىپ وتىرمىز. كەزدەيسوق وقيعالار بولۋدا. ارينە, بوكسشىنىڭ دايىندىعى, جيناعان تاجىريبەسى باستى ءرول اتقاراتىنى داۋسىز. دەگەنمەن, بارلىق ماسەلەنى شارشى الاڭ شەشىپ جاتىر. مىقتى بوكسشى الماي قويمايدى.
ءبىزدىڭ جىگىتتەردىڭ تەحنيكالىق دايىندىعى وتە جوعارى دەڭگەيدە ەكەن. باپكەرلەرىنىڭ اقىل-كەڭەسى بويىنشا ءساتتى ونەر كورسەتۋدە. ءبارى دە شارشى الاڭدا بار قايراتىن سالىپ جاتقانىن بايقاۋعا بولادى. اللا بوكسشىلارىمىزدى وقىس جاعدايلارعا ۇشىراپ قالۋدان ساقتاسىن.
مەنىڭشە, ادىلبەك نيازىمبەتوۆتىڭ, دانيار ەلەۋسىنوۆتىڭ, جانىبەك ءالىمحان ۇلىنىڭ, مەرەي اقشالوۆتىڭ الەۋەتتەرى جوعارى, وسى جىگىتتەردەن ۇلكەن ءۇمىت كۇتىپ وتىرمىز. ءبىرجان جاقىپوۆتىڭ تاجىريبەسى وتە مول, وسى جارىستا بار كۇشىن سالاتىنى ءسوزسىز. يۆان دىچكودا بوكسشىعا ءتان تابيعي دارىن بار.
الەم چەمپيوناتىنىڭ ۇيىمداستىرىلۋى دا جاقسى اسەر قالدىرۋدا. جارىس جوعارى دەڭگەيدە ءوتىپ جاتىر. ءبىر ادەمى كورىنىس, قىزىل بۇرىشقا شىعاتىن بوكسشىنى ۇلتتىق سيپاتتاعى قىزعىلت كيىمدى قىزدار باستاپ كەلە جاتادى. ال كوك بۇرىشتاعى سپورتشىنى كوكشىل كويلەكتى ارۋ قىزىمىز شارشى الاڭعا الىپ كەلەدى. بۇل ءبىر كىشكەنتاي ماسەلە سياقتى. بىراق, مۇنىڭ كوڭىلگە شۋاق سىيلايتىن ۇلتتىق رەڭكى بار.
استانادا وتسە, مۇنداي جارىسقا كۇندە بارار ەدىم. دەگەنمەن, بىلعارى قولعاپ شەبەرلەرىنىڭ عاجاپ ونەرلەرىن حالقىمىزعا جەتكىزىپ وتىرعان «قازسپورت» تەلەارناسىنا جانە «قازاقستان» ۇلتتىق ارناسىنا ەل تۇرعىندارىنىڭ ايتار العىسى شەكسىز.
بۇگىنگى تاڭدا بوكستى قازاقتىڭ ۇلتتىق برەندى دەسەك, قاتەلەسپەيمىز. قاسيەتتى حالىقتىڭ ۇلاندارى بەرىلىپ تۇرعان ءمۇمكىندىكتى جىبەرمەي, بيىك دەڭگەيدەن كورىنسە دەپ تىلەيمىن. جىگىتتەرگە اللا جار بولسىن!
شالاتاي مىرزاحمەتوۆ,
ءماجىلىس دەپۋتاتى.
