وبلىس اكىمدىگى جانىنداعى جوعارى جانە جوعارى وقۋ ورنىنان كەيىنگى ءبىلىمى بار مامانداردى دايارلاۋعا مەملەكەتتىك ءبىلىم بەرۋ تاپسىرىسىن ورنالاستىرۋ جونىندەگى كونكۋرستىق كوميسسيانىڭ شەشىمىمەن بيىل 50 جاس گرانت يەگەرى اتاندى. بقو ءبىلىم باسقارماسىنان ءمالىم ەتكەندەي, 50 جاستىڭ 37-ءسى م.وسپانوۆ اتىنداعى باتىس قازاقستان مەملەكەتتىك مەديتسينالىق ۋنيۆەرسيتەتىنە ءتۇستى. دارىگەرلىك ماماندىقتارعا باسىمدىق بەرىلۋى تۇسىنىكتى.
الەمدى جايلاعان ىندەت كەزىندە باتىس قازاقستان وبلىسىندا دا مەديتسينا ماماندارىنىڭ جەتىسپەۋشىلىگى بايقالىپ وتىر. سونىمەن قاتار 9 جاس م.وتەمىسوۆ اتىنداعى باتىس قازاقستان ۋنيۆەرسيتەتىندە, 4-ەۋى "نۇر-مۇباراك" ەگيپەت يسلام مادەنيەتى ۋنيۆەرسيتەتىندە ءبىلىم الاتىن بولادى. باسقارما باسشىسى ايگۇل مىڭباەۆانىڭ ايتۋىنشا, جەرگىلىكتى بيۋدجەت ەسەبىنەن ءبىلىم بەرۋ گرانتى 2017 جىلدان بەرى بەرىلىپ كەلەدى.
مۇنداعى ماقسات – وبلىسقا اسا قاجەت مامانداردى دايارلاۋ. بۇل جوبانىڭ ءوز جەمىسىن بەرەتىنى انىق. بيىلدىڭ وزىندە ءبىر ستۋدەنت م.وتەمىسوۆ اتىنداعى باتىس قازاقستان ۋنيۆەرسيتەتىن ءتامامداپ, وبلىستىق دەنە شىنىقتىرۋ جانە سپورت باسقارماسىنىڭ قاراماعىنداعى مەكەمەگە جۇمىسقا ورنالاستى. الداعى جىلى بىتىرەتىندەر دە بارشىلىق, وسىلاي جالعاسا بەرەدى. ستۋدەنتتەرگە ستيپەنديا تولەنەدى.
جوو بىتىرگەننەن كەيىن ۇشجاقتى كەلىسىمگە سايكەس جاس ماماندار اۋىلدىق جەرگە جۇمىسقا جىبەرىلەدى. بيىل گرانت يەگەرلەرى اتانعانداردىڭ ءبىرى, دارىندى بالالارعا ارنالعان مامانداندىرىلعان س. سەيفۋللين اتىنداعى №11 وبلىستىق قازاق مەكتەپ-ينتەرنات كەشەنىنىڭ تۇلەگى جانەركە امانگەلديەۆا ءوزىنىڭ قۋانىشتى ەكەندىگىن, جەرگىلىكتى بيۋدجەت ەسەبىنەن م.وسپانوۆ اتىنداعى باتىس قازاقستان مەملەكەتتىك مەديتسينالىق ۋنيۆەرسيتەتىندە وقيتىنىن جەتكىزدى.
"باستاپقىدا-اق دارىگەر بولۋدى جۇرەگىممەن قالادىم. دەگەنمەن مۇنداي قۇرمەتتى ءارى وتە جاۋاپتى ماماندىقتى تاڭداۋعا جۇرەكسىنىپ ءجۇردىم. بىراق وسىدان بىرنەشە جىل بۇرىن اجەمىز قاتتى سىرقاتتانىپ قالعان كەزدە اكەمنىڭ ء«تورت قىزىم دا دارىگەر بولادى» دەگەن ءسوزى قانات ءبىتىرىپ, ارمانىمدى بەكىتە ءتۇستى. سول ساتتەن باستاپ بۇل ماقساتىمنان باس تارتقان ەمەسپىن. ارمانىم – ەڭ ءبىرىنشى ادامدارعا كومەكتەسەتىن ىزگى نيەتتى دارىگەر بولۋ. ەكىنشىدەن, ولكەمىزگە تانىمال سەرىك قۋاندىق ۇلى اقشولاقوۆ ءتارىزدى تالاي جاننىڭ ومىرىنە اراشا تۇسە الاتىن بىلىكتى نەيروحيرۋرگ اتانعىم كەلەدى", - دەدى جانەركە يمانتايقىزى.
