"قازگيدرومەت رمك ماماندارى كولدەگى سۋدىڭ, ءتۇپ شوگىندىلەردىڭ جانە جاعالاۋداعى توپىراقتىڭ سىنامالارىن الدى. كوبەيتۇز كولى سۋىنىڭ ساپاسىن تالداۋ 42 فيزيكا-حيميالىق كورسەتكىشتەر بويىنشا جۇرگىزىلگەن.
ءتۇپ شوگىندىلەردە كادمي, مارگانەتس, مىس, كۇشالا, نيكەل, قورعاسىن, حروم مولشەرى تابىلدى. جاعالاۋداعى توپىراقتا كادمي, مىس, مىرىش, قورعاسىن, حروم بار ەكەندىگى بەلگىلى بولدى.
ال جەر ءۇستى سۋلارىنىڭ سىنامالارىندا ۋىتتى, ۋىتتىلىعى جوعارى ەلەمەنتتەر مەن مەتالداردىڭ جوعارى شوعىرلانۋى - كۇشالا (20,7 مگ/دم3), قورعاسىن (73,8 مگ/دم3), كادمي (0,19 مگ/دم3), مىرىش (15,7 مگ/دم3), حروم (2,3 مگ/دم3), مىس (1,4 مگ/دم3), نيكەل (0,4 مگ/دم3), موليبدەن (6,2 مگ/دم3) انىقتالدى. «ماكرو-ميكروەلەمەنتتەردىڭ جەر ءۇستى سۋلارىنا ءتۇسۋىنىڭ ىقتيمال كوزى - جەر استى توپىراقتارىنان شايىلۋى.
ەرەيمەنتاۋ اۋدانىنىڭ جەر قويناۋى التىن, سۇرمە, تاس كومىر, بوكسيت, گرانيت, اكتاس جانە باسقا دا قورلارعا باي. سۋدىڭ, ءتۇپ شوگىندىلەردىڭ, جاعالاۋداعى توپىراقتىڭ فيزيكا-حيميالىق كورسەتكىشتەرىنىڭ ناقتى شوعىرلانۋى بويىنشا ناتيجەلەر قر ەگترم ەكولوگيالىق رەتتەۋ جانە باقىلاۋ كوميتەتىنە جىبەرىلدى.
كوبەيتۇز كولىندە ۋىتتىلىعى جوعارى حيميالىق زاتتاردىڭ جوعارى شوعىرلانۋىنىڭ بولۋىن ەسكەرە وتىرىپ, كوبەيتۇز سۋ ايدىنىنىڭ حالىق ءۇشىن قاۋىپسىزدىگىن بەلگىلەۋ ءۇشىن دەنساۋلىق ساقتاۋ سالاسىنداعى ۋاكىلەتتى مەملەكەتتىك ورگاندى تارتا وتىرىپ, ارنايى زەرتتەۋلەر جۇرگىزۋ قاجەت دەپ سانايمىز», - دەلىنگەن تاراتىلعان اقپاراتتا.
ەسكە سالا كەتسەك, بۇعان دەيىن ەكولوگيا, گەولوگيا جانە تابيعي رەسۋرستار مينيسترلىگى كوبەيتۇزدىڭ لاستانىپ, ول جاقتان تۇزدىڭ تيەلىپ اكەتىلۋىنە بايلانىستى الاڭداۋشىلىق بىلدىرگەن ەدى.
وعان حالىقتىڭ كولگە كوپتەپ كەلىپ, تۇزىن قازىپ, ماڭايىن قالدىققا تولتىرىپ كەتۋى سەبەپ. ءتىپتى الەۋمەتتىك جەلىدە كوبەيتۇزدىڭ تۇزىن كەلىسىن بەس مىڭ تەڭگەگە ساتقاندار دا پايدا بولدى. ايتا كەتەيىك, ەلوردادان 170 شاقىرىم جەردە ورنالاسقان كوبەيتۇز كولىنە كارانتين بىتكەنشە بارۋعا تىيىم سالىنعان.
